共観表
Yoannes 11.55B-12.1 §97X
55 Tambe gusu, nei utara Yesu hunara wa, Kamui kora kenru ta roshki kane, utashpa ene itak-hi :— Nekon a echi yainu? Shinuma marapto gusu ek kuni echi ramu ya?
Tanpe kusu, ne utar Yesu hunara wa, Kamuy kor kenru ta roski kane, utaspa ene itak hi :— Nekona eci=yaynu? Sinuma marapto kusu ek kuni eci=ramu ya?
56 Orowa no, Kamui kora kenru esapane utara newa Parisee un utara anak ne, nen ne kuru ka Shinuma an i eraman guru an yakun, akishima kuni ne orota nure, ani ikashpaotte nisa ruwe ne na.
Orowano, Kamuy kor kenru esapane utar newa Parisee un utar anakne, nen ne kur ka Sinuma an i eraman kur an yakun, a=kisma kuni ne oro ta nure, ani ikaspaotte nisa ruwe ne na.
12:1 Aige, Kamakush marapto iwan rereko etokota Yesu anak ne rai orowa no hetopo-shiknure Razaros an kotan Betania kotan orota ek nisa ruwe ne.
Ayke, Kamakus marapto iwan rerko etoko ta Yesu anakne ray oro wano hetopo-siknure Razaros an kotan Betania kotan oro ta ek nisa ruwe ne.
Mattaios 26.6-11 §276I
6 Orosama, Yesu anak ne Betania kotan un munin tashum ki Simon ani aye guru koto chisei ta an ita,
Orosama, Yesu anakne Betania kotan un munin tasum ki Simon ani a=ye kur koto cise ta an hi ta,
7 shine shiwentep shi no oro an no an shum o sei shintoko shinep koro wa ek hine, Shinuma a wa ibe rapoketa, koro sapa kashiketa ota nisa ruwe ne na.
sine siwentep sino oro an no an sum o sey sintoko sinep kor wa ek hine, Sinuma a wa ipe rapoketa, kor sapa kasike ta ota nisa ruwe ne na.
8 Koroka, koikara utara nei ambe nukara chiki irushka hine ene itak-hi :— Nep gusu tap akoisamka ambe an a?
Korka, koykar utar ne anpe nukar ciki iruska hine ene itak hi :— Nep kusu tap akoysamka anpe an a?
9 Tan shum ataye rui no aeihok wa irapokkari utara otta aeungeraite aeashkaibe ne ruwe ne gusu ne na, ari itak.
Tan sum ataye ruyno aeyhok wa irapokkari utar or ta aeunkerayte aeaskaype ne ruwe ne kusu ne na, ari itak.
10 Koroka, Yesu tambe eraman wa otta ene itak-hi :— Nep gusu, shiwentep echi ramusarakka ya? Shinuma En orun pirikap iki nisa ruwe ne gusu ne na.
Korka, Yesu tanpe eraman wa or ta ene itak hi :— Nep kusu, siwentep eci ramusarakka ya? Sinuma En=orun pirka p iki nisa ruwe ne kusu ne na.
11 Irapokkari utara anak ne ramma-kane echi tura no okai, koroka, Kuani anak ramina pakno shomo echi tura no an ruwe ne.
Irapokkari utar anakne ramma-kane eci turano okay, korka, Kuani anak ramina pakno somo eci turano an ruwe ne.
Mattaios 26.12-13 §277IV
12 Tan shiwentep Ku netobake kashiketa tan shum ota ambe anak ne iyurui orota a en omare kuni gusu etokooikire kusu nep ne.
Tan siwentep Ku=netopake kasike ta tan sum ota anpe anakne iyuruy oro ta a en=omare kuni kusu etokooykire kusu nep ne.
13 Son no echi otta Ku ye, ingi-moshiri ta tan pirika shongo aeupaskuma ita, nei ita anak tan shiwentep iki ikip shomo aoira kuni ne tan orushpe aye kusu ne na.
Sonno eci or ta Ku=ye, inki-mosir ta tan pirka sonko a=ewpaskuma hi ta, ne hi ta anak tan siwentep iki iki p somo a=oyra kuni ne tan oruspe a=ye kusu ne na.
Markos 14.3-7 §158I
3 Orosama, Shinuma Betania kotan un munin tashum ki Simon koro chisei otta an wa aep ibe rapoketa, shine shiwentep shi no ataye rui turu sak nardos shum o sei shintoko shinep koro wa ek, aige, nei ap pereke hine Shinuma sapa kata shum ota nisa ruwe ne.
Orosama, Sinuma Betania kotan un munin tasum ki Simon kor cise or ta an wa aep ipe rapoketa, sine siwentep sino ataye ruy tur sak nartos sum o sey sintoko sinep kor wa ek, ayke, ne ap perke hine Sinuma sapa kata sum ota nisa ruwe ne.
4 Koroka, utara tumugeta irushka utara okai wa ene itak-hi :—
Korka, utar tumke ta iruska utar okay wa ene itak hi :—
5 Nep gusu tan shum akoatcha an a? Tan shum anak ne ashikne hotne denaria ikashima shine wan hot denaria gusu aehok wa otek-sak guru otta aeungeraite eashkaibe ne, ani itak. Orowa, nei shiwentep kosakayo itak ki nisa ruwe ne.
Nep kusu tan sum a=koatca an a? Tan sum anakne asikne hotne tenaria ikasma sine wan hot tenaria kusu aehok wa otek-sak kur or ta aeunkerayte easkay pe ne, ani itak. Orowa, ne siwentep kosakayo itak ki nisa ruwe ne.
6 Koroka, Yesu ene itak-hi :— Nei shiwentep moshima no okai yan; nep gusu shinuma ramusarakka ya? Shinuma anak ne En otta pirika ikip ki nisa ruwe ne.
Korka, Yesu ene itak hi :— Ne siwentep mosmano okay yan; nep kusu sinuma ramusarakka ya? Sinuma anakne En or ta pirka iki p ki nisa ruwe ne.
7 Otek-sak utara ramma echi tura no okai gusu hembara ne yakka echi rengaine nei utara pirikare eashkai: koroka, Kuani anak ne ramma echi tura no an shomo ne ruwe ne.
otek-sak utar ramma eci turano okay kusu henpara ne yakka eci=renkayne ne utar pirkare easkay: korka, Kuani anakne ramma eci turano an somo ne ruwe ne.
Markos 14.8-9 §159IV
8 Nei shiwentep anak ne kara eashkai pakno ki: tushiri otta Ku netobake aomare gusu etokota kashiketa shum ota nisa ruwe ne.
Ne siwentep anakne kar easkay pakno ki: tusiri or ta Ku=netopake a=omare kusu etoko ta kasike ta sum ota nisa ruwe ne.
9 Orowa, son no echi otta Ku ye :— Ingi moshirʼebitta Pirika shongo eupaskuma an ushiketa tap tan shiwentep ikip anak ne aeshkarun kuni gusu aye kusu ne na, sekoro itak.
Orowa, sonno eci or ta Ku=ye :— Inki mosir epitta Pirka sonko ewpaskuma an uske ta tap tan siwentep iki p anakne a=eskarun kuni kusu a=ye kusu ne na, sekor itak.
Roukos 7.36-50 §74I
36 Orowa, shine Parisee un guru anak ne tura no ibe gusu kon rusui. Awa, Shinuma nei Parisee un guru kot chisei ta ahun wa ibe gusu a nisa ruwe ne.
Orowa, sine Parisee un kur anakne turano ipe kusu kor rusuy. Awa, Sinuma ne Parisee un kur kot cise ta ahun wa ipe kusu a nisa ruwe ne.
37 Orowa, ingarʼan nei machiya otta chikokatpak an shine shiwentep an; aige, Shinuma anak ne Parisee un guru kot chisei ta a wa ibe koro an sekorʼorushpe nu chiki, shum o sei shintoko koro wa ek, awa,
Orowa, inkar=an ne maciya or ta ci=kokatpak an sine siwentep an; ayke, Sinuma anakne Parisee un kur kot cise ta a wa ipe kor an sekor oruspe nu ciki, sum o sey sintoko kor wa ek, awa,
38 Shinuma chikiri oshmaketa ash, orowa, chish hine koro nupe ani koro kemaha teineika wa koro sapa otop ani piruba heashi, aine, koro kemaha poron no chopchopsekara wa kashiketa shum ota nisa ruwe ne.
Sinuma cikiri osmake ta as, orowa, cis hine kor nupe ani kor kemaha teyneyka wa kor sapa otop ani pirpa heasi, ayne, kor kemaha poronno copcopsekara wa kasike ta sum ota nisa ruwe ne.
39 Orowa, ibe guru Shinuma tak Parisee un guru nei ambe nukara chiki keutum oshiketa ye wa ene itak-hi :— Tan guru anak uweingara guru ne yakun, tane tomooshma shiwentep nekon a shiwentep ne ya? chikokatpak an gunʼ ne ruwe ne, sekorʼambe eramʼan nangora.
Orowa, ipe kur Sinuma tak Parisee un kur ne anpe nukar ciki kewtum oske ta ye wa ene itak hi :— Tan kur anak ueinkar kur ne yakun, tane tomoosma siwentep nekona siwentep ne ya? ci=kokatpak an kun' ne ruwe ne, sekor anpe eraman nankora.
40 Orota Yesu ese wa ene itak-hi :— Simon, e otta nepka Ku yep an. Epakashnu guru, ye wa en kore, ani shinuma itak ruwe ne.
Oro ta Yesu ese wa ene itak hi :— Simon, e or ta nep ka Ku yep an. Epakasnu kur, ye wa en=kore, ani sinuma itak ruwe ne.
41 Shine shohosere guru otta ashosere utara tun an: shinen anak ne ashikne hot ikashima tu shine wan hot denaria shosei, shinen anak wan e re hot denaria shosei wa an ruwe ne.
Sine sohosere kur or ta asosere utar tun an: sinen anakne asikne hot ikasma tu sine wan hot tenaria sos, sinen anak wan e re hot tenaria sos wa an ruwe ne.
42 Orowa, nei sho ataye kara kuni ichen sak ruwe an ita, shohosere guru anak ne nei tun honnere nisa ruwe ne. Tambe gusu, tan tun otta inan guru iyotta nei guru omap kusu ne ya?
Orowa, ne so ataye kar kuni icen sak ruwe an hi ta, sohosere kur anakne ne tun honnere nisa ruwe ne. Tanpe kusu, tan tun or ta inan kur iyotta ne kur omap kusu ne ya?
43 Simon ese wa ene itak-hi :— Poro shosei atusare guru nangoro kuni ku ramu. Orota Yesu ene itak-hi :— Aokai oupeka no esanniyo hawe ne, ani itak.
Simon ese wa ene itak hi :— Poro sos atusare kur nankor kuni ku=ramu. Oro ta Yesu ene itak hi :— Aokay owpekano esanniyo hawe ne, ani itak.
44 Orowa, shiwentep orun hosari hine Simon otta ene itak-hi :— Aokai tan shiwentep nukara ruwe he an? Kuani e kot chisei orun ahun, awa, Ku chikiri furaye kuni wakka e En kore shomoki: koroka, tan shiwentep anak koro nupe ani Ku chikiri teineika wa koro otop ani piruba nisa ruwe ne.
Orowa, siwentep orun hosari hine Simon or ta ene itak hi :— Aokay tan siwentep nukar ruwe he an? Kuani e kot cise orun ahun, awa, Ku=cikiri huraye kuni wakka e En=kore somo ki: korka, tan siwentep anak kor nupe ani Ku=cikiri teyneyka wa kor otop ani pirpa nisa ruwe ne.
45 Eani En chopchopsekara shomoki, koroka, Kuani tan chisei orun ahun orowa no tane pakno tan shiwentep Ku kemaha chopchopsekara koro an ruwe ne.
Eani En copcopsekara somo ki, korka, Kuani tan cise orun ahun oro wano tane pakno tan siwentep Ku=kemaha copcopsekara kor an ruwe ne.
46 Ku sapa kashike eani shum ota shomoki, koroka, tan shiwentep anak Ku chikiri kata shum ota nisa ruwe ne.
Ku=sapa kasike eani sum ota somo ki, korka, tan siwentep anak Ku=cikiri kata sum ota nisa ruwe ne.
47 Tambe gusu, e otta Ku ye, tan shiwentep koro chikokatpak inne ne a koroka atusare ruwe ne: shinuma poron no omap ki nisa ruwe ne gusu ne na; koroka, otta pon no patek atusare guru anak ne pon no patek omap ruwe ne.
Tanpe kusu, e or ta Ku=ye, tan siwentep kor ci=kokatpak inne ne a korka atusare ruwe ne: sinuma poronno omap ki nisa ruwe ne kusu ne na; korka, or ta ponno patek atusare kur anakne ponno patek omap ruwe ne.
48 Orowa, Shinuma nei shiwentep otta e koro katpak anak ne atusare wa an na, ari itak.
Orowa, Sinuma ne siwentep or ta e=kor katpak anakne atusare wa an na, ari itak.
49 Aige, ibe gusu tura no rok utara anak ne koro keutum ta, katpak poka tusare tan guru nen ne ruwe he an? ani itak heashi nisa ruwe ne.
Ayke, ipe kusu turano rok utar anakne kor kewtum ta, katpak poka tusare tan kur nen ne ruwe he an? ani itak heasi nisa ruwe ne.
50 Orowa, Shinuma nei shiwentep otta ene itak-hi :— E koro eishokor-i anak ne e kashiobiuki nisa ruwe ne, itomo kon no paye yan, ari itak nisa ruwe ne.
Orowa, Sinuma ne siwentep or ta ene itak hi :— E=kor eysokor hi anakne e kasiopiwki nisa ruwe ne, i=tom kor no paye yan, ari itak nisa ruwe ne.
Yoannes 12.2-8 §98I,IV
2 Nei kotan ta Shinuma gusu kunne-ibe akara; awa, Maruta anak ne yaishieiwangere nisa ruwe ne; koroka, Razaros anak ibe gusu Shinuma tura no a korʼan ruwe ne.
Ne kotan ta Sinuma kusu kunne-ipe a=kar; awa, Maruta anakne yaysieywankere nisa ruwe ne; korka, Razaros anak ipe kusu Sinuma turano a kor an ruwe ne.
3 Aine, Maria anak shi no oro an no an turu-sak nardos shum shine ikkin koro hine Yesu koro chikiri kashi-ota wa yaikota koro otop ani nei chikiri piruba nisa ruwe ne: orowa, nei hura chisei upshoro obitta etushnatki nisa ruwe ne.
Ayne, Maria anak sino oro an no an tur-sak nartos sum sine ikkin kor hine Yesu kor cikiri kasi-ota wa yaykota kor otop ani ne cikiri pirpa nisa ruwe ne: orowa, ne hura cise upsoro opitta etusnatki nisa ruwe ne.
4 Koroka, koro koikara utara tumugeta an Shinuma ekoshi kusu ne Kariot kotan un Youdas anak ne ene itak-hi :—
Korka, kor koykar utar tumke ta an Sinuma ekosi kusu ne Kariot kotan un Yowdas anakne ene itak hi :—
5 Hemanda gusu tan shum ashikne hotne denaria ikashima shine wan hotne denaria gusu aehok wa irapokkari utara otta akoropare shomoki ya? sekoro itak.
Hemanta kusu tan sum asikne hotne tenaria ikasma sine wan hotne tenaria kusu aehok wa irapokkari utar or ta a=korpare somo ki ya? sekor itak.
6 Nei guru anak ne irapokkari utara ramu-ehahge gusu tambe ye shomoki, koroka, shinuma ikka guru ne, orowa, shuop koro wa nei oshiketa aomare okaibe ani wa oman nisa ruwe ne.
Ne kur anakne irapokkari utar ramu-ehahke kusu tanpe ye somo ki, korka, sinuma ikka kur ne, orowa, suop kor wa ne oske ta a=omare okaype ani wa oman nisa ruwe ne.
7 Tambe gusu, Yesu ene itak-hi :— Moshima no okai yan, tushiri oro Ku aomare kuni toho gusu tan shiwentep nei no ki nisa ruwe ne.
Tanpe kusu, Yesu ene itak hi :— Mosmano okay yan, tusiri oro Ku=a=omare kuni toho kusu tan siwentep néno ki nisa ruwe ne.
8 Irapokkari utara ramma echi tura no okai, koroka, Kuani anak ramma echi tura no an shomo ne ruwe ne gusu ne na, ari itak.
Irapokkari utar ramma eci turano okay, korka, Kuani anak ramma eci turano an somo ne ruwe ne kusu ne na, ari itak.
Yoannes 12.9-11 §99X
9 Tambe gusu, Shinuma anak ne nei ushiketa an shiri Yudea un utara tumugeta okai use utara eraman; awa, ouse Yesu rengap gusu patek shomo ne, koroka, Shinuma rai orowa no shiknure Razaros nukara kuni gusu araki ruwe ne.
Tanpe kusu, Sinuma anakne ne uske ta an siri Yudea un utar tumke ta okay use utar eraman; awa, owse Yesu renkap kusu patek somo ne, korka, Sinuma ray oro wano siknure Razaros nukar kuni kusu arki ruwe ne.
10 Koroka, Kamui kora kenru esapane utara anak ne Razaros ne yakka raige kuni eukoramkoro;
Korka, Kamuy kor kenru esapane utar anakne Razaros ne yakka rayke kuni e=wkoramkor;
11 shinuma gusu inne utara paye wa Yesu eishokon nisa ruwe ne gusu ne na.
sinuma kusu inne utar paye wa Yesu eysokor nisa ruwe ne kusu ne na.
Mattaios 21.9 §209I
9 Orowa, Shinuma kotchaot paye inne utara hemhem, oshi araki utara hemhem hawe ashte wa ene itak-hi :— Dabid koro poho otta Hosanna an na; Utarapa reihei ani ek guru anak ne anunuke ne; iyotta rikun ushiketa Hosanna an na; ari itak.
Orowa, Sinuma kotcaot paye inne utar hemhem, osi arki utar hemhem hawe aste wa ene itak hi :— Dabid kor poho or ta Hosanna an na; Utarpa rehe ani ek kur anakne a=nunuke ne; iyotta rikun uske ta Hosanna an na; ari itak.
Markos 11.9-10 §119I
9 Orowa, Yesu kotchaot paye utara hemhem, nei osh araki utara hemhem, ene hawe ashte-hi :— Hosanna; Utarapa reihei ani ek gurʼanak ne anunuke ne:
Orowa, Yesu kotcaot paye utar hemhem, ne os arki utar hemhem, ene hawe aste hi :— Hosanna; Utarpa rehe ani ek kur anakne a=nunuke ne:
10 ek kushki moshiri, ek kushki akoro Michi Dabid korobe anunuke ne: iyotta rikun kando otta Hosanna an na, ari an hawe ani hawe ashte nisa ruwe ne.
ek kuski mosir, ek kuski a=kor Mici Dabid kor pe a=nunuke ne: iyotta rikun kanto or ta Hosanna an na, ari an hawe ani hawe aste nisa ruwe ne.
Roukos 19.37-38 §234I
37 Orowa, karange no ek wa Kanran-ush nupuri ran orogeta an ita, obitta no okai inne topaha un koikara utara anak ne nukara okere obitta no okai kiroro an ikip gusu yaikopuntek hine rui hau ani Kamui iramye heashi wa ene itak-hi :— Utarapa reihei ankushkerai ek Moshiri shikkashima gurʼanak ne anunuke ne:
Orowa, karankeno ek wa Kanran-us nupuri ran orke ta an hi ta, opittano okay inne topaha un koykar utar anakne nukar okere opittano okay kiroro an iki p kusu yaykopuntek hine ruy haw ani Kamuy iramye heasi wa ene itak hi :— Utarpa rehe an kuskeray ek Mosir sikkasima kur anakne a=nunuke ne:
38 Kando oshiketa itomo an, iyotta rik un ushiketa aeoripak ambe an na, ari itak.
Kanto oske ta i=tom an, iyotta rikun uske ta a=eoripak anpe an na, ari itak.
Yoannes 12.12-13 §100I
12 Nei shimge toho ta marapto gusu araki poro inne utara anak ne Yesu Yerusarem kotan ta ek kusu ne shiri nu chiki,
Ne simke toho ta marapto kusu arki poro inne utar anakne Yesu Yerusarem kotan ta ek kusu ne siri nu ciki,
13 shuro chikuni ni-tek koro wa ekanok gusu paye, orowa, itak sange hawe ene okai-hi :— Hosanna: Utarapa reihei ankushkerai ek Israeru un utara Shikkashima guru airamye an na, ari itak.
suro cikuni ni-tek kor wa ekanok kusu paye, orowa, itak sanke hawe ene okay hi :— Hosanna: Utarpa rehe an kuskeray ek Israeru un utar Sikkasima kur a=yramye an na, ari itak.
Mattaios 21.4-5 §207VII
4 Tapne aki katu anak ne, Sion matne po otta ene ye yan, Ingarʼan, e esapane guru anak ne ramu-rotcha, Roba newa roba poho ne pon roba Kashiketa o wa e otta ek ruwe ne,
Tapne aki katu anakne, Sion matnepo or ta ene ye yan, Inkar=an, e esapane kur anakne ramu-rotca, Roba newa ropa poho ne pon ropa Kasike ta o wa e or ta ek ruwe ne,
5 sekoro uweingara guru ani chi itakte itak auweomare kuni ne aki nisa ruwe ne na.
sekor ueinkar kur ani ci itakte itak a=ueomare kuni ne aki nisa ruwe ne na.
Yoannes 12.14-15 §101VII
14 Orowa, Yesu pon roba pa chiki kata o nisa ruwe ne; —
Orowa, Yesu pon ropa pa ciki kata o nisa ruwe ne; —
15 Zion matnepo iteki ishitoma yan, ingara, Aokai gusu an Moshiri shikkashima guru anak ne roba po kata o wa ek ruwe ne, chieshinnuye wa an korachi ne na.
Zion matnepo iteki isitoma yan, inkar, Aokay kusu an Mosir sikkasima kur anakne ropa po kata o wa ek ruwe ne, ciesinnuye wa an koraci ne na.
Yoannes 12.16-22 §102X
16 Koro koikara, utara anak ne atpaketa tap okaibe erampeutek: koroka, Yesu anak anupekte okaketa, nei ita anak ne tap okaibe Shinuma gusu chieshinnuye wa an shiri, samata, tap okaibe Yesu gusu iki nisa ruwe ne shiri, eshkarun nisa ruwe ne na.
Kor koykar, utar anakne atpake ta tap okaype eranpewtek: korka, Yesu anak anupekte okake ta, ne hi ta anakne tap okaype Sinuma kusu ciesinnuye wa an siri, sama ta, tap okaype Yesu kusu iki nisa ruwe ne siri, eskarun nisa ruwe ne na.
17 Shinuma anak ne tushiri orowa no Razaros hotuyekara wa soinere hine rai orowa no hetopo-shiknure ita tura no okai utara paweteshu ki nisa ruwe ne.
Sinuma anakne tusiri oro wano Razaros hotuyekar wa soynere hine ray oro wano hetopo-siknure hi ta turano okay utar pawetesu ki nisa ruwe ne.
18 Tan ikkewe an gusu ne yakka inne utara paye wa Shinuma ekanok ruwe ne. Shinuma anak tan shirosh iki nisa ruwe ne shiri nei utara nu okere ruwe ne gusu ne na.
Tan ikkewe an kusu ne yakka inne utar paye wa Sinuma ekanok ruwe ne. Sinuma anak tan siros iki nisa ruwe ne siri ne utar nu okere ruwe ne kusu ne na.
19 Tambe gusu, Parisee un utara anak ne utashpa ene uweitak-hi :— Echi utara nep ne yakka ki okaibe raka isambe shiri ingara yan; ingarʼan, moshirʼebitta nei osh paye nisa ruwe ne, ari itak.
Tanpe kusu, Parisee un utar anakne utaspa ene uweytak hi :— Eci utar nep ne yakka ki okaype raka i=sanpe siri inkar yan; inkar=an, mosir epitta ne os paye nisa ruwe ne, ari itak.
20 Orowa, marapto an ita ongami gusu hemespa utara tumugeta Herenes un utara okai; nei utara
Orowa, marapto an hi ta onkami kusu hemespa utar tumke ta Herenes un utar okay; ne utar
21 anak ne Gariraya moshiri ta an Betsaida kotan un Piripos otta araki hine nu wa ene itak-hi :—
anakne Gariraya mosir ta an Betsayda kotan un Piripos or ta arki hine nu wa ene itak hi :—
22 Nishpa, Yesu chi nukan rusui, ari itak. Piripos anak ne ek wa Andreas otta nure: orowa, Andreas newa Piripos anak araki wa Yesu nure nisa ruwe ne na.
Nispa, Yesu ci nukar rusuy, ari itak. Piripos anakne ek wa Andreas or ta nure: orowa, Andreas newa Piripos anak arki wa Yesu nure nisa ruwe ne na.
Mattaios 26.45-46 §299IV
45 Orowa, Shinuma anak ne koro koikara utara otta ek wa orota ene itak-hi :— Tane mokoro wa echi shini yan: ingarʼan, pakihi ehange no an ruwe ne, Ainu Poho anak ne katpak koro utara tekehe otta aekoshi wa an ruwe ne.
Orowa, Sinuma anakne kor koykar utar or ta ek wa oro ta ene itak hi :— Tane mokor wa eci=sini yan: inkar=an, pakihi ehanke no an ruwe ne, Aynu Poho anakne katpak kor utar tekehe or ta a=ekosi wa an ruwe ne.
46 Hopumba wa paye anro: ingarʼan, En ekoshi guru ehange no an ruwe ne.
Hopunpa wa paye an ro: inkar=an, En=ekosi kur ehanke no an ruwe ne.
Markos 14.41-42 §180IV
41 Orowa, Shinuma re shuine orota ek wa ene itak-hi :— Tane echi mokoro wa shini yan; pakno ne; pakihi ek wa an; ingara, Ainu Poho anak ne katpak koro utara koro teke otta aekoshi ruwe ne.
Orowa, Sinuma re suyne oro ta ek wa ene itak hi :— Tane eci=mokor wa sini yan; pakno ne; pakihi ek wa an; inkar, Aynu Poho anakne katpak kor utar kor teke or ta a=ekosi ruwe ne.
42 Hopuni wa paye anro, hetak, En ekoshi guru ehange no an ruwe ne, ani an itak ani itak nisa ruwe ne.
Hopuni wa paye an ro, hetak, En=ekosi kur ehanke no an ruwe ne, ani an itak ani itak nisa ruwe ne.
Yoannes 12.23 §103IV
23 Orota Yesu ese wa ene itak-hi :— Ainu Poho anupekte kuni pakihi ek an ruwe ne.
Oro ta Yesu ese wa ene itak hi :— Aynu Poho anupekte kuni pakihi ek an ruwe ne.
Yoannes 12.24 §104X
24 Son no, son no, echi otta Ku ye, munge piye num anak ne toi tumu hachiri wa munin shomoki yakun, yaikota shinep ne a an ruwe ne; koroka, munin yak anak ne poron no ibehe o ruwe ne.
Sonno, sonno, eci or ta Ku=ye, munke piye num anakne toy tumu hacir wa munin somo ki yakun, yaykota sinep ne a an ruwe ne; korka, munin yakanak ne poronno ipehe o ruwe ne.
Roukos 17.33 §211III
33 Nen ne yakka kon ramat eyaiepirikare kuni hunara guru anak ne nei ambe eyaiewende ruwe ne: koroka, nen ne yakka kon ramat eyaiewende gurʼanak ne nei ambe shiknure kusu ne na.
Nen ne yakka kor ramat eyayepirikare kuni hunara kur anakne ne anpe eyayewente ruwe ne: korka, nen ne yakka kor ramat eyayewente kur anakne ne anpe siknure kusu ne na.
Yoannes 12.25 §105III
25 Kon ramat omap gurʼanak ne nei ambe turainu ruwe ne; orowa, tap moshiri kata an wa kon ramat etunne gurʼanak ne ramma okere shomoki ishu-i otta nei ambe shikkashima kusu ne.
Kor ramat omap kur anakne ne anpe turaynu ruwe ne; orowa, tap mosir kata an wa kor ramat etunne kur anakne ramma okere somo ki i=su hi or ta ne anpe sikkasima kusu ne.
Yoannes 12.26A §106X
26 Nen ne yakka En gusu yaishieiwangere kuni ramu guru an yakun, En osh araki yan; Ku an ushiketa Ku goro uitek guru ne yakka nei ita an kusu ne; nen ne yakka En gusu yaishieiwangere guru an chiki, Ku Michi anak ne shinuma kooripak kusu ne na.
Nen ne yakka En kusu yaysieywankere kuni ramu kur an yakun, En=os arki yan; Ku=an uske ta Ku=kor uytek kur ne yakka ne hi ta an kusu ne; nen ne yakka En kusu yaysieywankere kur an ciki, Ku Mici anakne sinuma kooripak kusu ne na.
Mattaios 26.38 §293IV
38 Nei ita Shinuma nei utara otta ene itak-hi :— Ku ru rai pakno Ku keutum shiri yairamkoiki ruwe ne: teda echi tere wa En tura no shiruwande yan.
Ne hi ta Sinuma ne utar or ta ene itak hi :— Ku=ru ray pakno Ku=kewtum siri yayramkoyki ruwe ne: teta eci=tere wa En turano siruwante yan.
Markos 14.34 §174IV
34 Orowa, nei utara otta ene itak-hi :— Ku ru-rai pak no Ku keutum anak ne shiri yairamkoiki ruwe ne: teda echi okai wa shiruwe yan, sekoro itak.
Orowa, ne utar or ta ene itak hi :— Ku=ru-ray pakno Ku=kewtum anakne siri yayramkoyki ruwe ne: teta eci=okay wa siruwe yan, sekor itak.
Yoannes 12.26B-27A §107IV
26 Nen ne yakka En gusu yaishieiwangere kuni ramu guru an yakun, En osh araki yan; Ku an ushiketa Ku goro uitek guru ne yakka nei ita an kusu ne; nen ne yakka En gusu yaishieiwangere guru an chiki, Ku Michi anak ne shinuma kooripak kusu ne na.
Nen ne yakka En kusu yaysieywankere kuni ramu kur an yakun, En=os arki yan; Ku=an uske ta Ku=kor uytek kur ne yakka ne hi ta an kusu ne; nen ne yakka En kusu yaysieywankere kur an ciki, Ku Mici anakne sinuma kooripak kusu ne na.
27 Tane Ku ramat anak ne chiukopoye ruwe ne: Hemanda Ku ye kusu ne ya? Michi, tan pakihi En ohaitare wa En kore. Koroka, tambe gusu tan pakihi pakno Ku an.
Tane Ku=ramat anakne ci=wkopoye ruwe ne: Hemanta Ku=ye kusu ne ya? Mici, tan pakihi En ohaytare wa En=kore. Korka, tanpe kusu tan pakihi pakno Ku=an.
Yoannes 12.27B-38 §108X
27 Tane Ku ramat anak ne chiukopoye ruwe ne: Hemanda Ku ye kusu ne ya? Michi, tan pakihi En ohaitare wa En kore. Koroka, tambe gusu tan pakihi pakno Ku an.
Tane Ku=ramat anakne ci=wkopoye ruwe ne: Hemanta Ku=ye kusu ne ya? Mici, tan pakihi En ohaytare wa En=kore. Korka, tanpe kusu tan pakihi pakno Ku=an.
28 Michi, E reihei nupekte wa En kore, ari itak. Tambe gusu, kando orowa no hawe anu, Kuani anak ne nei ambe nupekte nisa ruwe ne, orowa kanna Ku nupekte kusu ne na, ene hawe anu.
Mici, E rehe nupekte wa En=kore, ari itak. Tanpe kusu, kanto oro wano hawe anu, Kuani anakne ne anpe nupekte nisa ruwe ne, orowa kanna Ku nupekte kusu ne na, ene hawe anu.
29 Samaketa roshki wa okai utara nei hawe nu chiki, Kamui-humi ash, sekoro itak: Orota Kamui hauturumbe itak nisa ruwe ne, ani ye utara okai.
Samake ta roski wa okay utar ne hawe nu ciki, Kamuy-humi as, sekor itak: Oro ta Kamuy hawturunpe itak nisa ruwe ne, ani ye utar okay.
30 Yesu ese wa, ene itak-hi :— En gusu tan hawe ek ka shomoki, echi utara gusu ek nisa ruwe ne.
Yesu ese wa, ene itak hi :— En kusu tan hawe ek ka somo ki, eci utar kusu ek nisa ruwe ne.
31 Tane anak ne tan moshiri koipishi an ruwe ne; tane anak ne tan moshiri un esapanep aoashinge kusu ne na.
Tane anakne tan mosir koypisi an ruwe ne; tane anakne tan mosir un e=sapanep a=oasinke kusu ne na.
32 Orowa, Kuani anak ne shiri wano a en ayange yakun, yaikota orun ingi-utara Ku nimba kusu ne na, ari itak.
Orowa, Kuani anakne siri wano a en=a=yanke yakun, yaykota orun inki utar Ku=ninpa kusu ne na, ari itak.
33 Koroka, tan itak ye katu anak ne nekon a rai katu ani ekot kusu ne i epeka no aye katu ne ruwe ne.
Korka, tan itak ye katu anakne nekona ray katu ani ekot kusu ne i epeka no a=ye katu ne ruwe ne.
34 Tambe gusu, inne utara Shinuma otta ene ese-hi :— Kiristo anak ne ramma an kusu ne shiri tuitak kata chi nu: awa, nekon a Ainu Poho ayange kusu ne ap sekoro E ye ya? Tan Ainu Poho nen ne ruwe he an?
Tanpe kusu, inne utar Sinuma or ta ene ese hi :— Kiristo anakne ramma an kusu ne siri tuytak kata ci nu: awa, nekona Aynu Poho a=yanke kusu ne ap sekor E ye ya? Tan Aynu Poho nen ne ruwe he an?
35 Tambe gusu, nei utara otta Yesu ene itak-hi :— Naa irukai pekere anak ne echi tumta an. Shirikunne echi oshkoni shomoki kuni gusu pekere echi koro rapoketa apkash yan; shirikunne ta apkash gurʼanak ne ine un oman shiri erampeutek ruwe ne.
Tanpe kusu, ne utar or ta Yesu ene itak hi :— Naa irukay peker anakne eci=tum ta an. Sirkunne eci=oskoni somo ki kuni kusu peker eci=kor rapoketa apkas yan; sirkunne ta apkas kur anakne ine un oman siri eranpewtek ruwe ne.
36 Pekere poho echi ne kuni gusu nei pekere echi otta an rapoketa, nei pekere eishokoro yan. Yesu tap okaibe ye okere koro, oman wa nei utara gusu yai-nuina nisa ruwe ne na.
Peker poho eci ne kuni kusu ne peker eci or ta an rapoketa, ne peker eysokor yan. Yesu tap okaype ye okere kor, oman wa ne utar kusu yay-nuyna nisa ruwe ne na.
37 Koroka, okai utara kotchaketa nei pakno shirosh ki a yakka Shinuma eishokoro shomoki nisa ruwe ne:
Korka, okay utar kotcake ta ne pakno siros ki a yakka Sinuma eysokor somo ki nisa ruwe ne:
38 tambe anak uweingara guru ne Isaya ye ene okai itak auweomare kuni gusu nep, Utarapa, chikoro shongo eishokoro guru nen ne ruwe? Inan guru otta Utarapa koro amunini anukare ruwe he an?
tanpe anak ueinkar kur ne Isaya ye ene okay itak a=ueomare kuni kusu nep, Utarpa, ci=kor sonko eysokor kur nen ne ruwe? Inan kur or ta Utarpa kor a=munin a=nukare ruwe he an?
Mattaios 13.13-15 §133I
13 Nei utara ingara wa nukara shomoki, inu wa nu ka shomoki, shui, ramepakari shomoki wa okai gusu tambe gusu itak-maukushte-itak ani Ku ye ruwe ne.
Ne utar inkar wa nukar somo ki, inu wa nu ka somo ki, suy, ramepakari somo ki wa okay kusu tanpe kusu itak-mawkuste-itak ani Ku=ye ruwe ne.
14 Inu wa echi nu, koroka, oara erampeutek; Ingara wa echi nukara, koroka, ramepakari ka shomoki: Tan utara anak ne shikihi ani shomo nukara, Kisara ani shomo nu,
Inu wa eci=nu, korka, oar eranpewtek; Inkar wa eci=nukar, korka, ramepakari ka somo ki: Tan utar anakne sikihi ani somo nukar, Kisara ani somo nu,
15 Keutum ani shomo eramʼan kuni, Aige, Ku iwangere gusu shomo hosari kuni ne Tan utara koro sambe nishte ne, Koro kisara ashpa ne, Shikihi shikkamuktek ne; sekoro uweingara guru Isaya koro uweingarape tan utara gusu auweomare ruwe ne na.
Kewtum ani somo eraman kuni, Ayke, Ku=iwankere kusu somo hosari kuni ne Tan utar kor sanpe niste ne, Kor kisara aspa ne, Sikihi sikkamuktek ne; sekor ueinkar kur Isaya kor uweinkarape tan utar kusu a=ueomare ruwe ne na.
Markos 4.11C-13 §37I
11 Orowa, orota Shinuma ene itak-hi :— Kamui moshiri gusu an anuina ambe anak ne echi otta akore; koroka, soita okai utara otta obitta no okaibe itak-maukushte-itak ani akan ruwe ne;
Orowa, oro ta Sinuma ene itak hi :— Kamuy mosir kusu an a=nuyna anpe anakne eci or ta a=kore; korka, soy ta okay utar or ta opittano okaype itak-mawkuste-itak ani a=kar ruwe ne;
12 ikineipeka nei utara iteki hosari wa atusare kuni ne, ingara wa nukara, yakka, ramepakare shomoki; inu wa nu, yakka, eramʼan shomoki ruwe ne gusu ne na. Orowa, orota Shinuma ene itak-hi :—
ikineypeka ne utar iteki hosari wa atusare kuni ne, inkar wa nukar, yakka, ramepakar somo ki; inu wa nu, yakka, eraman somo ki ruwe ne kusu ne na. Orowa, oro ta Sinuma ene itak hi :—
13 Tan itak-maukushte-itak echi eramʼan shomoki ruwe? Yakun, hemanda ani obitta no okai itak-maukushte-itak eramʼan kusu ne ya?
Tan itak-mawkuste-itak eci=eraman somo ki ruwe? Yakun, hemanta ani opittano okay itak-mawkuste-itak eraman kusu ne ya?
Roukos 8.10B §77I
10 moshiri gusu an anuinap eraman kuni-hi anak ne echi otta akore: koroka, moshima okai utara otta itak-maukushte-itak ani ayep ne; nei utara ingara, yakka, nukara shomoki, nu yakka, shomo eraman kuni gusu ne gusu ne na.
mosir kusu an anuynap eraman kuni hi anakne eci or ta a=kore: korka, mosma okay utar or ta itak-mawkuste-itak ani a=ye p ne; ne utar inkar, yakka, nukar somo ki, nu yakka, somo eraman kuni kusu ne kusu ne na.
Yoannes 12.39-40 §109I
39 Tambe gusu, nei utara anak ne eishokoro eaikap ruwe ne, orowa, Isaya shui ene ye ruwe ne gusu ne na,
Tanpe kusu, ne utar anakne eysokor eaykap ruwe ne, orowa, Isaya suy ene ye ruwe ne kusu ne na,
40 Shinuma anak ne nei utara koro shiki shik-nakte, koro sambe nishtere ruwe ne; Ikineipeka, shomo shiki ani nukara, keutum ani ramepakari, Orowa, hoshipi hine Nei utara Ku iwangere kuni gusu ne na.
Sinuma anakne ne utar kor siki sik-nakte, kor sanpe nistere ruwe ne; Ikineypeka, somo siki ani nukar, kewtum ani ramepakari, Orowa, hosipi hine Ne utar Ku=iwankere kuni kusu ne na.
Yoannes 12.41-43 §110X
41 Isaya anak ne Shinuma koro arakuru nukara gusu tan okaibe ye nisa ruwe ne: orowa, Shinuma gusu itak ki nisa ruwe ne na.
Isaya anakne Sinuma kor a=rakur nukar kusu tan okaype ye nisa ruwe ne: orowa, Sinuma kusu itak ki nisa ruwe ne na.
42 Yakka, esapane utara tumugeta okai inne utara anak Shinuma eishokon nisa ruwe ne; koroka, uwekarapa chisei orowa no iteki aemaka kuni ne Parisee un utara okai gusu eyaipushi shomoki ruwe ne;
Yakka, esapane utar tumke ta okay inne utar anak Sinuma eysokor nisa ruwe ne; korka, uekarpa cise oro wano iteki a=emaka kuni ne Parisee un utar okay kusu eyaypusi somo ki ruwe ne;
43 Kamui orowa no airamye kuni ambe kasu no ainu orowa no airamye kuni ambe omap nisa ruwe ne gusu ne na.
Kamuy oro wano a=yramye kuni anpe kasuno aynu oro wano a=yramye kuni anpe omap nisa ruwe ne kusu ne na.
Markos 9.37B §96I
37 Nen ne yakka Ku reihei rengap gusu tap korachi an pon guru uk gurʼanak ne En uk ruwe ne: orowa, nen ne yakka En uk gurʼanak ne En uk shomoki koroka En omandep uk ruwe ne, ari itak.
Nen ne yakka Ku=rehe renkap kusu tap koraci an pon kur uk kur anakne En=uk ruwe ne: orowa, nen ne yakka En=uk kur anakne En=uk somo ki korka En omantep uk ruwe ne, ari itak.
Roukos 10.16 §116I
16 Hedes pakno e range an kusu ne na. Echi nu guru anak ne En nu ruwe ne; orowa, echi emaka gurʼanak En emaka ruwe ne; orowa; En emaka guru anak ne En omande guru ne yakka emaka ruwe ne na.
Hedes pakno e ranke an kusu ne na. Eci=nu kur anakne En=nu ruwe ne; orowa, eci=emaka kur anak En=emaka ruwe ne; orowa; En=emaka kur anakne En=omante kur ne yakka emaka ruwe ne na.
Yoannes 12.44-45 §111I
44 Orowa, Yesu hawe ashte wa ene itak-hi :— En eishokoro gurʼanak ne En eishokoro shomoki, koroka, En omandep eishokon ruwe ne.
Orowa, Yesu hawe aste wa ene itak hi :— En=eysokor kur anakne En=eysokor somo ki, korka, En omantep eysokor ruwe ne.
45 Samata, En nukara gurʼanak ne En omandep nukan ruwe ne.
Sama ta, En=nukar kur anakne En omantep nukar ruwe ne.
Yoannes 12.46-13.1 §112X
46 En eishokoro guru anak ne iteki kunne-i ta oshiroma kuni gusu moshirʼotta ek pekere Ku ne ruwe ne.
En=eysokor kur anakne iteki kunne hi ta osiroma kuni kusu mosir or ta ek peker Ku ne ruwe ne.
47 Orowa, Ku ye orushpe nu wa nei ambe shikkashima shomoki guru an chiki, Kuani anak shinuma koipishi shomoki: inambe gusu ne yakun, moshiri koipishi gusu Ku ek ka shomo ne, moshiri kashiobiuki gusu Ku ek ruwe ne.
Orowa, Ku=ye oruspe nu wa ne anpe sikkasima somo ki kur an ciki, Kuani anak sinuma koypisi somo ki: inanpe kusu ne yakun, mosir koypisi kusu Ku=ek ka somo ne, mosir kasiopiwki kusu Ku=ek ruwe ne.
48 En emaka wa Ku ye orushpe koro shomoki guru gusu anak ne shine koipishi ki guru an: Ku ye okere itak anak ne nei ambe okese toho ta shinuma koipishi kusu ne na.
En=emaka wa Ku=ye oruspe kor somo ki kur kusu anakne sine koypisi ki kur an: Ku=ye okere itak anakne ne anpe okes toho ta sinuma koypisi kusu ne na.
49 Inambe gusu ne yakun, Kuani yaikota orowa no Ku ye shomoki; koroka, En omande Michi anak Ku ye kuni orushpe, Ku sange kuni itak, En ikashpaotte nisa ruwe ne.
Inanpe kusu ne yakun, Kuani yaykota oro wano Ku=ye somo ki; korka, En=omante Mici anak Ku=ye kuni oruspe, Ku=sanke kuni itak, En=ikaspaotte nisa ruwe ne.
50 Orowa, Shinuma ki ikashpaotte anak ne ramma okere shomoki ishu ambe ne sekoro Ku eraman: tambe gusu, orushpe Ku ye-hi anak Ku goro Michi En nure korachi nei ambe Ku ye ruwe ne.
Orowa, Sinuma ki ikaspaotte anakne ramma okere somo ki i=su anpe ne sekor Ku=eraman: tanpe kusu, oruspe Ku=ye hi anak Ku=kor Mici En=nure koraci ne anpe Ku=ye ruwe ne.
13:1 Nei Kamakush marapto etokota moshiri hoppa wa Michi orun oman kuni pakihi ek an shiri Yesu eraman, aige, moshiri otta okai yaikota korobe omap wa okese pakno omap nisa ruwe ne.
Ne Kamakus marapto etoko ta mosir hoppa wa Mici orun oman kuni pakihi ek an siri Yesu eraman, ayke, mosir or ta okay yaykota kor pe omap wa okes pakno omap nisa ruwe ne.