共観表
Mattaios 9.1-8 §70I
1 Orowa, Shinuma chip otta ahun; aige, atui tomotuye wa koro kotan orota ek nisa ruwe ne.
Orowa, Sinuma cip or ta ahun; ayke, atuy tomotuye wa kor kotan oro ta ek nisa ruwe ne.
2 Awa, utara anak ne hotke wa an tusushke tashum ki shine ainu Shinuma otta sei wa araki ruwe ne: orowa, Yesu nei utara koro eishokor-i nukara koro tusushke tashum ki guru otta ene itak-hi :— Poho, keutum ritetkere yan, e koro chikokatpak atusare ruwe ne gusu ne na.
Awa, utar anakne hotke wa an tususke tasum ki sine aynu Sinuma or ta sey wa arki ruwe ne: orowa, Yesu ne utar kor eysokor hi nukar kor tususke tasum ki kur or ta ene itak hi :— Poho, kewtum ritetkere yan, e=kor ci=kokatpak atusare ruwe ne kusu ne na.
3 Orowa, kambi-nuye utara tumugeta okai utara anak ne koro keutum ta, tan guru Kamui koatcha ruwe ne, ari itak.
Orowa, kampi-nuye utar tumke ta okay utar anakne kor kewtum ta, tan kur Kamuy koatca ruwe ne, ari itak.
4 Yesu nei utara yainu-hi eramu an wa ene itak-hi :— Hemanda gusu echi utara keutumu ta wen no echi yaikoshiramse ya?
Yesu ne utar yaynu hi eramuan wa ene itak hi :— Hemanta kusu eci utar kewtumu ta wenno eci yaykosiramse ya?
5 E koro chikokatpak atusare wa an sekoro itak ye, newa, e hopuni wa apkash, sekoro itak ye-hi anak ne, inambe ye katu isaika itak ne ruwe he an?
E=kor ci=kokatpak atusare wa an sekor itak ye, newa, e hopuni wa apkas, sekor itak ye hi anakne, inanpe ye katu isayka itak ne ruwe he an?
6 Koroka, Ainu Poho shiri kata an wa chikokatpak tusare mondum koro wa an ani ambe echi eramu an kuni gusu (tusushke tashum ki guru otta ene itak-hi:—) e hopuni hine e koro shotki chupu wa e uni un hoshipi, sekoro itak.
Korka, Aynu Poho siri kata an wa ci=kokatpak tusare montum kor wa an ani anpe eci=eramu an kuni kusu (tususke tasum ki kur or ta ene itak hi:—) e hopuni hine e=kor sotki cupu wa e uni un hosipi, sekor itak.
7 Orowa, nei guru hopuni wa koro chisei orun arapa nisa ruwe ne.
Orowa, ne kur hopuni wa kor cise orun arpa nisa ruwe ne.
8 Koroka, inne utara tap ambe nukara chiki ishitoma shiriki, orowa, tap korachi an mondum ainu otta koropare Kamui ko-oripak nisa ruwe ne na.
Korka, inne utar tapanpe nukar ciki isitoma siriki, orowa, tap koraci an montum aynu or ta korpare Kamuy ko-oripak nisa ruwe ne na.
Markos 2.1-12 §20I
1 Nei toho okaketa shui Shinuma Kapernaum machiya otta ahun chiki, Shinuma anak ne chisei ta an sekoro orushpe assuru aashte nisa ruwe ne.
Ne toho okake ta suy Sinuma Kapernaum maciya or ta ahun ciki, Sinuma anakne cise ta an sekor oruspe assuru a=aste nisa ruwe ne.
2 Awa, inne utara uwekarapa, naa chisei ahup eaikap pakno, apa samake katap okai eaikap pakno shiri-eshik ruwe ne: orowa, Shinuma nei utara otta itak ye nisa ruwe ne.
Awa, inne utar uekarpa, naa cise ahup eaykap pakno, apa samake katap okay eaykap pakno siri-esik ruwe ne: orowa, Sinuma ne utar or ta itak ye nisa ruwe ne.
3 Orowa, ine ainu shine tusushke tashum ki guru ani wa araki utara okai, awa, atura wa araki.
Orowa, ine aynu sine tususke tasum ki kur ani wa arki utar okay, awa, a=tura wa arki.
4 Aige, inne utara okai gusu ko-ehange no araki eaikap chiki, Shinuma an chisei kitai maka nisa ruwe re: nei ambe yaspa aokere yakun tusushke tashum ki guru kata hotke wa an atarabe range nisa ruwe ne.
Ayke, inne utar okay kusu ko-ehanke no arki eaykap ciki, Sinuma an cise kitay maka nisa ruwe re: ne anpe yaspa a=okere yakun tususke tasum ki kur kata hotke wa an a=tarap ranke nisa ruwe ne.
5 Orowa, Yesu nei utara koro eishokor i nukara wa tusushke tashum ki guru otta — Poho, e koro katpak atusare wa an ruwe ne; ari itak.
Orowa, Yesu ne utar kor eysokor i nukar wa tususke tasum ki kur or ta — Poho, e=kor katpak atusare wa an ruwe ne; ari itak.
6 Koroka, nei ushiketa rok wa okai kambi-nuye u ara tumugeta keutum ta upaore, aige, —
Korka, ne uske ta rok wa okay kampi-nuye u ar tumke ta kewtum ta upaore, ayke, —
7 Tan guru hemanda gusu nei no itak ya? Kamui koatcha ruwe ne: Shinen moshima, Kamui moshima katpak tusare eashkaibe nen ne ruwe? ari iki ruwe ne.
Tan kur hemanta kusunéno itak ya? Kamuy koatca ruwe ne: Sinen mosma, Kamuy mosma katpak tusare easkay pe nen ne ruwe? ari iki ruwe ne.
8 Koro ramat ani nani Yesu anak ne shinuma utara keutum oshiketa nei no okaibe upaore katu eramʼan koro, orota ene itak-hi: Hemanda gusu echi keutum ta tap okaibe echi upaore ya?
Kor ramat ani nani Yesu anakne sinuma utar kewtum oske ta néno okaype upaore katu eraman kor, oro ta ene itak hi: Hemanta kusu eci=kewtum ta tap okaype eci=upaore ya?
9 Tusushke tashum ki guru otta e koro katpak atusare wa an sekoro itak ye newa hopuni wa atarape ani wa apkash yan, sekoro itak ye anak ne, inambe ye itak katu isaika itak ne ruwe he an?
Tususke tasum ki kur or ta e=kor katpak atusare wa an sekor itak ye newa hopuni wa a=tarap ani wa apkas yan, sekor itak ye anakne, inanpe ye itak katu isayka itak ne ruwe he an?
10 Koroka, Ainu Poho shiri kata an wa katpak tusare mondum koro wa an ari ambe echi eramu an kuni gusu
Korka, Aynu Poho siri kata an wa katpak tusare montum kor wa an ari anpe eci=eramu an kuni kusu
11 (tusushke tashum ki guru otta ene itak-hi) e otta Ku ye, hopuni wa koro atarape ani wa e uni un oman yan, ari itak.
(tususke tasum ki kur or ta ene itak hi) e or ta Ku=ye, hopuni wa kor a=tarap ani wa e uni un oman yan, ari itak.
12 Orowa, nei guru hopuni hine nani atarape koro wa obitta no okai utara kotchaketa soine nisa ruwe ne; okai utara obitta oyamokte, orowa, Kamui ko oripak wa ene itak-hi :— Tambe nei no tane pakno naa shomo chi nukara ash nisa ruwe ne na, ari itak.
Orowa, ne kur hopuni hine nani a=tarap kor wa opittano okay utar kotcake ta soyne nisa ruwe ne; okay utar opitta oyamokte, orowa, Kamuy ko oripak wa ene itak hi :— Tanpe néno tane pakno naa somo ci nukar as nisa ruwe ne na, ari itak.
Roukos 5.18-26 §37I
18 Orowa no, utara anak ne shotki kata hotke wa an tusushke tashum ki guru shinen ani wa araki hine kotchaketa ande kuni gusu chisei otta ahunge rusui ruwe ne.
Orowano, utar anakne sotki kata hotke wa an tususke tasum ki kur sinen ani wa arki hine kotcake ta ante kuni kusu cise or ta ahunke rusuy ruwe ne.
19 Koroka, utara inne wa otta ahunge kuni ushike nukara shomoki gusu chisei kitaigeta hemesu wa atarape kata hotke wa an gusu rik orowa no Yesu kotchaketa range nisa ruwe ne.
Korka, utar inne wa or ta ahunke kuni usike nukar somo ki kusu cise kitayke ta hemesu wa a=tarap kata hotke wa an kusu rik oro wano Yesu kotcake ta ranke nisa ruwe ne.
20 Orowa koro eishokor-i Shinuma nukara chiki — Ainu, e koro chikokatpak atusare wa an na — ari itak.
Orowa kor eysokor hi Sinuma nukar ciki — Aynu, e=kor ci=kokatpak atusare wa an na — ari itak.
21 Tata otta, Parisee un utara newa kambi-nuye utara upaore heashi wa ene itak-hi :— Tan Kamui koatchap ye guru nen ne ya? Kamui moshima anak chikokatpak tusare eashkaibe inan guru ne ruwe he an? ani itak.
Tata or ta, Parisee un utar newa kampi-nuye utar upaore heasi wa ene itak hi :— Tan Kamuy koatcap ye kur nen ne ya? Kamuy mosma anak ci=kokatpak tusare easkay pe inan kur ne ruwe he an? ani itak.
22 Koroka, Yesu nei upaore ambe eramʼan wa orota ese wa ene itak-hi :— Nep gusu echi utara keutum ta upaore ki ya?
Korka, Yesu ne upaore anpe eraman wa oro ta ese wa ene itak hi :— Nep kusu eci utar kewtum ta upaore ki ya?
23 E koro chikokatpak atusare wa an sekorʼan itak ye newa e hopuni wa apkash yan sekorʼan itak ani ye ambe anak ne inambe ye katu isaika ruwe he an?
E=kor ci=kokatpak atusare wa an sekor an itak ye newa e hopuni wa apkas yan sekor an itak ani ye anpe anakne inanpe ye katu isayka ruwe he an?
24 Koroka, Ainu Poho shiri kata an wa chikokatpak tusare mondum koro wa an ani an ambe echi eramʼan kuni gusu (tusushke tashum ki guru otta ene itak-hi) — E otta Ku ye, hopuni wa koro atarape ani hine e uni un oman yan, ari itak.
Korka, Aynu Poho siri kata an wa ci=kokatpak tusare montum kor wa an ani an anpe eci=eraman kuni kusu (tususke tasum ki kur or ta ene itak hi) — E or ta Ku=ye, hopuni wa kor a=tarap ani hine e uni un oman yan, ari itak.
25 Tata otta nei guru anak ne nani utara kotchaketa hopuni wa kata hotke an ap ani wa Kamui ko-oripak hine koro uni ta oman nisa ruwe ne.
Tata or ta ne kur anakne nani utar kotcake ta hopuni wa kata hotke an ap ani wa Kamuy ko-oripak hine kor uni ta oman nisa ruwe ne.
26 Orowa no, nei utara obitta shi no enushkari wa Kamui ko-oripak ruwe ne; samata, earikinne ishitoma hine :— Tanto aehomatup chi nukan nisa ruwe ne na, ari itak.
Orowano, ne utar opitta sino enuskari wa Kamuy ko-oripak ruwe ne; sama ta, earikinne isitoma hine :— Tanto aehomatup ci nukar nisa ruwe ne na, ari itak.
Yoannes 5.1-10 §38I
1 Tap okaketa Yudea un guru koro marapto an; awa, Yesu anak ne Yerusarem kotan ta hemesu nisa ruwe ne.
Tap okake ta Yudea un kur kor marapto an; awa, Yesu anakne Yerusarem kotan ta hemesu nisa ruwe ne.
2 Yerusarem kotan ta hitsuji chikoikip apa samta ashikne ikushpe koro shine to an, nei ambe anak ne Hebrai an itak ani aye chiki Betesda ani aporosep ne ruwe ne.
Yerusarem kotan ta hitsuji cikoykip apa sam ta asikne ikuspe kor sine to an, ne anpe anakne Hebray an itak ani a=ye ciki Betesda ani aporosep ne ruwe ne.
3 Inne tashum ki utara, shiknak utara, hera utara, shipeshte utara tan ushiketa hotke wa okai nisa ruwe ne na.
Inne tasum ki utar, siknak utar, her utar, sipeste utar tan uske ta hotke wa okay nisa ruwe ne na.
4 Nei ita tupesan pa ikashima wan e tu hotne pa uturu tum-sak wa an guru an.
Ne hi ta tupesan pa ikasma wan e tu hotne pa uturu tum-sak wa an kur an.
5 Awa, Yesu anak ne shinuma hotke wa an shiri nukara chiki, samata, tane ohon no an shiri eraman koro, otta ene itak-hi :— Eani atumashnure rusui ruwe? ari itak.
Awa, Yesu anakne sinuma hotke wa an siri nukar ciki, sama ta, tane ohor no an siri eraman kor, or ta ene itak hi :— Eani atumasnure rusuy ruwe? ari itak.
6 Otta tashum ki guru ese wa ene itak-hi :— Nishpa, wakka amoimoyegere ita anak ne to oshiketa en omare kuni guru ku sak ruwe ne: koroka, kuani ku ek rapoketa en hoshiki no moshima an guru san ruwe ne.
Or ta tasum ki kur ese wa ene itak hi :— Nispa, wakka amoymoyekere hi ta anakne to oske ta en=omare kuni kur ku=sak ruwe ne: korka, kuani ku=ek rapoketa en=hoski no mosma an kur san ruwe ne.
7 Orota Yesu ene itak-hi :— Hopuni wa e koro atarape ani hine apkash yan, ari itak.
Oro ta Yesu ene itak hi :— Hopuni wa e=kor a=tarap ani hine apkas yan, ari itak.
8 Orowa, nani nei guru atumashnure wa koro atarape ani wa apkash nisa ruwe ne na.
Orowa, nani ne kur atumasnure wa kor a=tarap ani wa apkas nisa ruwe ne na.
9 Nei toho anak Shini toho ne ruwe ne. Tambe gusu, Yudea un utara anak ne aiwangere guru otta :— Shini toho ne ruwe ne, e koro atarape ani katu anak ne ikashpaotte oterekep ne ruwe ne.
Ne toho anak Sini toho ne ruwe ne. Tanpe kusu, Yudea un utar anakne aywankere kur or ta :— Sini toho ne ruwe ne, e=kor a=tarap ani katu anakne ikaspaotte oterekep ne ruwe ne.
10 Koroka, nei utara orota Shinuma ene ese-hi :— En tumashnure guru anak ne, nei guru anak, e koro atarape ani wa apkash yan, ani an itak ani en orun ye nisa ruwe ne, ari itak ruwe ne.
Korka, ne utar oro ta Sinuma ene ese hi :— En tumasnure kur anakne, ne kur anak, e=kor a=tarap ani wa apkas yan, ani an itak ani en=orun ye nisa ruwe ne, ari itak ruwe ne.
Mattaios 9.9 §71II
9 Yesu tewa no oman wa shirikush, aine, yaku etaye chisei otta a wa an Mattaios ani aye ainu nukara hine orota ene itak-hi :— En osh ek yan, Orowa, nei guru hopuni wa Shinuma osh oman nisa ruwe ne na.
Yesu tewano oman wa sirikus, ayne, yaku etaye cise or ta a wa an Mattayos ani a=ye aynu nukar hine oro ta ene itak hi :— En=os ek yan, Orowa, ne kur hopuni wa Sinuma os oman nisa ruwe ne na.
Markos 2.13-14 §21II
13 Shui, Shinuma atui sam un oman, aige, obitta no okai inne utara Shinuma orota araki, awa, Shinuma nei utara epakashnu nisa ruwe ne.
Suy, Sinuma atuy sam un oman, ayke, opittano okay inne utar Sinuma oro ta arki, awa, Sinuma ne utar epakasnu nisa ruwe ne.
14 Orowa, Shinuma shirikush an ita, Arupeus koro poho Rebi yaku-etaye ushiketa a wa an i nukara, awa, otta En osh ek yan, ani itak. Orowa, shinuma hopuni wa I osh oman nisa ruwe ne.
Orowa, Sinuma sirikus an hi ta, Arupeus kor poho Rebi yaku-etaye uske ta a wa an i nukar, awa, or ta En=os ek yan, ani itak. Orowa, sinuma hopuni wa I os oman nisa ruwe ne.
Roukos 5.27-28 §38II
27 Tap okaibe okere chiki Shinuma nei i orowa no oman ruwe ne; awa, Yaku ichen uk kuni chisei ta a wa an Yaku-etaye Rebi ani aye guru nukara; aige, orota :— En osh ek yan — ani itak.
Tap okaype okere ciki Sinuma ne i oro wano oman ruwe ne; awa, Yaku icen uk kuni cise ta a wa an Yaku-etaye Rebi ani a=ye kur nukar; ayke, oro ta :— En=os ek yan — ani itak.
28 Orowa, shinuma obitta no okaibe are wa hopuni hine Shinuma osh oman nisa ruwe ne.
Orowa, sinuma opittano okaype are wa hopuni hine Sinuma os oman nisa ruwe ne.
Mattaios 9.10-11 §72II
10 Orowa, Shinuma ibe gusu chisei ta a rapoketa, yaku etaye utara hene chikokatpak utara hene inne no Yesu newa koro koikara utara tura rok wa okai nisa ruwe ne.
Orowa, Sinuma ipe kusu cise ta a rapoketa, yaku etaye utar hene ci=kokatpak utar hene inne no Yesu newa kor koykar utar tura rok wa okay nisa ruwe ne.
11 Aige, Parisee un utara anak ne tap ambe nukara chiki nei koikara utara orun ene itak-hi :— Echi epakashnu guru nep gusu yaku etaye utara hemhem chikokatpak utara hemhem tura aep e ya? ari itak.
Ayke, Parisee un utar anakne tapanpe nukar ciki ne koykar utar orun ene itak hi :— Eci=epakasnu kur nep kusu yaku etaye utar hemhem ci=kokatpak utar hemhem tura aep e ya? ari itak.
Markos 2.15-16 §22II
15 Orowa shinuma koro chisei ta ibe gusu a wa an, aige, inne yaku-etaye utara newa chikokatpak utara Yesu newa koro koikara utara tura rok wa okai; nei utara inne wa Shinuma osh paye nisa ruwe ne gusu ne na.
Orowa sinuma kor cise ta ipe kusu a wa an, ayke, inne yaku-etaye utar newa ci=kokatpak utar Yesu newa kor koykar utar tura rok wa okay; ne utar inne wa Sinuma os paye nisa ruwe ne kusu ne na.
16 Parisee un utara koro kambi-nuye utara anak ne Shinuma chikokatpak utara newa yaku-etaye utara tura ibe katu nukara chiki koro koikara utara otta ene itak-hi :— Shinuma yaku-etaye utara newa chikokatpak utara tura ibe hemhem ki iku hemhem ki ruwe ne, ari itak.
Parisee un utar kor kampi-nuye utar anakne Sinuma ci=kokatpak utar newa yaku-etaye utar tura ipe katu nukar ciki kor koykar utar or ta ene itak hi :— Sinuma yaku-etaye utar newa ci=kokatpak utar tura ipe hemhem ki iku hemhem ki ruwe ne, ari itak.
Roukos 5.29-30 §39II
29 Orowa, Rebi anak ne koro chisei ta Shinuma gusu poro marapto kan ruwe ne: awa, inne topaha ne Yaku-etaye utara hemhem, moshima okai utara hemhem, tura no rok wa marapto ibe korʼan nisa ruwe ne.
Orowa, Rebi anakne kor cise ta Sinuma kusu poro marapto kan ruwe ne: awa, inne topaha ne Yaku-etaye utar hemhem, mosma okay utar hemhem, turano rok wa marapto ipe kor an nisa ruwe ne.
30 Aige, Parisee un utara newa koro kambi-nuye utara anak ne Shinuma koikara utara otta oromam wa ene itak-hi :— Hemanda gusu echi utara anak ne Yaku-etaye utara newa katpak koro utara tura ibe hemhem ki iku hemhem ki ya?
Ayke, Parisee un utar newa kor kampi-nuye utar anakne Sinuma koykar utar or ta oromam wa ene itak hi :— Hemanta kusu eci utar anakne Yaku-etaye utar newa katpak kor utar tura ipe hemhem ki iku hemhem ki ya?
Roukos 15.1-2 §186II
1 Orowa, obitta no okai Yaku-etaye utara hemhem, chikokatpak utara hemhem Shinuma nu gusu karange no araki korʼan ruwe ne.
Orowa, opittano okay Yaku-etaye utar hemhem, ci=kokatpak utar hemhem Sinuma nu kusu karankeno arki kor an ruwe ne.
2 Awa, Parisee un utara newa kambi-nuye utara newa oromam wa ene itak-hi :— Tan guru anak ne chikokatpak utara tura wa ukoiram no ibe ruwe ne, sekoro itak.
Awa, Parisee un utar newa kampi-nuye utar newa oromam wa ene itak hi :— Tan kur anakne ci=kokatpak utar tura wa ukoyram no ipe ruwe ne, sekor itak.
Mattaios 9.12-17 §73II
12 Koroka, Shinuma tap ambe nu chiki nei utara otta ene itak-hi :— Iwange no okai utara anak ne potara guru irannakka ruwe ne, ouse tashum koro utara patek kon rusui ruwe ne.
Korka, Sinuma tapanpe nu ciki ne utar or ta ene itak hi :— Iwanke no okay utar anakne potara kur irannakka ruwe ne, owse tasum kor utar patek kor rusuy ruwe ne.
13 Koroka, Kuani rampoken Ku kon rusui wa ayange kunip kon rusui shomoki na, sekorʼan itak ambe nekon a ikkewehe an itak ne ya? ani echi paye wa ramepakari yan: Kuani oupeka utara hotuyekara kuni gusu ek ka shomoki, katpak koro utara hotuyekara gusu Ku ek nisa ruwe ne gusu ne na.
Korka, Kuani ranpoken Ku=kor rusuy wa a=yanke kunip kor rusuy somo ki na, sekor an itak anpe nekona ikkewehe an itak ne ya? ani eci=paye wa ramepakari yan: Kuani owpeka utar hotuyekar kuni kusu ek ka somo ki, katpak kor utar hotuyekar kusu Ku=ek nisa ruwe ne kusu ne na.
14 Nei ita Yoannes koro koikara utara Shinuma orun araki wa ene itak-hi :— Chi utara hemhem Parisee un utara hemhem kanna-kanna shomo ramnu ki, koroka, e koro koikara utara shomo ramnu ki ka shomoki ambe anak ne inambe gusu ne ya? ari itak.
Ne hi ta Yoannes kor koykar utar Sinuma orun arki wa ene itak hi :— Ci utar hemhem Parisee un utar hemhem kanna-kanna somo ramnu ki, korka, e=kor koykar utar somo ramnu ki ka somo ki anpe anakne inanpe kusu ne ya? ari itak.
15 Orowa, Yesu nei utara otta ene itak-hi :— Tane matakore guru an rapoketa, nei marapto gusu an utara anak ne yaituwashkarap eashkai ruwe he an? Okaketa tane matakore guru auk toho ek kusu ne, nei ita shomo ramnu ki kusu ne na.
Orowa, Yesu ne utar or ta ene itak hi :— Tane matkore kur an rapoketa, ne marapto kusu an utar anakne yaytuwaskarap easkay ruwe he an? Okake ta tane matkore kur auk toho ek kusu ne, ne hi ta somo ramnu ki kusu ne na.
16 Chiworo-at ani fushko amip utapke guru isam: nei no ki yakun, autapke ambe anak ne fushko ambe orowa no yara,
Ciworo-at ani husko amip utapke kur isam: néno ki yakun, a=wtapke anpe anakne husko anpe oro wano yara,
17 orowa, nei yara ushike naa poro ne ruwe ne Shui, ashiri tonoto fushko kapu-pukuru ta omare guru isam: nei no ki yakun, pukuru patke wa tonoto echikiki, orowa, kapu-pukuru aisamka ruwe ne: koroka, ashiri tonoto anak ne ashiri kapu-pukuru ta aomare, yakun, tup ne kane akoro wa okai.
orowa, ne yara usike naa poro ne ruwe ne Suy, a=siri tonoto husko kapu-pukuru ta omare kur isam: néno ki yakun, pukuru patke wa tonoto ecikiki, orowa, kapu-pukuru a=ysamka ruwe ne: korka, a=siri tonoto anakne a=siri kapu-pukuru ta a=omare, yakun, tup ne kane a=kor wa okay.
Markos 2.17-22 §23II
17 Yesu tap ambe nu yakun nei utara otta ene itak-hi :— Iwange no okai utara anak ne potara guru irannakka, ouse tashum an guru patek kon rusui ruwe ne: Kuani anak ne oupeka utara hotuyekara gusu Ku ek ka shomoki, katpak koro utara Ku hotuyekara gusu Ku ek nisa ruwe ne na.
Yesu tapanpe nu yakun ne utar or ta ene itak hi :— Iwanke no okay utar anakne potara kur irannakka, owse tasum an kur patek kor rusuy ruwe ne: Kuani anakne owpeka utar hotuyekar kusu Ku=ek ka somo ki, katpak kor utar Ku=hotuyekar kusu Ku=ek nisa ruwe ne na.
18 Orowa, Yoannes koro koikara utara newa Parisee un utara koro koikara utara anak ne shomo ramnu ki korʼan, awa, Shinuma orun utara araki wa orota ene itak-hi :— Hemanda gusu Yoannes koro koikara utara newa Parisee un utara koro koikara utara shomo ramnu ki a koroka E koro koikara utara shomo ramnu ki ka shomoki ruwe he an?
Orowa, Yoannes kor koykar utar newa Parisee un utar kor koykar utar anakne somo ramnu ki kor an, awa, Sinuma orun utar arki wa oro ta ene itak hi :— Hemanta kusu Yoannes kor koykar utar newa Parisee un utar kor koykar utar somo ramnu ki a korka E=kor koykar utar somo ramnu ki ka somo ki ruwe he an?
19 Orota Yesu ene itak-hi :— Tane mat-ahupkara guru koro tumbu ta ahup utara anak ne nei mat-ahupkara guru an ita shomo ramnu ki eashkai ruwe he an? Tane mat-ahupkara guru anak ne utara tura no an rapoketa shomo ramnu ki eaikap ruwe ne na.
Oro ta Yesu ene itak hi :— Tane mat-ahupkar kur kor tumpu ta ahup utar anakne ne mat-ahupkar kur an hi ta somo ramnu ki easkay ruwe he an? Tane mat-ahupkar kur anakne utar turano an rapoketa somo ramnu ki eaykap ruwe ne na.
20 Koroka, nei mat-ahupkara guru auk toho ek kusu ne, nei toho ta utara shomo ramnu ki kusu ne na.
Korka, ne mat-ahupkar kur auk toho ek kusu ne, ne toho ta utar somo ramnu ki kusu ne na.
21 Chiworo-at ani fushko amip utapke guru isam; nei no ki yakun autapke ashiribe anak ne fushko ambe orowa no yara, orowa, nei yara ushike naa aporore ruwe ne.
Ciworo-at ani husko amip utapke kur isam; néno ki yakun a=wtapke a=siripe anakne husko anpe oro wano yara, orowa, ne yara usike naa a=porore ruwe ne.
22 Shui, ashiri tonoto fushko kapu pukuru ta omare guru isam: nei no ki yakun tonoto anak ne pukuru patkere, orowa, tonoto newa pukuru aisamka ruwe ne: koroka, ashiri tonoto ashiri kapu pukuru orota aomare ruwe ne.
Suy, a=siri tonoto husko kapu pukuru ta omare kur isam: néno ki yakun tonoto anakne pukuru patkere, orowa, tonoto newa pukuru a=ysamka ruwe ne: korka, a=siri tonoto a=siri kapu pukuru oro ta a=omare ruwe ne.
Roukos 5.31-39 §40II
31 Orota Yesu ese wa ene itak-hi :— Iwange no okai utara anak ne potara guru irannakka ne, ouse tashum an guru patek potara guru kon rusui ruwe ne.
Oro ta Yesu ese wa ene itak hi :— Iwanke no okay utar anakne potara kur irannakka ne, owse tasum an kur patek potara kur kor rusuy ruwe ne.
32 Kuani anak ne oupeka utara yaikokatpakte gusu Ku ek ka shomoki, katpak koro utara yaikokatpakte kuni gusu Ku ek nisa ruwe ne na, ari itak.
Kuani anakne owpeka utar yaykokatpakte kusu Ku=ek ka somo ki, katpak kor utar yaykokatpakte kuni kusu Ku=ek nisa ruwe ne na, ari itak.
33 Orota nei utara ene itak-hi :— Yoannes koro koikara utara anak ne kanna-kanna shomo ramnu hene ki, inonno itak hene ki ruwe ne; Parisee un utara koro koikara utara ne yakka nei no ki ruwe ne; koroka, E koro koikara utara anak ibe hemhem ki iku hemhem ki wa okai ruwe ne.
Oro ta ne utar ene itak hi :— Yoannes kor koykar utar anakne kanna-kanna somo ramnu hene ki, inonno itak hene ki ruwe ne; Parisee un utar kor koykar utar ne yakka néno ki ruwe ne; korka, E=kor koykar utar anak ipe hemhem ki iku hemhem ki wa okay ruwe ne.
34 Orota Yesu ene itak-hi :— Mat-ahupkara guru an rapoketa tura no okai ikatairotke utara shomo ibe shomo iku kuni kire eashkai ruwe he an?
Oro ta Yesu ene itak hi :— Mat-ahupkar kur an rapoketa turano okay ikatayrotke utar somo ipe somo iku kuni kire easkay ruwe he an?
35 Koroka, nei mat-ahupkara guru auk toho ek, nei toho ta shinuma utara shomo ibe shomo iku hemhem ki kusu ne na.
Korka, ne mat-ahupkar kur auk toho ek, ne toho ta sinuma utar somo ipe somo iku hemhem ki kusu ne na.
36 Orowa, Shinuma nei utara otta shine itak-maukushte-itak ne yakka ye nisa ruwe ne. Ashiri amip orowa no humihi mesu wa ani fushko anrip otta utapke guru isam ruwe ne, nei no ki yak anak ne ashiri anrip mesu, naa samata, ashiripe anak ne fushkop gusu oupak shomo ne ruwe ne.
Orowa, Sinuma ne utar or ta sine itak-mawkuste-itak ne yakka ye nisa ruwe ne. A=siri amip oro wano humihi mesu wa ani husko anrip or ta utapke kur isam ruwe ne, néno ki yakanak ne a=siri anrip mesu, naa sama ta, a=siripe anakne husko p kusu owpak somo ne ruwe ne.
37 Orowa, fushko kapubukuru orota ashiri tonoto omare guru isam, nei no ki yak anak ne ashiri tonoto pukuru patke, orowa, tonoto aohetu, pukuru ne yakka awende kusu ne.
Orowa, husko kapupukuru oro ta a=siri tonoto omare kur isam, néno ki yakanak ne a=siri tonoto pukuru patke, orowa, tonoto a=ohetu, pukuru ne yakka awente kusu ne.
38 Koroka, ashiri tonoto ashiri kapu-pukuru otta aomare kusu ne ap ruwe ne.
Korka, a=siri tonoto a=siri kapu-pukuru or ta a=omare kusu ne ap ruwe ne.
39 Orowa, hekai tonoto iku guru anak ne ashiripe kon rusui shomoki: hekaibe pirika ruwe ne, ari nei guru ye ruwe ne gusu ne na.
Orowa, hekay tonoto iku kur anakne a=siripe kor rusuy somo ki: hekaype pirka ruwe ne, ari ne kur ye ruwe ne kusu ne na.
Mattaios 9.18-26 §74II
18 Shinuma tan okai itak nei utara otta ye rapoketa, ingarʼan, shine sapane guru ek wa ongami hine ene itak-hi :— Ku matnepo tane poka rai etokooiki wa an: koroka, Aokai ek wa kashiketa tekehe ande wa en kore, yak anak ne shiknu kusu ne, sekoro itak.
Sinuma tan okay itak ne utar or ta ye rapoketa, inkar=an, sine sapanekur ek wa onkami hine ene itak hi :— Ku=matnepo tane poka ray etokooyki wa an: korka, Aokay ek wa kasike ta tekehe ante wa en=kore, yakanak ne siknu kusu ne, sekor itak.
19 Orowa, Yesu hopuni wa koikara utara tura no nei guru osh oman ruwe ne.
Orowa, Yesu hopuni wa koykar utar turano ne kur os oman ruwe ne.
20 Orowa, ingarʼan, tu pa ikashima, wan pa kemnu tashum ki shiwentep Yesu oshmaketa ek wa koro anrip chingi tomooshma nisa ruwe ne,
Orowa, inkar=an, tu pa ikasma, wan pa kemnu tasum ki siwentep Yesu osmake ta ek wa kor anrip cinki tomoosma nisa ruwe ne,
21 inambe gusu ne yakun, Shinuma mipi ouse tomooshma yak ne a en kaobiuki kusu ne, ani keutum ta yainu nisa ruwe ne gusu ne na.
inanpe kusu ne yakun, Sinuma mipi owse tomoosma yakne a en kaopiwki kusu ne, ani kewtum ta yaynu nisa ruwe ne kusu ne na.
22 Koroka, Yesu hosari wa nei shiwentep nukara hine ene itak-hi :— Matkachi, keutum ratchire, e koro eishokoro i anak ne e kashiobiuki nisa ruwe ne na, sekoro itak. Aige, nani nei shiwentep kaobiuki wa an ruwe ne na.
Korka, Yesu hosari wa ne siwentep nukar hine ene itak hi :— Matkaci, kewtum ratcire, e=kor eysokor i anakne e kasiopiwki nisa ruwe ne na, sekor itak. Ayke, nani ne siwentep kaopiwki wa an ruwe ne na.
23 Orowa, Yesu nei sapane guru uni ta ahun chiki, top rekte utara newa inne utara sakayo hau nukara koro anak ne ene itak-hi: —
Orowa, Yesu ne sapanekur uni ta ahun ciki, top rekte utar newa inne utar sakayo haw nukar kor anakne ene itak hi: —
24 Makta paye yan: matkachi rai shiri shomo ne, ouse mokon ruwe ne, ani itak. Aige, nei utara emina esapse nisa ruwe ne na.
Makta paye yan: matkaci ray siri somo ne, owse mokor ruwe ne, ani itak. Ayke, ne utar emina esapse nisa ruwe ne na.
25 Koroka, inne utara asoyumbare okaketa, Shinuma ahun wa nei matkachi koro teke kishima; awa,
Korka, inne utar asoyunpare okake ta, Sinuma ahun wa ne matkaci kor teke kisma; awa,
26 matkachi hopuni nisa ruwe ne na. Nei assuruhu anak ne nei kotan ebitta shipirasa nisa ruwe ne.
matkaci hopuni nisa ruwe ne na. Ne assuruhu anakne ne kotan epitta sipirasa nisa ruwe ne.
Markos 5.21-43 §49II
21 Orowa, Yesu chip o wa shui ikushun atui tomotuye chiki poro inne utara Shinuma otta uwekarapa: awa, Shinuma anak ne atui samta an ruwe ne.
Orowa, Yesu cip o wa suy i=kusun atuy tomotuye ciki poro inne utar Sinuma or ta uekarpa: awa, Sinuma anakne atuy sam ta an ruwe ne.
22 Aige, Yairos ani an reihei koro, Uwekarapa chisei esapane shine ainu ek hine Yesu nukara koro, kema samaketa hachiri, aine, koramkoro wa ene itak-hi :—
Ayke, Yayros ani an rehe kor, Uekarpa cise esapane sine aynu ek hine Yesu nukar kor, kema samake ta hacir, ayne, koramkor wa ene itak hi :—
23 Ku pon matkachi rai ehange ruwe ne: shinuma kashi-a-obiuki wa ashiknure kuni gusu ek wa kashiketa tekehe ande wa en kore, ari itak.
Ku=pon matkaci ray ehanke ruwe ne: sinuma kasi-a-opiwki wa a=siknure kuni kusu ek wa kasike ta tekehe ante wa en=kore, ari itak.
24 Orowa, nei guru tura Shinuma oman; aige, inne utara nei osh paye wa Shinuma eukonumba nisa ruwe ne.
Orowa, ne kur tura Sinuma oman; ayke, inne utar ne os paye wa Sinuma ewkonunpa nisa ruwe ne.
25 Orowa, tu pa ikashima wan pa kemnu tashum
Orowa, tu pa ikasma wan pa kemnu tasum
26 ki wa inne potara guru gusu poron no aiuninkare,
ki wa inne potara kur kusu poronno ayuninkare,
27 orowa, korobe obitta eiwangere, yakka, apirikare shomo ne no, koroka, naa tashum yupke shine shiwentep Yesu gusu an orushpe nu chiki Shinuma oshmaketa okai inne utara tumugeta ek hine koro amip tomooshma nisa ruwe ne.
orowa, kor pe opitta eywankere, yakka, a=pirkare somo ne no, korka, naa tasum yupke sine siwentep Yesu kusu an oruspe nu ciki Sinuma osmake ta okay inne utar tumke ta ek hine kor amip tomoosma nisa ruwe ne.
28 Inambe gusu ne yakun, Shinuma mipihi poka ku tomooshma katap ku iwange kusu ne, ari itak.
Inanpe kusu ne yakun, Sinuma mipihi poka ku=tomoosma katap ku=iwanke kusu ne, ari itak.
29 Aige, nani nei kem hetuku ushike sat nisa ruwe ne; orowa, nei shiyeye aisamka wa an kuni kon netobake ta eramʼan ruwe ne.
Ayke, nani ne kem hetuku usike sat nisa ruwe ne; orowa, ne siyeye a=ysamka wa an kuni kor netopake ta eraman ruwe ne.
30 Orowa, nani yaikota orowa no kiroro oashin ari an ambe, Yesu keutum ta eramʼan wa inne utara orun hosari hine, Ku mipi tomooshma guru anak inan guru ne ruwe he an, sekoro itak.
Orowa, nani yaykota oro wano kiroro oasin ari an anpe, Yesu kewtum ta eraman wa inne utar orun hosari hine, Ku=mipi tomoosma kur anak inan kur ne ruwe he an, sekor itak.
31 Orota, koikara utara anak ne inne utara E eukonumba katu E nukara, yakka, — En tomooshma guru nen ne ruwe he an ani E ye ya?
Oro ta, koykar utar anakne inne utar E ewkonunpa katu E nukar, yakka, — En=tomoosma kur nen ne ruwe he an ani E ye ya?
32 Orowa, nei ambe ki guru nukara gusu hosari wa inganʼnisa ruwe ne.
Orowa, ne anpe ki kur nukar kusu hosari wa inkar nisa ruwe ne.
33 Koroka, nei shiwentep ishitoma wa tusushke hine otta akarabe eramʼan, aige, ek wa Shinuma kotchaketa hachiri hine son no an okaibe obitta nure nisa ruwe ne.
Korka, ne siwentep isitoma wa tususke hine or ta a=karpe eraman, ayke, ek wa Sinuma kotcake ta hacir hine sonno an okaype opitta nure nisa ruwe ne.
34 Orota Shinuma ene itak-hi :— Matne-po e koro eishokoro-i anak ne e kaobiuki nisa ruwe ne, ino no paye wa e ki shiyeye eshini yan, ari itak.
Oro ta Sinuma ene itak hi :— Matne-po e=kor eysokor hi anakne e kaopiwki nisa ruwe ne, i=no no paye wa e ki siyeye esini yan, ari itak.
35 Shinuma itak an aine Uwekarapa chisei esapane guru koro uni wano utara araki wa ene itak-hi :— E koro matne-po rai okere ruwe ne: nep gusu naa Epakashnu guru shingere ya?
Sinuma itak an ayne Uekarpa cise esapane kur kor uni wano utar arki wa ene itak hi :— E=kor matne-po ray okere ruwe ne: nep kusu naa Epakasnu kur sinkere ya?
36 Koroka, Yesu anak ne nei ye itak shiramsamte wa nei esapane guru otta, Iteki ishitoma yan, eishokoro patek ki yak pirika na, ari itak.
Korka, Yesu anakne ne ye itak siramsamte wa ne esapane kur or ta, Iteki isitoma yan, eysokor patek ki yak pirka na, ari itak.
37 Orowa, Petros newa Yakob newa Yakob koro iriwak ne Yoannes moshima nen ne yakka tura no paye katu Shinuma etokotuye nisa ruwe ne.
Orowa, Petros newa Yakob newa Yakob kor irwak ne Yoannes mosma nen ne yakka turano paye katu Sinuma etoko tuye nisa ruwe ne.
38 Awa, nei sapane guru koro chisei ta shirepa, aige, sakayo anukara, poron no chish an rai-chishkara hau an ruwe ne.
Awa, ne sapanekur kor cise ta sirepa, ayke, sakayo a=nukar, poronno cis an ray-ciskar hawan ruwe ne.
39 Orowa, Shinuma ahun chiki utara orota ene itak-hi :— Hemanda gusu sakayo hemhem ki, chish hemhem echi ki ya? Pon guru anak ne rai an ka shomo ne, mokon ruwe ne, ari itak.
Orowa, Sinuma ahun ciki utar oro ta ene itak hi :— Hemanta kusu sakayo hemhem ki, cis hemhem eci=ki ya? Pon kur anakne ray an ka somo ne, mokor ruwe ne, ari itak.
40 Okai utara Shinuma emina esapse nisa ruwe ne. Koroka, Shinuma nei utara obitta soyumbare okere chiki poho ona newa unu tura no okai utara ani wa poho an ushike un ahun.
Okay utar Sinuma emina esapse nisa ruwe ne. Korka, Sinuma ne utar opitta soyunpare okere ciki poho ona newa unu turano okay utar ani wa poho an usike un ahun.
41 Orowa, pon guru tekehe kishima wa orota, Tarita kumi, ari an itak an itak: tan itak ibehe anak ne, Matkachi, hopuni ani ku itak, sekorʼan itak ibehe ne ruwe ne.
Orowa, pon kur tekehe kisma wa oro ta, Tarita kumi, ari an itak an itak: tan itak ipehe anakne, Matkaci, hopuni ani ku=itak, sekor an itak ipehe ne ruwe ne.
42 Orowa, nani nei matkachi hopuni wa apkash: shinuma tu pa ikashima wan pa pakno epa matkachi ne ruwe ne gusu ne na. Aige, utara anak ne nani poro aeoyamoktep ani oyamokte nisa ruwe ne.
Orowa, nani ne matkaci hopuni wa apkas: sinuma tu pa ikasma wan pa pakno epa matkaci ne ruwe ne kusu ne na. Ayke, utar anakne nani poro aeoyamoktep ani oyamokte nisa ruwe ne.
43 Orowa, iteki moshima utara otta tan orushpe nure kuni ne Shinuma yupke no ikashpaotte nisa ruwe ne: samata, aep iere gusu ye nisa ruwe ne na.
Orowa, iteki mosma utar or ta tan oruspe nure kuni ne Sinuma yupke no ikaspaotte nisa ruwe ne: sama ta, aep i=ere kusu ye nisa ruwe ne na.
Roukos 8.40-56 §85II
40 Orowa, Yesu hoshipi chiki topaha utara Shinuma enupetne wa uk nisa ruwe ne; utara obitta Shinuma ehuyepa wa okai ruwe ne gusu ne na.
Orowa, Yesu hosipi ciki topaha utar Sinuma enupetne wa uk nisa ruwe ne; utar opitta Sinuma ehuyepa wa okay ruwe ne kusu ne na.
41 Orowa, ingarʼan, uwekarapa chisei esapane Yairos ani an reihei koro shine ainu Yesu orota ek wa Shinuma chikiri samta hachiri wa koro chisei orun ek kuni koramkoro;
Orowa, inkar=an, uekarpa cise esapane Yayros ani an rehe kor sine aynu Yesu oro ta ek wa Sinuma cikiri sam ta hacir wa kor cise orun ek kuni koramkor;
42 inambe gusu ne yakun, patek shine matne poho koro, tu pa ikashima wan pa ehange pakno epa wa tane hotke wa rai etokooiki korʼan nisa ruwe ne gusu ne na. Koroka, Yesu oman rapoketa inne utara Shinuma eukonumba nisa ruwe ne.
inanpe kusu ne yakun, patek sine matnepoho kor, tu pa ikasma wan pa ehanke pakno epa wa tane hotke wa ray etokooyki kor an nisa ruwe ne kusu ne na. Korka, Yesu oman rapoketa inne utar Sinuma ewkonunpa nisa ruwe ne.
43 Orowa, tu pa ikashima wan pa kemnu tashum ki wa, korobe obitta potara guru gusu isamka, yakka,
Orowa, tu pa ikasma wan pa kemnu tasum ki wa, kor pe opitta potara kur kusu isamka, yakka,
44 aiwangere eaikap shine shiwentep anak ne Shinuma oshmaketa ek hine koro anrip chingi tomooshma; orowa nani nei kemnu ushi tui nisa ruwe ne.
aywankere eaykap sine siwentep anakne Sinuma osmake ta ek hine kor anrip cinki tomoosma; orowa nani ne kemnu usi tuy nisa ruwe ne.
45 Awa, En tomooshma guru nen ne ruwe he an? ari Yesu itak. Orowa, utara obitta eshikashke chiki, Petros newa tura no okai utara ene itak-hi :— Nishpa, inne topaha utara Aokai okari wa okai, aige, E rarapa ruwe ne.
Awa, En=tomoosma kur nen ne ruwe he an? ari Yesu itak. Orowa, utar opitta esikaske ciki, Petros newa turano okay utar ene itak hi :— Nispa, inne topaha utar Aokay okari wa okay, ayke, E rarpa ruwe ne.
46 Koroka, Yesu ene itak-hi :— Nenka En tomooshma nisa ruwe ne; inambe gusu ne yakun, En orowa no kiroro oashin katu Ku eramʼan, ari itak.
Korka, Yesu ene itak hi :— Nen ka En=tomoosma nisa ruwe ne; inanpe kusu ne yakun, En=oro wano kiroro oasin katu Ku=eraman, ari itak.
47 Orowa, nei shiwentep anuina eaikap sekoro eramʼan chiki, tusushke wa ek, awa, Shinuma kotchaketa hachiri wa obitta no okai utara tek-samata nep gusu tomooshma ya hemhem, orowa, nani aiwangere-i hemhem, otta ye nisa ruwe ne.
Orowa, ne siwentep a=nuyna eaykap sekor eraman ciki, tususke wa ek, awa, Sinuma kotcake ta hacir wa opittano okay utar tek-sama ta nep kusu tomoosma ya hemhem, orowa, nani aywankere hi hemhem, or ta ye nisa ruwe ne.
48 Orota Shinuma ene itak-hi :— Matne-po, e koro eishokoro-i anak ne e iwangere nisa ruwe ne; mo no an wa paye yan, ari itak.
Oro ta Sinuma ene itak hi :— Matne-po, e=kor eysokor hi anakne e iwankere nisa ruwe ne; mo no an wa paye yan, ari itak.
49 Orowa, Shinuma itak rapoketa Uwekarapa chisei esapane guru koro uni wano shinen ek wa, E koro matne-po rai okere gusu, iteki Nishpa shungere yan, sekoro itak.
Orowa, Sinuma itak rapoketa Uekarpa cise esapane kur kor uni wano sinen ek wa, E=kor matne-po ray okere kusu, iteki Nispa sunkere yan, sekor itak.
50 Koroka, Yesu nei itak nu koro nei sapane guru otta ese wa ene itak-hi :— Iteki ishitoma, ouse eishokoro yan, yak anak ne e koro matne-po aiwangere kusu ne, ari itak.
Korka, Yesu ne itak nu kor ne sapanekur or ta ese wa ene itak hi :— Iteki isitoma, owse eysokor yan, yakanak ne e=kor matne-po aywankere kusu ne, ari itak.
51 Orowa, Yesu nei chisei ta ko-shirepa koro, Petros hene, Yoannes hene, Yakob hene, orowa, poho koro ona koro unu hene, moshima nen ne yakka tura no ahup kuni ramuoshma shomoki nisa ruwe ne.
Orowa, Yesu ne cise ta ko-sirepa kor, Petros hene, Yoannes hene, Yakob hene, orowa, poho kor ona kor unu hene, mosma nen ne yakka turano ahup kuni ramuosma somo ki nisa ruwe ne.
52 Utara obitta chish newa rai-chish kara wa okai; koroka, Shinuma ene itak-hi :— Iteki chish yan, shinuma rai ap shomo ne, ouse mokon ruwe ne, ari itak.
Utar opitta cis newa ray-ciskar wa okay; korka, Sinuma ene itak hi :— Iteki cis yan, sinuma ray ap somo ne, owse mokor ruwe ne, ari itak.
53 Orowa, nei matne-po rai okere sekorʼambe utara eramʼan gusu Shinuma emina esapse nisa ruwe ne.
Orowa, ne matne-po ray okere sekor anpe utar eraman kusu Sinuma emina esapse nisa ruwe ne.
54 Koroka, Shinuma rai guru tekehe kishima hine hawe sange wa, “Matkachi, hopuni,” ari itak.
Korka, Sinuma raykur tekehe kisma hine hawe sanke wa, “Matkaci, hopuni,” ari itak.
55 Orowa, kon ramat hoshipi wa shinuma nani hopuni nisa ruwe ne: aige, shinuma aibere kuni Shinuma ikashpaotte nisa ruwe ne.
Orowa, kor ramat hosipi wa sinuma nani hopuni nisa ruwe ne: ayke, sinuma a=ypere kuni Sinuma ikaspaotte nisa ruwe ne.
56 Orowa, eshikop utara anak ne oyamokte: koroka, tane aki orushpe moshima utara otta iteki nure kuni ne otta Shinuma eikashpaotte nisa ruwe ne na.
Orowa, esikop utar anakne oyamokte: korka, tane aki oruspe mosma utar or ta iteki nure kuni ne or ta Sinuma e=kaspaotte nisa ruwe ne na.
Mattaios 9.27-34 §75X
27 Orowa, Yesu tande oro oman, aige, tu shiknak utara Shinuma osh araki wa hawe ashte hine ene itak-hi :— Dabid koro Poho Aoka, un erampokiwen wa un kore, ari itak.
Orowa, Yesu tan te oro oman, ayke, tu siknak utar Sinuma os arki wa hawe aste hine ene itak hi :— Dabid kor Poho Aoka, un eranpokiwen wa un kore, ari itak.
28 Orowa, Shinuma chisei orun ahun chiki, nei shiknak utara Shinuma orota araki: awa, Yesu nei utara otta ene itak-hi :— Kuani tap ambe Ku kara eashkai ani echi eishokoro ya? ari itak: orota nei utara, Utarapa, ruwe un, ani ese wa ye ruwe ne.
Orowa, Sinuma cise orun ahun ciki, ne siknak utar Sinuma oro ta arki: awa, Yesu ne utar or ta ene itak hi :— Kuani tapanpe Ku=kar easkay ani eci=eysokor ya? ari itak: oro ta ne utar, Utarpa, ruwe un, ani ese wa ye ruwe ne.
29 Tata otta Shinuma nei utara koro shikihi tomooshma wa ene itak-hi :— Echi eishokor-i an korachi akara na, sekoro itak.
Tata or ta Sinuma ne utar kor sikihi tomoosma wa ene itak hi :— Eci=eysokor hi an koraci a=kar na, sekor itak.
30 Orowa, koro shikihi makke. Aige, Yesu yupke no nei utara ikashpaotte wa ene itak-hi :— Yaitubare no moshima guru iteki nu kuni ki yan, ari itak.
Orowa, kor sikihi makke. Ayke, Yesu yupke no ne utar ikaspaotte wa ene itak hi :— Yaytupare no mosma kur iteki nu kuni ki yan, ari itak.
31 Koroka, nei utara paye wa shiri ebitta Yesu assuru ashte nisa ruwe ne na.
Korka, ne utar paye wa siri epitta Yesu assuru aste nisa ruwe ne na.
32 Nei utara soyumba, aige, nitne kamui shikatkari wa an shine shomo-itak guru Shinuma otta atura wa ek.
Ne utar soyunpa, ayke, nitne kamuy sikatkari wa an sine somo-itak kur Sinuma or ta a=tura wa ek.
33 Nei nitne kamui aoshinge chiki, shomo-itak guru itak: orowa, inne utara iyokunnure wa ene itak-hi :— Israeru un utara tumugeta naa shomo tap ne kane okaibe anukara eramushkare na, ari itak.
Ne nitne kamuy aosinke ciki, somo-itak kur itak: orowa, inne utar iyokunnure wa ene itak hi :— Israeru un utar tumke ta naa somo tapne kane okaype a=nukar eramuskare na, ari itak.
34 Koroka, Parisee un utara anak ne, Shinuma nitne kamui esapanep ani nitne kamui oashinge ruwe ne na, sekoro itak.
Korka, Parisee un utar anakne, Sinuma nitne kamuy e=sapanep ani nitne kamuy oasinke ruwe ne na, sekor itak.
Mattaios 9.35 §76II
35 Orowa, Yesu shiri ebitta machiya hene kotan hene okari oman wa uwekarapa chisei ta epakashnu, aige, moshiri gusu an pirika orushpe eupaskuma, samata, usa okai tashum ne yakka usa okai shiyeye ne yakka iwangere nisa ruwe ne.
Orowa, Yesu siri epitta maciya hene kotan hene okari oman wa uekarpa cise ta epakasnu, ayke, mosir kusu an pirka oruspe ewpaskuma, sama ta, usa okay tasum ne yakka usa okay siyeye ne yakka iwankere nisa ruwe ne.
Mattaios 9.36 §77VI
36 Koroka, Shinuma inne utara nukara chiki, gusu erampokiwen wa kore na, oreshpa guru sak no an hitsuji chikoikip korachi yairamhekonro wa shitchari wa okai ruwe ne gusu ne na.
Korka, Sinuma inne utar nukar ciki, kusu eranpokiwen wa kore na, orespa kur sak no an hitsuji cikoykip koraci yayramhekonro wa sitcari wa okay ruwe ne kusu ne na.
Markos 6.32-34 §63VI
32 Orowa, chip o hine oyake un kim un ushike paye nisa ruwe ne.
Orowa, cip o hine oyake un kimun usike paye nisa ruwe ne.
33 Paye shiri utara nukara koro inne no eamkiri gusu obitta no okai machiya orowa no hoyupu wa ya peka nei ushiketa etoko uwekarapa nisa ruwe ne.
Paye siri utar nukar kor inne no e=amkir kusu opittano okay maciya oro wano hoyupu wa ya peka ne uske ta etoko uekarpa nisa ruwe ne.
34 Orowa, Shinuma ek wa poro inne utara nukara, aine, erampokiwen wa kore, nei utara reshpa guru sak hitsuji chikoikip korachi ne ruwe ne gusu ne na; orowa, Shinuma inne orushpe epakashnu heashi nisa ruwe ne.
Orowa, Sinuma ek wa poro inne utar nukar, ayne, eranpokiwen wa kore, ne utar respa kur sak hitsuji cikoykip koraci ne ruwe ne kusu ne na; orowa, Sinuma inne oruspe epakasnu heasi nisa ruwe ne.
Mattaios 9.37-38 §78V
37 Nei ita koro koikara utara otta Shinuma ene itak-hi; — Anange kunip anak ne nuye an, koroka, monraige utara moyo ruwe ne.
Ne hi ta kor koykar utar or ta Sinuma ene itak hi; — A=nanke kunip anakne nuye an, korka, monrayke utar moyo ruwe ne.
38 Tambe gusu, anange kuni ushi koro Utarapa anak ne monraige gusu an utara kot toi orun payere kuni gusu koramkoro yan, ari itak.
Tanpe kusu, a=nanke kuni usi kor Utarpa anakne monrayke kusu an utar kot toy orun payere kuni kusu koramkor yan, ari itak.
Roukos 10.2 §108V
2 Awa, otta ene itak-hi :— Nange kuni ushi nuye an koroka, monraige utara moyo ruwe ne: tambe gusu, Nange ushi kon nishpa anak ne nange ushita monraige utara payere kuni gusu koramkoro yan.
Awa, or ta ene itak hi :— Nanke kuni usi nuye an korka, monrayke utar moyo ruwe ne: tanpe kusu, Nanke usi kor nispa anakne nanke usi ta monrayke utar payere kuni kusu koramkor yan.