共観表
Mattaios 20.1-16 §200X
1 Kando moshiri anak ne koro hat toi otta monraigere kuni ne aro-kunneiwano monraige utara nishuk gusu soine chisei-koro guru koheraye ruwe ne.
Kanto mosir anakne kor hat toy or ta monraykere kuni ne a=ro-kunneywano monrayke utar nisuk kusu soyne cise-kor kur koheraye ruwe ne.
2 Orowa, shine to range shine denaria sange kusu ne sekoro nei monraige utara tura ukoramkoro okere chiki, koro hat toi otta payere ruwe ne.
Orowa, sine to ranke sine tenaria sanke kusu ne sekor ne monrayke utar tura ukoramkor okere ciki, kor hat toy or ta payere ruwe ne.
3 Orowa, ku ji pakita shui soine wa usa okaibe ehok ushi ta moshima okai utara toranne wa roshki wa okai-i nukara wa,
Orowa, ku=ji pakita suy soyne wa usa okaype e=hok usi ta mosma okay utar toranne wa roski wa okay hi nukar wa,
4 echi utara ne yakka hat toi otta ahup yan: orowa, nep echi uk kunip yakka echi kore ash na, sekoro itak.
eci utar ne yakka hat toy or ta ahup yan: orowa, nep eci=uk kunip yakka eci=kore as na, sekor itak.
5 Orowa no nei utara paye nisa ruwe ne. Shui, ju ni ji pakita hene san ji pakita hene soine wa kanna-shui nei a-i korachi ki nisa ruwe ne.
Orowano ne utar paye nisa ruwe ne. Suy, ju ni ji pakita hene san ji pakita hene soyne wa kanna-suy ne a hi koraci ki nisa ruwe ne.
6 Orowa, go ji pakita soine wa moshima okai utara roshki wa otai-i nukara, awa, orota ene itak-hi :— Nep gusu echi utara ramne to toranne wa teda roshki ruwe he an? sekoro itak.
Orowa, ko ji pakita soyne wa mosma okay utar roski wa otay hi nukar, awa, oro ta ene itak hi :— Nep kusu eci utar ramne to toranne wa teta roski ruwe he an? sekor itak.
7 Orota nei utara ene itak-hi :— Un nishuk guru isamma gusu ne, sekoro itak. Nei guru, echi utara ne yakka bat toi otta ahup yan, ani itak.
Oro ta ne utar ene itak hi :— Un nisuk kur i=samma kusu ne, sekor itak. Ne kur, eci utar ne yakka pat toy or ta ahup yan, ani itak.
8 Orowa, onuman an koro hat toi kon nishpa anak ne korobe epunginere ainu otta ene itak-hi :— Monraige utara hotuyekara wa, iyoshi no anishuk utara orowa no hoshiki anishuk utara pakno pumma kore yan, ari itak.
Orowa, onuman an kor hat toy kor nispa anakne kor pe epunkinere aynu or ta ene itak hi :— Monrayke utar hotuyekar wa, i=yos no a=nisuk utar oro wano hoski a=nisuk utar pakno pumma kore yan, ari itak.
9 Orowa, go ji pakita anishuk utara araki wa shinen range shine denaria uk nisa ruwe ne.
Orowa, ko ji pakita a=nisuk utar arki wa sinen ranke sine tenaria uk nisa ruwe ne.
10 Orowa, hoshiki anishuk utara araki koro, naa kasu no akore nangoro ani yainu wa okai, awa, nei utara ne yakka shinen range shine denaria uk nisa ruwe ne.
Orowa, hoski a=nisuk utar arki kor, naa kasuno a=kore nankor ani yaynu wa okay, awa, ne utar ne yakka sinen ranke sine tenaria uk nisa ruwe ne.
11 Orowa, nei ambe akore okere chiki chisei koro guru orun oromam wa ene itak-hi :—
Orowa, ne anpe a=kore okere ciki cise kor kur orun oromam wa ene itak hi :—
12 Tan okai iyoshi no araki utara ouse shine ichi ji kan uturuta patek monraige, awa, chi utara anak kunneiwano orowa no tokap popkemau eyaishiporore, awa, orota ukorachi ki ruwe ne, sekoro itak.
Tan okay i=yos no arki utar owse sine ici ji kan utur ta patek monrayke, awa, ci utar anak kunneywano oro wano tokap popkemaw eyaysiporore, awa, oro ta ukoraci ki ruwe ne, sekor itak.
13 Koroka, chisei-koro guru ese wa nei utara shinen otta ene itak-hi :— Ainu, eani gusu wenbe shomo ku ki: shine denaria gusu en tura ukoramkoro shomoki ya?
Korka, cise-kor kur ese wa ne utar sinen or ta ene itak hi :— Aynu, eani kusu wenpe somo ku=ki: sine tenaria kusu en tura ukoramkor somo ki ya?
14 E korobe uk wa oman; e kore ash pakno tan iyoshi no araki utara otta ne yakka ku kore-hi anak ne ku keutura ne ruwe ne.
E=kor pe uk wa oman; e kore as pakno tan i=yos no arki utar or ta ne yakka ku=kore hi anakne ku kewtura ne ruwe ne.
15 Kuani anak ne yaikota korobe ani rengaine ku ki yakun wen ya? Kuani pirika ne ruwe ne gusu e shikihi wen ya?
Kuani anakne yaykota kor pe ani renkayne ku=ki yakun wen ya? Kuani pirka ne ruwe ne kusu e sikihi wen ya?
16 Tambe gusu, iyoshi no ambe hoshiki ne, hoshiki no an ambe iyoshi ne kusu ne.
Tanpe kusu, i=yos no anpe hoski ne, hoskino an anpe i=yos ne kusu ne.
Mattaios 20.17-19 §201II
17 Orowa, Yesu Yerusarem kotan orun oman ita, tun ikashima wan koikara utara tura wa ainu isam ushi kush wa orota ene itak-hi :—
Orowa, Yesu Yerusarem kotan orun oman hi ta, tun ikasma wan koykar utar tura wa aynu isam usi kus wa oro ta ene itak hi :—
18 Ingarʼan, chi utara anak ne Yerusarem kotan orun paye; orowa, Ainu Poho Kamui kora kenru esapane utara newa kambi-nuye utara orota aekoshi kusu ne; orowa, Shinuma araige kuni ne nei utara orowa no aesanniyo, samata, aeminaesapse, akoshirikik, utasa chikuni otta a kungi
Inkar=an, ci utar anakne Yerusarem kotan orun paye; orowa, Aynu Poho Kamuy kor kenru esapane utar newa kampi-nuye utar oro ta a=ekosi kusu ne; orowa, Sinuma arayke kuni ne ne utar oro wano a=esanniyo, sama ta, aeminaesapse, akosirikik, utasa cikuni or ta a kunki
19 kokikkik kuni ne oya utara otta ekoshi kusu ne; orowa, rereko an ita hetopo-a-shiknure kusu ne na, ari itak.
kokikkik kuni ne oya utar or ta ekosi kusu ne; orowa, rerko an hi ta hetopo-a-siknure kusu ne na, ari itak.
Markos 10.32-34 §112II
32 Orowa, nei utara Yerusarem kotan orun hemesu korʼan, awa, ru hontomota okai; Yesu nei utara ratchaot oman shiri an: aine, utara oyamokte; samata, osh paye utara ishitoma nisa ruwe ne Orowa, shui, Shinuma nei tun ikashima wa niu uk hine yaikota gusu hetuku kusu ne orushpe nure heashi wa ene okai-hi :—
Orowa, ne utar Yerusarem kotan orun hemesu kor an, awa, ru hontom ta okay; Yesu ne utar ratcaot oman siri an: ayne, utar oyamokte; sama ta, os paye utar isitoma nisa ruwe ne Orowa, suy, Sinuma ne tun ikasma wa niw uk hine yaykota kusu hetuku kusu ne oruspe nure heasi wa ene okay hi :—
33 Ingarʼan, chi utara Yerusarem kotan orun hemespa; orowa, Ainu Poho anak ne Kamui kora kenru esapane utara newa kambi-nuye utara otta aekoshi; orowa, nei utara Shinuma raige kuni esanniyo wa Oya uirup utara otta ekoshi; nei utara anak ne Shinuma eoyaitak hemhem ki,
Inkar=an, ci utar Yerusarem kotan orun hemespa; orowa, Aynu Poho anakne Kamuy kor kenru esapane utar newa kampi-nuye utar or ta a=ekosi; orowa, ne utar Sinuma rayke kuni esanniyo wa Oya uyrup utar or ta ekosi; ne utar anakne Sinuma eoyaytak hemhem ki,
34 kata topsekara hemhem ki, shirikik hemhem ki, orowa no raige hemhem ki kusu ne; orowa, rereko okaketa Shinuma hetopo-shiknu kusu ne na.
kata topsekar hemhem ki, sirkik hemhem ki, orowano rayke hemhem ki kusu ne; orowa, rerko okake ta Sinuma hetopo-siknu kusu ne na.
Roukos 18.31-33 §222II
31 Orowa, Shinuma nei tun ikashima wa niu uk wa orota ene itak-hi :— Ingarʼan, chi utara anak ne Yerusarem kotan orun hemeshpa ruwe ne, orowa, Uweingara utara ani anuye wa an obitta no okaibe
Orowa, Sinuma ne tun ikasma wa niw uk wa oro ta ene itak hi :— Inkar=an, ci utar anakne Yerusarem kotan orun hemespa ruwe ne, orowa, Ueinkar utar ani a=nuye wa an opittano okaype
32 Ainu Poho otta auweomare kusu ne na. Inambe gusu ne yakun, Shinuma anak ne Oya un utara otta aekoshi, orowa, aeoyaitak, otta shomo yaikatanu ki, kata topse-topse akara;
Aynu Poho or ta a=ueomare kusu ne na. Inanpe kusu ne yakun, Sinuma anakne Oya un utar or ta a=ekosi, orowa, a=eoyaytak, or ta somo yaykatanu ki, kata topse-topse a=kar;
33 samata, nei utara anak ne Shinuma shirikik wa raige kusu ne: orowa, rereko an ita Shinuma hetopo-shiknu kusu ne na, sekoro itak.
sama ta, ne utar anakne Sinuma sirkik wa rayke kusu ne: orowa, rerko an hi ta Sinuma hetopo-siknu kusu ne na, sekor itak.
Mattaios 20.20-23 §202VI
20 Orowa, Zebedee koro poho unuhu anak ne po utara tura wa shine eikoramkoro-i an gusu Shinuma otta ek wa ko-ongami nisa ruwe ne.
Orowa, Zebedee kor poho unuhu anakne po utar tura wa sine eykoramkor hi an kusu Sinuma or ta ek wa ko-onkami nisa ruwe ne.
21 Orowa, nei shiwentep otta Shinuma ene itak-hi :— Nep e kon rusui ya? Orota shiwentep ene itak-hi :— E koro moshiri ta tan ku tu poho anak ne shinen E shimon tek samata, shinen E hariki tek samata a kuni kashpaotte wa en kore.
Orowa, ne siwentep or ta Sinuma ene itak hi :— Nep e=kor rusuy ya? Oro ta siwentep ene itak hi :— E=kor mosir ta tan ku=tu poho anakne sinen E simon teksama ta, sinen E harki teksama ta a kuni kaspaotte wa en=kore.
22 Koroka, Yesu ese wa ene itak-hi :— E eikoramkorobe e erampeutek ruwe ne. Echi utara anak ne tane Ku iku tusu ne itangi echi iku eashkai ya?
Korka, Yesu ese wa ene itak hi :— E eykoramkorope e eranpewtek ruwe ne. Eci utar anakne tane Ku=iku tusu ne itanki eci=iku easkay ya?
23 Orota nei utara :— Iku ash eashkai ruwe ne ari itak. Otta Shinuma ene itak-hi :— Son no newa Ku iku itangi echi iku kusu ne: koroka, Ku shimon tek samata a hene, Ku hariki tek samata a hene anak ne Ku kore kunip shomo ne; koroka, Ku Michihi orowa no aetotooiki gusu an utara otta akore kusu ne, sekoro itak.
Oro ta ne utar :— Iku as easkay ruwe ne ari itak. Or ta Sinuma ene itak hi :— Sonno newa Ku=iku itanki eci=iku kusu ne: korka, Ku=simon teksama ta a hene, Ku=harki teksama ta a hene anakne Ku=kore kunip somo ne; korka, Ku Micihi oro wano aetotooyki kusu an utar or ta a=kore kusu ne, sekor itak.
Markos 10.35-40 §113VI
35 Orowa, Zebedee koro poho Yakob newa Yoannes Shinuma karange no araki hine orota ene itak-hi :— Epakashnu guru, nep ne yakka Aokai otta chi koramkorobe un gusu iki kuni chi kon rusui ruwe ne.
Orowa, Zebedee kor poho Yakob newa Yoannes Sinuma karankeno arki hine oro ta ene itak hi :— Epakasnu kur, nep ne yakka Aokay or ta ci koramkorope un kusu iki kuni ci kor rusuy ruwe ne.
36 Orota :— Hemanda echi gusu Ku kara kuni echi kon rusui ya? ari Shinuma itak.
Oro ta :— Hemanta eci kusu Ku=kar kuni eci=kor rusuy ya? ari Sinuma itak.
37 Orota nei utara ene itak-hi :— E koro nupeki otta chi utara anak ne shinen E shimon tek samata, shinen E hariki tek samata rok kuni kara wa un kore.
Oro ta ne utar ene itak hi :— E=kor nupeki or ta ci utar anakne sinen E simon teksama ta, sinen E harki teksama ta rok kuni kar wa un kore.
38 Koroka, Yesu nei utara otta ene itak-hi :— Echi eikoramkorobe echi erampeutek ruwe ne. Echi utara anak ne Ku iku kuni itangi echi ku eashkai ya? Samata, Ku uk kuni baptisma ani baptisma echi uk eashkai ya?
Korka, Yesu ne utar or ta ene itak hi :— Eci eykoramkorope eci=eranpewtek ruwe ne. Eci utar anakne Ku=iku kuni itanki eci=ku easkay ya? Sama ta, Ku=uk kuni paptisma ani paptisma eci=uk easkay ya?
39 Orota, eashkai ruwe ne, ari nei utara ye ruwe nisa ne. Orota Yesu ene itak-hi :— Ku iku kuni itangi echi ku kusu ne; samata, Ku uk kuni baptisma ani baptisma echi akore kusu ne na:
Oro ta, easkay ruwe ne, ari ne utar ye ruwe nisa ne. Oro ta Yesu ene itak hi :— Ku=iku kuni itanki eci=ku kusu ne; sama ta, Ku=uk kuni paptisma ani paptisma eci=a=kore kusu ne na:
40 koroka, Ku shimon tek samata a hene, Ku hariki tek samata a hene ani an ambe anak ne Ku kore kunip shomo ne; koroka, gusu aetokooiki utara otta akore kusu ne na, sekoro itak.
korka, Ku=simon teksama ta a hene, Ku=harki teksama ta a hene ani an anpe anakne Ku=kore kunip somo ne; korka, kusu a=etokoyki utar or ta a=kore kusu ne na, sekor itak.
Mattaios 20.24-27 §203II
24 Orowa, wa niu ne koikara utara tap ambe nu chiki nei tu uiriwak utara koirushka ruwe ne.
Orowa, wa niw ne koykar utar tapanpe nu ciki ne tu uyriwak utar koyruska ruwe ne.
25 Koroka, Yesu nei utara shihekote hotuyekara wa ene itak-hi :— Oya utara esapane utara anak ne shiram-niukesh yara wa epungine, orowa, nei pase utara ishioushi ko-ki ruwe ne.
Korka, Yesu ne utar sihekote hotuyekar wa ene itak hi :— Oya utar esapane utar anakne siram-niwkes yara wa epunkine, orowa, ne pase utar isiowsi ko-ki ruwe ne.
26 Echi okai tumugeta nei no an shomoki kusu ne: koroka nen ne yakka echi tumugeta pase rusui guru anak ne echi auitek guru ne kusu ne;
Eci=okay tumke ta néno an somo ki kusu ne: korka nen ne yakka eci=tumke ta pase rusuy kur anakne eci awitek kur ne kusu ne;
27 orowa, nen ne yakka echi tumugeta esapane rusui guru anak ne echi usshiune guru ne kusu ne:
orowa, nen ne yakka eci=tumke ta esapane rusuy kur anakne eci=ussiw ne kur ne kusu ne:
Markos 10.41-44 §114II
41 Orowa, nei wa niu nei itak nu chiki Yakob newa Yoannes ko-irushka heashi nisa ruwe ne.
Orowa, ne wa niw ne itak nu ciki Yakob newa Yoannes ko-iruska heasi nisa ruwe ne.
42 Orowa, Yesu nei utara shihekote hotuyekara wa orota ene itak-hi :— Oya uirup utara esapane kuni aesanniyo utara anak ne enishpane iki wa epungine, orowa, nei pase utara anak ne shiramniukesh mondum ko-ki ruwe ne.
Orowa, Yesu ne utar sihekote hotuyekar wa oro ta ene itak hi :— Oya uyrup utar esapane kuni a=esanniyo utar anakne enispane iki wa epunkine, orowa, ne pase utar anakne siramniwkes montum ko-ki ruwe ne.
43 Koroka, echi utara tumugeta nei no an shomo ne kusu ne: koroka, nen ne yakka echi tumugeta pase rusui gurʼanak ne echi auitek guru ne kusu ne:
Korka, eci utar tumke ta néno an somo ne kusu ne: korka, nen ne yakka eci=tumke ta pase rusuy kur anakne eci awitek kur ne kusu ne:
44 orowa, nen ne yakka echi tumugeta sapane rusui gurʼanak ne echi obitta gusu an usshiune guru ne kusu ne na.
orowa, nen ne yakka eci=tumke ta sapane rusuy kur anakne eci=opitta kusu an ussiw ne kur ne kusu ne na.
Roukos 22.24-26 §270II
24 Orowa, nei utara tumugeta inan guru iyotta pasep
Orowa, ne utar tumke ta inan kur iyotta pase p
25 ne ruwe, sekorʼan sakayo hopuni. Orowa, nei utara otta Shinuma ene itak-hi :— Oya un utara shikkashima utara anak ne koro utara enishpane ruwe ne, orowa, nei utara gusu mondum koro utara anak ne pirikare ki utara ani aye ruwe ne.
ne ruwe, sekor an sakayo hopuni. Orowa, ne utar or ta Sinuma ene itak hi :— Oya un utar sikkasima utar anakne kor utar enispane ruwe ne, orowa, ne utar kusu montum kor utar anakne pirkare ki utar ani a=ye ruwe ne.
26 Koroka, echi utara anak ne nei no okai shomo ne: koroka, echi tumugeta iyotta pase guru anak ne iyotta poniune guru nei no an yan; orowa, esapane guru anak ne yaishieiwangere guru nei no an yan.
Korka, eci utar anakne néno okay somo ne: korka, eci=tumke ta iyotta pase kur anakne iyotta poniwne kur néno an yan; orowa, esapane kur anakne yaysieywankere kur néno an yan.
Mattaios 20.28 §204IV
28 tambe korachi Ainu Poho anak ne moshima guru eiwange kuni ne ek ka shomo ne, yaishieiwangere kuni gusu ek ruwe ne; orowa, inne utara kikiraye gusu kon ramat kore gusu ek nisa ruwe tapan na.
tanpe koraci Aynu Poho anakne mosma kur eywanke kuni ne ek ka somo ne, yaysieywankere kuni kusu ek ruwe ne; orowa, inne utar kikiraye kusu kor ramat kore kusu ek nisa ruwe tapan na.
Markos 10.45 §115IV
45 Inambe gusu ne yakun, son no newa Ainu Poho anak ne moshima utara eiwange kuni gusu ek shomo ne, koroka, yaishieiwangere kuni gusu ek, inne utara kikiraye gusu, koro inotu kore kuni gusu ek nisa ruwe ne na.
Inanpe kusu ne yakun, sonno newa Aynu Poho anakne mosma utar eywanke kuni kusu ek somo ne, korka, yaysieywankere kuni kusu ek, inne utar kikiraye kusu, kor inotu kore kuni kusu ek nisa ruwe ne na.
Mattaios 20.29-34 §205II
29 Orowa no, Yeriko machiya orowa no paye koro poro inne utara Shinuma oshi paye nisa ruwe ne.
Orowano, Yeriko maciya oro wano paye kor poro inne utar Sinuma osi paye nisa ruwe ne.
30 Aige, ru parugeta rok wa okai tu shiknak ainu an awa, Yesu shirikush shiri humi nu chiki hawe ashte hine ene itak-hi :— Dabid koro Poho ne Utarapa, un erampokiwen wa un kore, ari itak.
Ayke, ru paruketa rok wa okay tu siknak aynu an awa, Yesu sirikus siri humi nu ciki hawe aste hine ene itak hi :— Dabid kor Poho ne Utarpa, un eranpokiwen wa un kore, ari itak.
31 Orowa, inne utara nei guru hawe more kuni ne kopao nisa ruwe ne: korota, nei utara naa naa hawe ashte wa Dabid koro Poho ne Utarapa, un erampokiwen wa un kore, ani itak nisa ruwe ne.
Orowa, inne utar ne kur hawe more kuni ne kopao nisa ruwe ne: koro ta, ne utar naa naa hawe aste wa Dabid kor Poho ne Utarpa, un eranpokiwen wa un kore, ani itak nisa ruwe ne.
32 Orowa, Yesu ash hine nei utara hotuyepakara wa ene itak-hi :— Kuani anak ne echi utara gusu nepi iki ambe eikoramkoro, ya?
Orowa, Yesu as hine ne utar hotuyepakara wa ene itak hi :— Kuani anakne eci utar kusu nep iki anpe eykoramkor, ya?
33 Orota nei utara ene itak-hi:— Utarapa, chitoro shiki amaka kuni chi koramkoro ash.
Oro ta ne utar ene itak hi:— Utarpa, ci=tor siki a=mak kuni ci koramkor as.
34 Orowa, Yesu erampokiwen wa kore hine shikihi tomooshma: orowa, nani nei utara aingare, orowa, Yesu oshi paye nisa ruwe ne.
Orowa, Yesu eranpokiwen wa kore hine sikihi tomoosma: orowa, nani ne utar a=inkar, orowa, Yesu osi paye nisa ruwe ne.
Markos 10.46-52 §116II
46 Orowa no, Yeriko ta araki: awa, koro koikara utara newa inne utara tura no Yeriko orowa no paye koro, Timaios poho Bartimaios ani ap reihei koro shiknak iyahup guru ru samta a wa an.
Orowano, Yeriko ta arki: awa, kor koykar utar newa inne utar turano Yeriko oro wano paye kor, Timayos poho Bartimayos ani ap rehe kor siknak iyahup kur ru sam ta a wa an.
47 Orowa, Nazaret kotan un Yesu ne sekoro nei guru nu chiki, hawe ashte heashi wa ene itak-hi :— Dabid koro Poho Yesu, en erampokiwen wa en kore, ari itak.
Orowa, Nazaret kotan un Yesu ne sekor ne kur nu ciki, hawe aste heasi wa ene itak hi :— Dabid kor Poho Yesu, en=eranpokiwen wa en=kore, ari itak.
48 Orowa, inne utara shinuma mo no an kuni ne ko-sakayokara: koroka, shinuma naa kasu no earikinne hawe ashte, Dabid koro Poho ne Aokai, en erampokiwen wa en kore, ari an itak ani ye.
Orowa, inne utar sinuma mo no an kuni ne ko-sakayokar: korka, sinuma naa kasuno earikinne hawe aste, Dabid kor Poho ne Aokay, en=eranpokiwen wa en=kore, ari an itak ani ye.
49 Orowa, Yesu ash wa nei guru hotuyekara yan, ari ye. Orowa, okai utara nei shiknak guru hotuyekara wa, ramu-ritetke yan! Hopuni, Shinuma e hotuyekara an na, ari itak.
Orowa, Yesu as wa ne kur hotuyekar yan, ari ye. Orowa, okay utar ne siknak kur hotuyekar wa, ramu-ritetke yan! Hopuni, Sinuma e hotuyekar an na, ari itak.
50 Orowa, shinuma anak ne koro mipi emaka hine hopunikatta wa Yesu orota ek nisa ruwe ne.
Orowa, sinuma anakne kor mipi emaka hine hopunikatta wa Yesu oro ta ek nisa ruwe ne.
51 Orota Yesu ese wa ene itak-hi :— E otta Ku ki kuni nep e kon rusui ya? Orota shiknak guru ene itak-hi :— Rabboni, ku ingara kuni ku kon rusui ruwe ne.
Oro ta Yesu ese wa ene itak hi :— E or ta Ku=ki kuni nep e=kor rusuy ya? Oro ta siknak kur ene itak hi :— Rabboni, ku=inkar kuni ku=kor rusuy ruwe ne.
52 Shinuma orota Yesu ene itak-hi :— Paye yan; e koro eishokor-i anak ne e iwangere nisa ruwe ne na, ari itak. Orowa, nei guru nani nukara wa ru otta Yesu osh oman nisa ruwe ne na.
Sinuma oro ta Yesu ene itak hi :— Paye yan; e=kor eysokor hi anakne e iwankere nisa ruwe ne na, ari itak. Orowa, ne kur nani nukar wa ru or ta Yesu os oman nisa ruwe ne na.
Roukos 18.35-43 §224II
35 Orowa, Yeriko kotan ehange no ek ita anak ne shine shiknak guru ru parurugeta a hine eungeraitep koramkoro korʼan ruwe ne:
Orowa, Yeriko kotan ehanke no ek hi ta anakne sine siknak kur ru parurke ta a hine eunkeraytep koramkor kor an ruwe ne:
36 awa, nei guru inne utara shirikush wa paye shiri nu chiki, nei paye-hi ikkewehe uwepekennu nisa ruwe ne.
awa, ne kur inne utar sirikus wa paye siri nu ciki, ne paye hi ikkewehe uwepekennu nisa ruwe ne.
37 Orowa, Nazaret kotan un Yesu shirikush shiri an sekoro anure nisa ruwe ne.
Orowa, Nazaret kotan un Yesu sirikus siri an sekor a=nure nisa ruwe ne.
38 Tata otta shinuma hawe ashte wa ene itak-hi :— Dabid poho ne Yesu, en erampokiwen wa en kore, ani itak.
Tata or ta sinuma hawe aste wa ene itak hi :— Dabid poho ne Yesu, en=eranpokiwen wa en=kore, ani itak.
39 Orowa, kotchaketa paye utara anak ne shinuma mo no an kuni kopao nisa ruwe ne: koroka, shinuma naa poron no hawe ashte wa :— Dabid koro poho, en erampokiwen wa en kore, ani itak nisa ruwe ne.
Orowa, kotcake ta paye utar anakne sinuma mo no an kuni kopao nisa ruwe ne: korka, sinuma naa poronno hawe aste wa :— Dabid kor poho, en=eranpokiwen wa en=kore, ani itak nisa ruwe ne.
40 Orowa, Yesu ash wa orota nei guru atura wa ek kuni kashpaotte: orowa, shinuma ehange no an ita anak ne :—
Orowa, Yesu as wa oro ta ne kur a=tura wa ek kuni kaspaotte: orowa, sinuma ehanke no an hi ta anakne :—
41 E otta Ku ki kuni nekon a e kon rusui ya? ani, shinuma otta nu. Nei guru ene itak-hi :— Utarapa, ku ingara kuni ne ku kon rusui,
E or ta Ku=ki kuni nekona e=kor rusuy ya? ani, sinuma or ta nu. Ne kur ene itak hi :— Utarpa, ku=inkar kuni ne ku=kor rusuy,
42 ani itak. Orota Yesu ene itak-hi :— Ingara yan, e koro eisbokor-i anak ne e iwangere nisa ruwe ne na, sekoro itak.
ani itak. Oro ta Yesu ene itak hi :— Inkar yan, e=kor eispokor hi anakne e iwankere nisa ruwe ne na, sekor itak.
43 Orowa, nani nei guru ingara wa Kamui ko-oripak hine Shinuma osh oman: obitta no okai utara anak ne nei ambe nukara chiki Kamui ko-iramye nisa ruwe ne na.
Orowa, nani ne kur inkar wa Kamuy ko-oripak hine Sinuma os oman: opittano okay utar anakne ne anpe nukar ciki Kamuy ko-iramye nisa ruwe ne na.