共観表
Roukos 10.1 §107X
1 Tan orushpe aokere chiki Utarapa anak ne moshima okai wa niu ikashima e ine hotne niu numge wa yaikota ek kushki nep machiya hene kotan hene tun range otta koro kotchaketa payere nisa ruwe ne.
Tan oruspe a=okere ciki Utarpa anakne mosma okay wa niw ikasma e ine hotne niw numke wa yaykota ek kuski nep maciya hene kotan hene tun ranke or ta kor kotcake ta payere nisa ruwe ne.
Mattaios 9.37-38 §78V
37 Nei ita koro koikara utara otta Shinuma ene itak-hi; — Anange kunip anak ne nuye an, koroka, monraige utara moyo ruwe ne.
Ne hi ta kor koykar utar or ta Sinuma ene itak hi; — A=nanke kunip anakne nuye an, korka, monrayke utar moyo ruwe ne.
38 Tambe gusu, anange kuni ushi koro Utarapa anak ne monraige gusu an utara kot toi orun payere kuni gusu koramkoro yan, ari itak.
Tanpe kusu, a=nanke kuni usi kor Utarpa anakne monrayke kusu an utar kot toy orun payere kuni kusu koramkor yan, ari itak.
Roukos 10.2 §108V
2 Awa, otta ene itak-hi :— Nange kuni ushi nuye an koroka, monraige utara moyo ruwe ne: tambe gusu, Nange ushi kon nishpa anak ne nange ushita monraige utara payere kuni gusu koramkoro yan.
Awa, or ta ene itak hi :— Nanke kuni usi nuye an korka, monrayke utar moyo ruwe ne: tanpe kusu, Nanke usi kor nispa anakne nanke usi ta monrayke utar payere kuni kusu koramkor yan.
Mattaios 10.16 §86V
16 Ingarʼan, Kuani echi payere ash katu anak ne hitsuji horokeu tumu un ahupte korachi ne: tambe gusu, okokko pakno wayashnu no okai, kusuwep puri-ratchi pakno puri-ratchi wa okai yan.
Inkar=an, Kuani eci=payere as katu anakne hitsuji horkew tumu un ahupte koraci ne: tanpe kusu, okokko pakno wayasnu no okay, kusuwep puri-ratci pakno puri-ratci wa okay yan.
Roukos 10.3 §109V
3 Echi paye yan; pon hitsuji chikoikip anak ne horokeu tumu un ahupte korachi echi payere ash na.
Eci=paye yan; pon hitsuji cikoykip anakne horkew tumu un ahupte koraci eci=payere as na.
Mattaios 10.7-10 §82II
7 Orowa, echi paye, aige upaskuma ki wa — Kando moshiri ehange no an ruwe ne, — ari an itak ari itak yan.
Orowa, eci=paye, ayke upaskuma ki wa — Kanto mosir ehanke no an ruwe ne, — ari an itak ari itak yan.
8 Tashum utara iwangere, rai utara hetopo-shiknure, munin tashum ki utara ashkannere, nitne kamui oashinge yan: oro isam no echi eungerai, oro isam no koropare yan.
Tasum utar iwankere, ray utar hetopo-siknure, munin tasum ki utar askannere, nitne kamuy oasinke yan: oro isam no eci=eunkeray, oro isam no korpare yan.
9 Kongani hene, shirokani hene, shiuninkani hene echi koro kani o pukuru otta iteki omare; orowa, payekai pusaru iteki koro,
Konkani hene, sirokani hene, siwninkani hene eci=kor kani o pukuru or ta iteki omare; orowa, payekay pusaru iteki kor,
10 tu amip hene, keirehe hene, kuwa bene iteki koro yan: inambe gusu ne yakun, monraige guru anak ne aep uk kunip ne ruwe ne.
tu amip hene, keyrehe hene, kuwa pene iteki kor yan: inanpe kusu ne yakun, monrayke kur anakne aep uk kunip ne ruwe ne.
Markos 6.7-9 §53II
7 Orowa, Shinuma nei tu niu ikashima wa niu shihekote hotuyekara wa tun range payere heashi; awa, Ichakkere ramat oashinge kuni mondum koropare; samata,
Orowa, Sinuma ne tu niw ikasma wa niw sihekote hotuyekar wa tun ranke payere heasi; awa, Icakkere ramat oasinke kuni montum korpare; sama ta,
8 payekai gusu kuwa moshima nep ne yakka koro shomoki kuni kashpaotte; aep hene, pusaru hene, ichen o pukuru otta kani hene iteki koro kuni kashpaotte;
payekay kusu kuwa mosma nep ne yakka kor somo ki kuni kaspaotte; aep hene, pusaru hene, icen o pukuru or ta kani hene iteki kor kuni kaspaotte;
9 koroka, shutu keire ush koro paye; samata, tu amip iteki yaitomchiure kuni kashpaotte nisa ruwe ne.
korka, sutu ker us kor paye; sama ta, tu amip iteki yaytomciwre kuni kaspaotte nisa ruwe ne.
Roukos 10.4 §110II
4 Ichen o pukuru hene, pusaru hene, keire hene iteki koro yan: samata, payekai rapoketa iteki nen ne yakka erangarap yan.
Icen o pukuru hene, pusaru hene, ker hene iteki kor yan: sama ta, payekay rapoketa iteki nen ne yakka erankarap yan.
Mattaios 10.12-13 §84V
12 Orowa chisei ta echi ahup chiki ko-ongami yan.
Orowa cise ta eci=ahup ciki ko-onkami yan.
13 Orowa, chisei koro guru echi korʼirenga kon rusui yakun, kore yan: koroka, shomoki yak anak ne, echi koro irenga kanna boshipire yan.
Orowa, cise kor kur eci=kor irenka kor rusuy yakun, kore yan: korka, somo ki yakanak ne, eci=kor irenka kanna posipire yan.
Roukos 10.5-6 §111V
5 Orowa, nep chisei ta echi ahup yakka hoshiki no ene itak yan :— Tan chisei otta itomo anro.
Orowa, nep cise ta eci=ahup yakka hoskino ene itak yan :— Tan cise or ta i=tom an ro.
6 Orowa, nei chisei ta itomo poho an chiki nei kashiketa e koro itomo an kusu ne; shomo an chiki nei ambe echi otta hoshipi kusu ne na.
Orowa, ne cise ta i=tom poho an ciki ne kasike ta e=kor i=tom an kusu ne; somo an ciki ne anpe eci or ta hosipi kusu ne na.
Mattaios 10.11 §83II
11 Orowa, nep machiya ta hene nep kotan ta hene ne yakka echi kush chiki, nei ushiketa okai pirika guru hunara yan; orowa, ehopiru wa oman pakno nei guru otta reushi yan.
Orowa, nep maciya ta hene nep kotan ta hene ne yakka eci=kus ciki, ne uske ta okay pirka kur hunara yan; orowa, ehopiru wa oman pakno ne kur or ta rewsi yan.
Roukos 10.7A §112II
7 Orowa, nei chisei ta echi reushi wa ikore an aep ibe hemhem ki iku hemhem ki yan: monraige guru anak ne pummaha uk kuni guru ne ruwe ne gusu ne na.
Orowa, ne cise ta eci=rewsi wa ikore an aep ipe hemhem ki iku hemhem ki yan: monrayke kur anakne pummaha uk kuni kur ne ruwe ne kusu ne na.
Roukos 10.7B-9 §113X
7 Orowa, nei chisei ta echi reushi wa ikore an aep ibe hemhem ki iku hemhem ki yan: monraige guru anak ne pummaha uk kuni guru ne ruwe ne gusu ne na.
Orowa, ne cise ta eci=rewsi wa ikore an aep ipe hemhem ki iku hemhem ki yan: monrayke kur anakne pummaha uk kuni kur ne ruwe ne kusu ne na.
8 Orowa, iteki chisei pish no otta paye yan. Samata, nep machiya otta ne yakka echi ahup, aige, nei utara echi uina chiki, echi kotchaketa aande aep ibe yan;
Orowa, iteki cise pisno or ta paye yan. Sama ta, nep maciya or ta ne yakka eci=ahup, ayke, ne utar eci=uyna ciki, eci=kotcake ta a=ante aep ipe yan;
9 orowa, nei machiya otta okai tashum ki utara iwangere wa otta ene itak yan :— Kamui moshiri anak ne echi koehange no ek ruwe ne, ani itak.
orowa, ne maciya or ta okay tasum ki utar iwankere wa or ta ene itak yan :— Kamuy mosir anakne eci=koehanke no ek ruwe ne, ani itak.
Mattaios 10.14-15 §85II
14 Orowa, nen ne yakka echi uk shomoki no echi ye itak shomo nu yakun, nei chisei hene nei machiya hene orowa no echi ehopiru wa paye chiki, echi chikiri ush koponchi tuituye yan.
Orowa, nen ne yakka eci=uk somo ki no eci=ye itak somo nu yakun, ne cise hene ne maciya hene oro wano eci ehopiru wa paye ciki, eci=cikiri us koponci tuytuye yan.
15 Son no echi otta Ku ye, koipishi toho ta Sodom newa Gomoron kotan akore panakte-i anak ne nei kotan kasu no kasush kusu ne.
Sonno eci or ta Ku=ye, koypisi toho ta Sodom newa Gomoron kotan a=kore panakte hi anakne ne kotan kasuno kasus kusu ne.
Markos 6.11 §55II
11 Orowa, nep ushike ne yakka echi uk shomoki no shomo echi nu chiki, nei ushike orowa no echi paye koro, nei utara epeka no an paweteshu ne gusu echi chikiri pok ush koponchi tuituye yan, ari itak.
Orowa, nep usike ne yakka eci=uk somo ki no somo eci=nu ciki, ne usike oro wano eci=paye kor, ne utar epeka no an pawetesu ne kusu eci=cikiri pok us koponci tuytuye yan, ari itak.
Roukos 10.10-12 §114II
10 Koroka, nep machiya otta ne yakka echi ahup wa okai utara echi uina shomoki chiki; nei machiya un pararu otta echi soyumba wa ene itak yan :—
Korka, nep maciya or ta ne yakka eci=ahup wa okay utar eci=uyna somo ki ciki; ne maciya un pararu or ta eci=soyunpa wa ene itak yan :—
11 Chikoro chikiri ush echi koro machiya un koponchi poka echi epeka no chi piruba ruwe ne: yakka, Kamui moshiri ehange no ek an sekorʼambe echi eramu yan.
Ci=kor cikiri us eci=kor maciya un koponci poka eci=epeka no ci pirpa ruwe ne: yakka, Kamuy mosir ehanke no ek an sekor anpe eci=eramu yan.
12 Echi otta Ku ye :— Nei toho ta anak ne nei machiya kasu no Sodom kotan anak naa kashush no okai kusu ne.
Eci or ta Ku=ye :— Ne toho ta anakne ne maciya kasuno Sodom kotan anak naa kasus no okay kusu ne.
Mattaios 11.20-23B §108V
20 Orowa no, orota iyotta poron no kiroro an ikip iki machiya koro utara anak ne yaikokatpak shomoki gusu, Shinuma kosakayokara heashi hine ene itak-hi :—
Orowano, oro ta iyotta poronno kiroro an iki p iki maciya kor utar anakne yaykokatpak somo ki kusu, Sinuma kosakayokar heasi hine ene itak hi :—
21 Aa Korazin kotan, aeyaisambepokashbe e ne humi! Aa Betsaida kotan aeyaisambepokashbe e ne humi! Echi oshiketa Ku ki kiroro yupu ikip anak ne Turos kotan ta hene Sidon kotan ta hene akara yak anak ne, nei utara fushkone hai ani akara amip newa uina ani yaikokatpak kusu ne.
Aa Korazin kotan, aeyaysanpepokaspe e ne humi! Aa Betsayda kotan aeyaysanpepokaspe e ne humi! Eci=oske ta Ku=ki kiroro yupu iki p anakne Turos kotan ta hene Sidon kotan ta hene a=kar yakanak ne, ne utar huskone hay ani a=kar amip newa uyna ani yaykokatpak kusu ne.
22 Yakka echi otta Ku ye, koipishi toho ta Turos kotan newa Sidon kotan otta akore panakte-i anak ne, echi otta akorep kasu no kasush ne kusu ne.
Yakka eci or ta Ku=ye, koypisi toho ta Turos kotan newa Sidon kotan or ta a=kore panakte hi anakne, eci or ta a=kore p kasuno kasus ne kusu ne.
23 Aa Kapernaum kotan, eani anak ne kando pakno arikinde kusu ne ruwe he an? Hedes pakno aerange kusu ne: inambe gusu ne yakun, e oshiketa kiroro yupu an ikip anak ne Sodom kotan otta aki yak anak, nei kotan tane pakno an nangoro gusu ne.
Aa Kapernaum kotan, eani anakne kanto pakno a=rikinte kusu ne ruwe he an? Hedes pakno aeranke kusu ne: inanpe kusu ne yakun, e oske ta kiroro yupu an iki p anakne Sodom kotan or ta aki yakanak, ne kotan tane pakno an nankor kusu ne.
Roukos 10.13-15 §115V
13 Aa Korazin kotan, aeyaisambepokash humi! Aa Betsaida kotan, aeyaisambepokash humi! Inambe gusu ne yakun, echi otta Ku ki kirorope anak ne Tiros kotan newa Sidon kotan ta akara yak anak ne fushkotoi ta hai ani akara amip newa uina otta rok wa yaikokatpak kusu ne a an.
Aa Korazin kotan, aeyaysanpepokas humi! Aa Betsayda kotan, aeyaysanpepokas humi! Inanpe kusu ne yakun, eci or ta Ku=ki kirorope anakne Tiros kotan newa Sidon kotan ta a=kar yakanak ne huskotoy ta hay ani a=kar amip newa uyna or ta rok wa yaykokatpak kusu ne a an.
14 Koroka, koipishi ita anak ne eani kasu no Tiros newa Sidon kotan gusu naa kasush kusu ne.
Korka, koypisi hi ta anakne eani kasuno Tiros newa Sidon kotan kusu naa kasus kusu ne.
15 Orowa, eani, Kapernaum kotan, eani anak ne kando pakno aerikinde an kusu ne ya?
Orowa, eani, Kapernaum kotan, eani anakne kanto pakno aerikinte an kusu ne ya?
Markos 9.37B §96I
37 Nen ne yakka Ku reihei rengap gusu tap korachi an pon guru uk gurʼanak ne En uk ruwe ne: orowa, nen ne yakka En uk gurʼanak ne En uk shomoki koroka En omandep uk ruwe ne, ari itak.
Nen ne yakka Ku=rehe renkap kusu tap koraci an pon kur uk kur anakne En=uk ruwe ne: orowa, nen ne yakka En=uk kur anakne En=uk somo ki korka En omantep uk ruwe ne, ari itak.
Roukos 10.16 §116I
16 Hedes pakno e range an kusu ne na. Echi nu guru anak ne En nu ruwe ne; orowa, echi emaka gurʼanak En emaka ruwe ne; orowa; En emaka guru anak ne En omande guru ne yakka emaka ruwe ne na.
Hedes pakno e ranke an kusu ne na. Eci=nu kur anakne En=nu ruwe ne; orowa, eci=emaka kur anak En=emaka ruwe ne; orowa; En=emaka kur anakne En=omante kur ne yakka emaka ruwe ne na.
Yoannes 5.23B §40I
23 Son no son no echi otta Ku ye, Ku itak nu wa En omandep eishokoro guru anak ne ramma okere shomoki inotu koro, orowa, akoipishi shomoki, koroka, rai-i orowa no paye wa inotu otta ahun nisa ruwe ne.
Sonno sonno eci or ta Ku=ye, Ku=itak nu wa En omantep eysokor kur anakne ramma okere somo ki inotu kor, orowa, akoypisi somo ki, korka, ray hi oro wano paye wa inotu or ta ahun nisa ruwe ne.
Yoannes 12.44-45 §111I
44 Orowa, Yesu hawe ashte wa ene itak-hi :— En eishokoro gurʼanak ne En eishokoro shomoki, koroka, En omandep eishokon ruwe ne.
Orowa, Yesu hawe aste wa ene itak hi :— En=eysokor kur anakne En=eysokor somo ki, korka, En omantep eysokor ruwe ne.
45 Samata, En nukara gurʼanak ne En omandep nukan ruwe ne.
Sama ta, En=nukar kur anakne En omantep nukar ruwe ne.
Yoannes 13.20 §120I
20 Son no, son no, echi otta Ku ye, nen ne yakka Ku omande guru uk gurʼanak ne En uk ruwe ne; orowa, En uk gurʼanak ne En omandep uk ruwe ne.
Sonno, sonno, eci or ta Ku=ye, nen ne yakka Ku=omante kur uk kur anakne En=uk ruwe ne; orowa, En=uk kur anakne En omantep uk ruwe ne.
Yoannes 14.21B §129I
21 Ku ikashpaotte koro wa nei ambe shikkashima gurʼanak ne En omap gunʼne: orowa, En omap guru anak ne Ku Michi orowa no aomap kusu ne, orowa, Kuani anak shinuma omap wa otta yaikota Ku yainukara kusu ne na.
Ku=ikaspaotte kor wa ne anpe sikkasima kur anakne En=omap kunne: orowa, En=omap kur anakne Ku Mici oro wano a=omap kusu ne, orowa, Kuani anak sinuma omap wa or ta yaykota Ku yaynukara kusu ne na.
Yoannes 14.24B-25 §131I
24 En omap shomoki guru anak ne Ku itak shikkashima shomoki ruwe ne: orowa, echi nu itak anak ne Ku korobe shomo ne, koroka, En omande Michi korobe ne ruwe ne.
En=omap somo ki kur anakne Ku=itak sikkasima somo ki ruwe ne: orowa, eci=nu itak anakne Ku=kor pe somo ne, korka, En=omante Mici kor pe ne ruwe ne.
25 Echi tura no Ku an rapoketa tap okaibe echi otta Ku ye nisa ruwe ne.
Eci turano Ku=an rapoketa tap okaype eci or ta Ku=ye nisa ruwe ne.
Roukos 10.17-20 §117X
17 Orowa, nei wa niu ikashima e ine hotne niu anak ne yaikopuntek hine hoshippa wa ene itak-hi :— Utarapa, nitne kamui poka E reihei gusu chi ki itak nu ruwe ne.
Orowa, ne wa niw ikasma e ine hotne niw anakne yaykopuntek hine hosippa wa ene itak hi :— Utarpa, nitne kamuy poka E rehe kusu ci ki itak nu ruwe ne.
18 Orota Shinuma ene itak-hi :— Satan anak ne imeru korachi kando orowa no ran shiri Ku nukan nisa.
Oro ta Sinuma ene itak hi :— Satan anakne imeru koraci kanto oro wano ran siri Ku=nukar nisa.
19 Ingarʼan, echi utara anak ne okokko newa sasori kata otereke kuni, samata, epokbap kiroro esapane kuni mondum echi kore ash nisa: awa, nep ne yakka son no newa echi ewende shomoki kusu ne.
Inkar=an, eci utar anakne okokko newa sasori kata oterke kuni, sama ta, epokpap kiroro esapane kuni montum eci=kore as nisa: awa, nep ne yakka sonno newa eci=e=wente somo ki kusu ne.
20 Koroka, tap ambe gusu, ramat utara echi ki itak nu gusu, iteki echi yaikopuntek yan; echi kon reihei anak ne kando oshiketa anuye wa okai gusu yaikopuntek yan.
Korka, tapanpe kusu, ramat utar eci=ki itak nu kusu, iteki eci=yaykopuntek yan; eci=kor rehe anakne kanto oske ta a=nuye wa okay kusu yaykopuntek yan.
Mattaios 11.25-26 §110V
25 Nei ita Yesu ese wa ene itak-hi :— Kando newa moshiri koro Utarapa ne Ku Michi, tan orushpe wayashnu utara newa oramush utara gusu nuina wa aiai otta nukare nisa ruwe ne gusu, Ku yaiiraige ash na:
Ne hi ta Yesu ese wa ene itak hi :— Kanto newa mosir kor Utarpa ne Ku Mici, tan oruspe wayasnu utar newa oramus utar kusu nuyna wa ayay or ta nukare nisa ruwe ne kusu, Ku=yayirayke as na:
26 ruwe ne wa, Michi, tap korachi E ki kuni ambe anak ne e esanniyop ne ruwe ne gusu ne na.
ruwe ne wa, Mici, tap koraci E ki kuni anpe anakne e esanniyop ne ruwe ne kusu ne na.
Roukos 10.21 §118V
21 Nei i pakita hita Shinuma anak ne Ashkanne Ramat ani nupetne, awa, ene itak-hi :— Kando newa moshiri Utarapa ne Ku Michihi, Aokai anak ne tap okaibe wayashnu utara newa ramu an utara wano nuina wa aiai otta nukare gusu Ku koyaiiraige ash na. Ruwe newa Michihi, tambe korachi an-i anak ne Aokai aesanniyop ne ruwe ne gusu ne na.
Ne i pakita hi ta Sinuma anakne Askanne Ramat ani nupetne, awa, ene itak hi :— Kanto newa mosir Utarpa ne Ku Micihi, Aokay anakne tap okaype wayasnu utar newa ramuan utar wano nuyna wa ayay or ta nukare kusu Ku=koyayirayke as na. Ruwe newa Micihi, tanpe koraci an hi anakne Aokay aesanniyop ne ruwe ne kusu ne na.
Mattaios 11.27A §111III
27 Nep ne yakka obitta Ku Michi orowa no A en koropare nisa ruwe ne: orowa Michi moshima Poho eramu an guru shinen ka isam: samata Poho newa koro Michi otta Poho nukare ainu moshima, Michi eramu an guru isam ruwe ne.
Nep ne yakka opitta Ku Mici oro wano A en=korpare nisa ruwe ne: orowa Mici mosma Poho eramuan kur sinen ka isam: sama ta Poho newa kor Mici or ta Poho nukare aynu mosma, Mici eramuan kur isam ruwe ne.
Mattaios 11.27B §112III
27 Nep ne yakka obitta Ku Michi orowa no A en koropare nisa ruwe ne: orowa Michi moshima Poho eramu an guru shinen ka isam: samata Poho newa koro Michi otta Poho nukare ainu moshima, Michi eramu an guru isam ruwe ne.
Nep ne yakka opitta Ku Mici oro wano A en=korpare nisa ruwe ne: orowa Mici mosma Poho eramuan kur sinen ka isam: sama ta Poho newa kor Mici or ta Poho nukare aynu mosma, Mici eramuan kur isam ruwe ne.
Roukos 10.22 §119III
22 Nep ne yakka Ku Michi wano a en koropare nisa ruwe ne; orowa, Poho anak ne nen ne ruwe he an sekoro eramʼan guru Michi moshima isam; samata, Michi anak ne nen ne ruwe he an sekoro eramʼan guru, Poho newa Poho ramuoshma wa otta eramʼande guru isam ruwe ne.
Nep ne yakka Ku Mici wano a en=korpare nisa ruwe ne; orowa, Poho anakne nen ne ruwe he an sekor eraman kur Mici mosma isam; sama ta, Mici anakne nen ne ruwe he an sekor eraman kur, Poho newa Poho ramuosma wa or ta eram ante kur isam ruwe ne.
Yoannes 3.35 §30III
35 Michi anak ne Poho omap wa nep ne yakka obitta koro teke orota omare nisa ruwe ne.
Mici anakne Poho omap wa nep ne yakka opitta kor teke oro ta omare nisa ruwe ne.
Yoannes 13.3A §114III
3 samata, koro tekehe otta Michi anak ne nep ne yakka koropare an, orowa, Shinuma Kamui orowa no ek hine Kamui orota oman sekoro eraman wa,
sama ta, kor tekehe or ta Mici anakne nep ne yakka korpare an, orowa, Sinuma Kamuy oro wano ek hine Kamuy oro ta oman sekor eraman wa,
Yoannes 16.15A §148III
15 Nep ne yakka obitta no Ku Michi korobe anak ne Ku korobe ne: tambe gusu, Shinuma Ku korobe uina wa echi nukare kusu ne, ani Ku ye nisa ruwe ne na.
Nep ne yakka opittano Ku Mici kor pe anakne Ku=kor pe ne: tanpe kusu, Sinuma Ku=kor pe uyna wa eci=nukare kusu ne, ani Ku=ye nisa ruwe ne na.
Yoannes 1.18 §8III
18 Hembara ne yakka Kamui nukan nisa guru isam, Michi upshoro ta an Shinen ne poho anak ne, Shinuma anak Kamui pita nisa ruwe ne.
Henpara ne yakka Kamuy nukar nisa kur isam, Mici upsoro ta an Sinen ne poho anakne, Sinuma anak Kamuy pita nisa ruwe ne.
Yoannes 5.37B §44III
37 Orowa, Shinuma koro itak anak ne echi oshiketa okai shomo ne; Shinuma omandep echi eishokoro shomoki nisa ruwe ne gusu ne na.
Orowa, Sinuma kor itak anakne eci=oske ta okay somo ne; Sinuma omantep eci=eysokor somo ki nisa ruwe ne kusu ne na.
Yoannes 6.46 §61III
46 Kamui orowa no ek guru moshima nen ne yakka Michi nukan nisa guru isam, Shinuma anak ne Michi nukan nisa ruwe ne.
Kamuy oro wano ek kur mosma nen ne yakka Mici nukar nisa kur isam, Sinuma anakne Mici nukar nisa ruwe ne.
Yoannes 7.28-29 §76III
28 Tambe gusu, Yesu anak ne Kamui kora kenru ta hawe sange wa epakashnu hine ene itak-hi :— Echi utara anak ne En eamkiri hemhem ki, nei wano Ku ekbe ne ya echi eramu hemhem ki; orowa, Kuani yaikota yai Ku omande shomoki, koroka, En omandep anak ne son no ambe ne, echi utara anak ne Shinuma eamkiri shomoki ruwe ne na.
Tanpe kusu, Yesu anakne Kamuy kor kenru ta hawe sanke wa epakasnu hine ene itak hi :— Eci utar anakne En=e=amkir hemhem ki, ne wano Ku=ek pe ne ya eci=eramu hemhem ki; orowa, Kuani yaykota yay Ku=omante somo ki, korka, En omantep anakne sonno anpe ne, eci utar anakne Sinuma e=amkir somo ki ruwe ne na.
29 Kuani Shinuma eamkiri; Kuani anak ne Shinuma orowa no Ku ek, orowa, Shinuma En omande nisa ruwe ne gusu ne na.
Kuani Sinuma e=amkir; Kuani anakne Sinuma oro wano Ku=ek, orowa, Sinuma En=omante nisa ruwe ne kusu ne na.
Yoannes 8.19B §87III
19 Tambe gusu, Shinuma otta nei utara ene itak-hi :— E koro Michi neita an ruwe? Yesu ene ese-hi :— Echi utara anak ne seenne En eamkiri hene ki, seenne Ku Michi eamkiri hene ki ruwe ne: echi En eamkiri chiki, Ku Michi ne yakka echi eamkiri kusu ne ap, ari itak.
Tanpe kusu, Sinuma or ta ne utar ene itak hi :— E=kor Mici ney ta an ruwe? Yesu ene ese hi :— Eci utar anakne seenne En=e=amkir hene ki, seenne Ku Mici e=amkir hene ki ruwe ne: eci En=e=amkir ciki, Ku Mici ne yakka eci=e=amkir kusu ne ap, ari itak.
Yoannes 10.15A §90III
15 Michi anak ne En eamkiri, Kuani anak Michi Ku eamkiri ukorachi ne na; orowa, hitsuji gusu Ku inotu Ku ande
Mici anakne En=e=amkir, Kuani anak Mici Ku=e=amkir ukoraci ne na; orowa, hitsuji kusu Ku=inotu Ku=ante
Yoannes 15.21B §142III
21 Koroka, nei utara anak ne En omandep eamkiri shomoki gusu Ku reihei rengap gusu obitta no okai tap okaibe echi otta ki kusu ne na.
Korka, ne utar anakne En omantep e=amkir somo ki kusu Ku=rehe renkap kusu opittano okay tap okaype eci or ta ki kusu ne na.
Yoannes 17.25A §154III
25 Aa oupeka an Michihi! Moshiri anak ne Aokai eamkiri shomoki, koroka, Kuani anak ne E eamkiri nisa ruwe ne; orowa, tan okai utara anak ne Aokai En omande sekorʼambe eraman nisa ruwe ne:
Aa owpeka an Micihi! Mosir anakne Aokay e=amkir somo ki, korka, Kuani anakne E e=amkir nisa ruwe ne; orowa, tan okay utar anakne Aokay En=omante sekor anpe eraman nisa ruwe ne:
Mattaios 13.16-17 §134V
16 Koroka, echi koro shikihi anak ne nukara gusu, echi koro kisara nu gusu anunuke ne.
Korka, eci=kor sikihi anakne nukar kusu, eci=kor kisara nu kusu a=nunuke ne.
17 Inambe gusu ne yakun, son no echi otta Ku ye, inne uweingara utara hene, inne oupeka utara ne yakka echi nukarabe nukan rusui a koroka, shomo nukara; echi nu ambe nu rusui a koroka, nu ka shomoki nisa ruwe ne.
Inanpe kusu ne yakun, sonno eci or ta Ku=ye, inne ueinkar utar hene, inne owpeka utar ne yakka eci=nukar pe nukar rusuy a korka, somo nukar; eci=nu anpe nu rusuy a korka, nu ka somo ki nisa ruwe ne.
Roukos 10.23-24 §120V
23 Orowa, koro koikara utara otta hosari wa arorokishne no ene itak-hi :— Echi nukara okaibe ingara echi shikihi anak ne anunuke ne:
Orowa, kor koykar utar or ta hosari wa arorkisneno ene itak hi :— Eci=nukar okaype inkar eci=sikihi anakne a=nunuke ne:
24 inambe gusu ne yakun, echi otta Ku ye, inne uweingara utara newa Moshiri shikkashima utara anak ne echi nukarabe nukan rusui, awa, nukara shomoki; orowa, echi nu okaibe nu rusui a koroka nu shomoki nisa ruwe ne na.
inanpe kusu ne yakun, eci or ta Ku=ye, inne ueinkar utar newa Mosir sikkasima utar anakne eci=nukar pe nukar rusuy, awa, nukar somo ki; orowa, eci=nu okaype nu rusuy a korka nu somo ki nisa ruwe ne na.
Mattaios 19.16-20 §193II
16 Orowa, ingarʼan, shine ainu Shinuma otta ek wa ene itak-hi :— Epakashnu guru, hembara pakno ne yakka isam shomoki inotu a en kore kuni ne, nekon a pirika ambe ku iki yak pirika ya?
Orowa, inkar=an, sine aynu Sinuma or ta ek wa ene itak hi :— Epakasnu kur, henpara pakno ne yakka isam somo ki inotu a en=kore kuni ne, nekona pirka anpe ku=iki yak pirka ya?
17 Orota Shinuma ene itak-hi :— Hemanda gusu pirika ambe gusu En orun uwepekennu ruwe he an? Pirika guru shinen an: koroka eani ishu-i orun ahun rusui chiki, ikashpaotte shikkashima yan.
Oro ta Sinuma ene itak hi :— Hemanta kusu pirka anpe kusu En=orun uwepekennu ruwe he an? Pirka kur sinen an: korka eani i=su hi orun ahun rusuy ciki, ikaspaotte sikkasima yan.
18 Nei guru, Inambe, ari itak ruwe ne.
Ne kur, Inanpe, ari itak ruwe ne.
19 Yesu ene itak-hi :— Iteki keuk yan, iteki omoinu koro yan, iteki ikka yan, iteki shunge paweteshu ki yan, e koro ona e koro unu ko-oripak yan; orowa, yai-omap korachi moshima an guru omap yan.
Yesu ene itak hi :— Iteki keuk yan, iteki omoynu kor yan, iteki ikka yan, iteki sunke pawetesu ki yan, e=kor ona e=kor unu ko-oripak yan; orowa, yay-omap koraci mosma an kur omap yan.
20 Orota nei upen ainu ene itak-hi :— Nei okaibe obitta ku shikkashima nisa ruwe ne; naa uhaita ushike an a?
Oro ta ne upen aynu ene itak hi :— Ne okaype opitta ku=sikkasima nisa ruwe ne; naa uhayta usike an a?
Markos 10.17-21A §107II
17 Orowa, Shinuma payekai korʼan ita, orota shine ainu hoyupu wa kotchaketa kokkaea hine ene itakhi :— Pirika epakashnu guru, kuani hembara pakno ne yakka shiokere shomoki inotu ku eikeshkoro kuni ne nekon a ku ki yak pirika ya? sekoro nu.
Orowa, Sinuma payekay kor an hi ta, oro ta sine aynu hoyupu wa kotcake ta kokkaea hine ene itak hi :— Pirka epakasnu kur, kuani henpara pakno ne yakka siokere somo ki inotu ku eykeskoro kuni ne nekona ku=ki yak pirka ya? sekor nu.
18 Orota Yesu ene itak-hi :— Hemanda gusu pirika ani En ye ya? Shinen moshima pirikap isama, nei ambe anak Kamui ne ruwe ne.
Oro ta Yesu ene itak hi :— Hemanta kusu pirka ani En=ye ya? Sinen mosma pirka p isam, ne anpe anak Kamuy ne ruwe ne.
19 Eani ikashpaotte eramʼan, Iteki keuk yan, Iteki omoinu koro yan, Iteki ikka yan, Iteki shunge paweteshu ki yan, Iteki iramisamka, E koro ona, newa unu ko-oripak yan, ari itak.
Eani ikaspaotte eraman, Iteki keuk yan, Iteki omoynu kor yan, Iteki ikka yan, Iteki sunke pawetesu ki yan, Iteki iramisamka, E=kor ona, newa unu ko-oripak yan, ari itak.
20 Orota nei guru ene itak-hi :— Epakashnu guru, pon ram orowa no tap okaibe obitta ku shikkashima nisa ruwʼe ne.
Oro ta ne kur ene itak hi :— Epakasnu kur, pon ram oro wano tap okaype opitta ku=sikkasima nisa ruwe ne.
21 Orowa, Yesu nei guru orun nukara wa omap ki, aine, orota ene itak-hi :— E haita ambe shinep an: e oman wa e korobe obitta ehok hine irapokkari guru otta koropare, yak anak ne kando oshiketa aeoteknup e koro kusu ne; orowa no ek wa En osh apkash yan, ari itak.
Orowa, Yesu ne kur orun nukar wa omap ki, ayne, oro ta ene itak hi :— E hayta anpe sinep an: e oman wa e=kor pe opitta e=hok hine irapokkari kur or ta korpare, yakanak ne kanto oske ta aeoteknup e=kor kusu ne; orowano ek wa En=os apkas yan, ari itak.
Roukos 10.25-28 §121II
25 Orowa, ingarʼan, shine ikashpaotte pita guru ash wa Shinuma koramnukara wa ene itak-hi :— Epakashnu guru, ramma okere shomoki inotu ku eikeshkoro kuni nekon a ku ki kusu ne ya.
Orowa, inkar=an, sine ikaspaotte pita kur as wa Sinuma koramnukar wa ene itak hi :— Epakasnu kur, ramma okere somo ki inotu ku eykeskoro kuni nekona ku=ki kusu ne ya.
26 Orota Shinuma ene itakhi :— Tuitak otta hemanda chi-eshinnuye wa an a?
Oro ta Sinuma ene itak hi :— Tuytak or ta hemanta ci-esinnuye wa an a?
27 Nekon a e orooitak ya? Nei guru ese wa ene itak-hi :— Sambe osshi wano hemhem, keutura osshi wano hemhem, kiroro an pakno hemhem, ramu an pakno hemhem, Utarapa ne e koro Kamui omap yan; orowa yaiomap korachi aota un guru ne yakka omap yan, ani itak.
Nekona e oroytak ya? Ne kur ese wa ene itak hi :— Sanpe ossi wano hemhem, kewtura ossi wano hemhem, kiroro an pakno hemhem, ramuan pakno hemhem, Utarpa ne e=kor Kamuy omap yan; orowa yayomap koraci a=o ta un kur ne yakka omap yan, ani itak.
28 Orota Shinuma ene itak-hi :— Aokai oupeka no ese itak nisa ruwe ne, tap korachi ki, yak anak ne eani ishu kusu ne na, ani itak.
Oro ta Sinuma ene itak hi :— Aokay owpekano ese itak nisa ruwe ne, tap koraci ki, yakanak ne eani i=su kusu ne na, ani itak.
Roukos 10.29-42 §122X
29 Koroka, nei guru anak ne yaikota yaioupekare rusui wa Yesu otta ene itak-hi :— Orowa, ku aota un guru nen ne ruwe he an?
Korka, ne kur anakne yaykota yayowpekare rusuy wa Yesu or ta ene itak hi :— Orowa, ku=a=o ta un kur nen ne ruwe he an?
30 Yesu ese wa ene itak-hi; — Shine ainu anak ne Yerusarem kotan wano Yeriko kotan orun san nisa ruwe ne; awa, ikka utara orowa no ashikkashima, aige, nei utara shinuma atusare wa shirikik,
Yesu ese wa ene itak hi; — Sine aynu anakne Yerusarem kotan wano Yeriko kotan orun san nisa ruwe ne; awa, ikka utar oro wano a=sikkasma, ayke, ne utar sinuma atusare wa sirkik,
31 orowa, ru-rai no ande wa paye nisa ruwe ne. Orowa no po, nei ru kari Kamui kora kenru esapane guru shinen oman; nei guru shinuma nukara chiki oyake un kush wa arapa.
orowa, ru-ray no ante wa paye nisa ruwe ne. Orowano po, ne ru kari Kamuy kor kenru esapane kur sinen oman; ne kur sinuma nukar ciki oyake un kus wa arpa.
32 Orowa, shui nei no korachi Rebi un guru nei ushike kari oman hine nukara koro oyake un kush wa oman nisa ruwe ne.
Orowa, suy néno koraci Rebi un kur ne usike kari oman hine nukar kor oyake un kus wa oman nisa ruwe ne.
33 Koroka, Samaria kotan un guru shinen payekai hine nei guru an ushiketa ek; awa, shinuma nukara chiki erampokiwen wa kore,
Korka, Samaria kotan un kur sinen payekay hine ne kur an uske ta ek; awa, sinuma nukar ciki eranpokiwen wa kore,
34 orowa, orota ek wa koro piri kata shum newa tonoto ota wa nei piri kokarakara nisa ruwe ne; samata, yaikota koro chikoikip kata ore hine yando chisei orun ani wa eyam no shikkashima nisa ruwe ne.
orowa, oro ta ek wa kor piri kata sum newa tonoto ota wa ne piri kokarkar nisa ruwe ne; sama ta, yaykota kor cikoykip kata ore hine yanto cise orun ani wa eyam no sikkasima nisa ruwe ne.
35 Orowa no, nei shimge toho ta tu denaria sange wa yando chisei kon nishpa otta kore wa ene itakhi :— Nei guru eyam no shikkashima; orowa, tambe kasu no e eiwange yak anak ne kuani ku hoshipi ita ku sange wa e kore ash kusu ne na,
Orowano, ne simke toho ta tu tenaria sanke wa yanto cise kor nispa or ta kore wa ene itak hi :— Ne kur eyam no sikkasima; orowa, tanpe kasuno e eywanke yakanak ne kuani ku=hosipi hi ta ku=sanke wa e kore as kusu ne na,
36 ani itak Tan ren tumugeta nei ikka utara orowa no ashikkashima ainu otta inan guru ka aota un guru ne ya? Nekon a e yainu ya? sekoro Yesu itak.
ani itak Tan ren tumke ta ne ikka utar oro wano a=sikkasma aynu or ta inan kur ka a=o ta un kur ne ya? Nekona e yaynu ya? sekor Yesu itak.
37 Orota nei guru ene itak-hi :— Irampokiwen wa kore guru ne, ani itak. Orota Yesu ene itak-hi :— Oman wa eani ne yakka nei no korachi kara yan, ani itak.
Oro ta ne kur ene itak hi :— Iranpokiwen wa kore kur ne, ani itak. Oro ta Yesu ene itak hi :— Oman wa eani ne yakka néno koraci kar yan, ani itak.
38 Orowa, nei utara payekai korʼan ita, shine kotan orun Shinuma ahun ruwe ne: awa, Maruta ani aye shine shiwentep anak ne koro chisei ta Shinuma reushire nisa ruwe ne.
Orowa, ne utar payekay kor an hi ta, sine kotan orun Sinuma ahun ruwe ne: awa, Maruta ani a=ye sine siwentep anakne kor cise ta Sinuma rewsire nisa ruwe ne.
39 Nei shiwentep otta Maria ani an reihei koro turesh-mat an ruwe ne, shinuma anak ne Utarapa koro chikiri samaketa a wa koro itak nu koro an nisa ruwe ne.
Ne siwentep or ta Maria ani an rehe kor tures-mat an ruwe ne, sinuma anakne Utarpa kor cikiri samake ta a wa kor itak nu kor an nisa ruwe ne.
40 Koroka, Maruta anak ne usaine okaibe gusu imontabirekashpa an; aige, shinuma Yesu otta ek wa ene itak-hi :— Utarapa, ku turesh-mat anak ne shinen ku ne po en yaishieiwangere shiri Aokai ramu-eunin ruwe? Tambe gusu shinuma en ikashui kuni ne kashpaotte wa en kore, ari itak.
Korka, Maruta anakne usayne okaype kusu imontapirekaspa an; ayke, sinuma Yesu or ta ek wa ene itak hi :— Utarpa, ku=tures-mat anakne sinen ku ne po en yaysieywankere siri Aokay ramu-ewnin ruwe? Tanpe kusu sinuma en=ikasuy kuni ne kaspaotte wa en=kore, ari itak.
41 Koroka, Utarapa, ese wa ene itak-hi :— Maruta, Maruta, eani anak ne inne okaibe gusu nishomap wa ramusarak ruwe ne; koroka, an kusu ne ap shinep an:
Korka, Utarpa, ese wa ene itak hi :— Maruta, Maruta, eani anakne inne okaype kusu nisomap wa ramusarak ruwe ne; korka, an kusu ne ap sinep an:
42 orowa, Maria anak ne orowa no auk shomoki pirika ushike numge nisa ruwe ne na.
orowa, Maria anakne oro wano auk somo ki pirka usike numke nisa ruwe ne na.