共観表
Yoannes 10.41-11.52 §94X
41 Awa, inne utara Shinuma orota araki wa ene itak-hi: Son no poka, Yoannes anak ne shirosh ki shomoki: koroka, tan guru gusu Yoannes ye obitta no okai orushpe anak ne son no ambe ne, sekoro itak.
Awa, inne utar Sinuma oro ta arki wa ene itak hi: Sonno poka, Yoannes anakne siros ki somo ki: korka, tan kur kusu Yoannes ye opittano okay oruspe anakne sonno anpe ne, sekor itak.
42 Orowa, toan ushiketa okai inne utara Shinuma eishokon nisa ruwe ne na.
Orowa, toan uske ta okay inne utar Sinuma eysokor nisa ruwe ne na.
11:1 Orowa, Maria newa koro sapo Maruta koro kotan ta, Betania kotan ta, Razaros ani aye shine ainu tashum ki wa an ruwe ne.
Orowa, Maria newa kor sapo Maruta kor kotan ta, Betania kotan ta, Razaros ani a=ye sine aynu tasum ki wa an ruwe ne.
2 Tashum ki Razaros anak ne Utarapa kata shum ota wa koro otop ani Shinuma koro chikiri piruba Maria koro ainu iriwak ne ruwe ne.
Tasum ki Razaros anakne Utarpa kata sum ota wa kor otop ani Sinuma kor cikiri pirpa Maria kor aynu irwak ne ruwe ne.
3 Tambe gusu, mat uiriwak utara Yesu orota teshkara wa ene itakte-hi :— Utarapa, E ikatairotke a guru tashum wa an ruwe ne, ari itakte.
Tanpe kusu, mat uyriwak utar Yesu oro ta teskar wa ene itakte hi :— Utarpa, E ikatayrotke a kur tasum wa an ruwe ne, ari itakte.
4 Koroka, Yesu nei ambe nu wa :— Tan tashum anak ne rai gusu an tashum shomo ne, ani Kamui Poho nupektere, Kamui nupeki gusu an tashum ne, ari itak.
Korka, Yesu ne anpe nu wa :— Tan tasum anakne ray kusu an tasum somo ne, ani Kamuy Poho nupektere, Kamuy nupeki kusu an tasum ne, ari itak.
5 Yesu anak ne Maruta hemhem, Maruta koro turesh hemhem, Razaros hemhem omap nisa ruwe ne.
Yesu anakne Maruta hemhem, Maruta kor tures hemhem, Razaros hemhem omap nisa ruwe ne.
6 Tambe gusu, shinuma tashum wa an sekorʼambe nu chiki, tane an ushiketa naa tutko okai nisa ruwe ne.
Tanpe kusu, sinuma tasum wa an sekor anpe nu ciki, tane an uske ta naa tutko okay nisa ruwe ne.
7 Orowa, tap okaketa koikara utara otta :— Shui Yudea moshirʼotta paye anro, ari itak.
Orowa, tap okake ta koykar utar or ta :— Suy Yudea mosir or ta paye an ro, ari itak.
8 Orota koikara utara ene itak-hi :— Rabbi, tap nahun Yudea un utara E shuma kopiyekara rusui, awa, shui nei orota E oman a?
Oro ta koykar utar ene itak hi :— Rabbi, tap nahun Yudea un utar E suma kopiyekar rusuy, awa, suy ne oro ta E oman a?
9 Yesu ene ese-hi :— Tokapto ta tup ikashima wan pakihi isam ruwe he an? Tokapto uturuta ainu apkash ko anak ne epetchiu shomoki, tan-moshiri un pekere nukara ruwe ne gusu ne na.
Yesu ene ese hi :— Tokapto ta tup ikasma wan pakihi isam ruwe he an? Tokapto utur ta aynu apkas ko anakne epetciw somo ki, tan-mosir un peker nukar ruwe ne kusu ne na.
10 Koroka, kunne to ta ainu apkash ko anak ne epetchiu ruwe ne, pekere anak ne koro oshiketa isam ruwe ne gusu ne na. Yesu tap ambe ye:
Korka, kunne to ta aynu apkas ko anakne epetciw ruwe ne, peker anakne kor oske ta isam ruwe ne kusu ne na. Yesu tapanpe ye:
11 Orowa no, Chikoro ikatairotke Razaros anak ne mokon ruwe ne; koroka, Ku oman katu anak ne shinuma mososo kuni gusu an ambe ne.
Orowano, Ci=kor ikatayrotke Razaros anakne mokor ruwe ne; korka, Ku=oman katu anakne sinuma mososo kuni kusu an anpe ne.
12 Tambe gusu, koikara utara Shinuma otta ene itak-hi :— Utarapa, shinuma mokoro chiki anak ne riten kusu ne, ari itak.
Tanpe kusu, koykar utar Sinuma or ta ene itak hi :— Utarpa, sinuma mokor ciki anakne riten kusu ne, ari itak.
13 Koroka, Yesu anak ne shinuma rai-i epeka no tap ye nisa ruwe ne; koroka, Razaros mokoro wa shini wa an sekoro, Shinuma ye ani nei utara yainu ruwe ne.
Korka, Yesu anakne sinuma ray hi epeka no tap ye nisa ruwe ne; korka, Razaros mokor wa sini wa an sekor, Sinuma ye ani ne utar yaynu ruwe ne.
14 Tambe gusu, Razaros rai ruwe ne, sekoro nei utara otta Yesu irammakaka ye.
Tanpe kusu, Razaros ray ruwe ne, sekor ne utar or ta Yesu irammakaka ye.
15 Orowa, Kuani toada isam-i echi utara gusu Ku yaikopuntek, echi utara eishokoro kuni gusu ne na; yakka orota paye anro, ari itak.
Orowa, Kuani toata isam hi eci utar kusu Ku=yaykopuntek, eci utar eysokor kuni kusu ne na; yakka oro ta paye an ro, ari itak.
16 Tambe gusu, Didimos ani aye Tomas anak ne tura an koikara utara otta, Chi utara ne yakka paye wa Shinuma tura rai anro, ari itak.
Tanpe kusu, Didimos ani a=ye Tomas anakne tura an koykar utar or ta, Ci utar ne yakka paye wa Sinuma tura ray an ro, ari itak.
17 Yesu ek koro anak ne shinuma tane ine rereko uturu tushiri oro aomare a an wa an ani nu ruwe ne.
Yesu ek kor anakne sinuma tane ine rerko uturu tusiri oro a=omare a an wa an ani nu ruwe ne.
18 Betania kotan anak Yerusarem machiya ehange wa arawan cho ikashima hotne cho pakno patek kattuima ruwe ne;
Betania kotan anak Yerusarem maciya ehanke wa arwan co ikasma hotne co pakno patek kattuyma ruwe ne;
19 awa, koro ainu iriwak gusu Maruta newa Maria ramu-ritenga kuni ne Yudea un utara araki wa okai ruwe ne.
awa, kor aynu irwak kusu Maruta newa Maria ramu-ritenka kuni ne Yudea un utar arki wa okay ruwe ne.
20 Tambe gusu, Yesu ek korʼan sekoro Maruta nu chiki, ekanok gusu oman-nisa ruwe ne: koroka, Maria anak ne naa chisei ta a kane an ruwe ne.
Tanpe kusu, Yesu ek kor an sekor Maruta nu ciki, ekanok kusu oman-nisa ruwe ne: korka, Maria anakne naa cise ta a kane an ruwe ne.
21 Orowa, Yesu otta Maruta ene itak-hi :— Utarapa, Aokai teda E an chiki ku iriwak rai a shomoki ruwe ne.
Orowa, Yesu or ta Maruta ene itak hi :— Utarpa, Aokay teta E an ciki ku=irwak ray a somo ki ruwe ne.
22 Tane ne yakka nep ne yakka Aokai Kamui koramkorope anak ne Kamui E kore sekorʼambe ku eramʼan, ani Maruta itak.
Tane ne yakka nep ne yakka Aokay Kamuy koramkorope anakne Kamuy E kore sekor anpe ku=eraman, ani Maruta itak.
23 E koro ainu iriwak hetopo-shiknu kusu ne, ari shinuma ye ruwe ne.
E=kor aynu irwak hetopo-siknu kusu ne, ari sinuma ye ruwe ne.
24 Orota Maruta ene itak-hi :— Okese an toho ta an hetopo-shiknu-i ta shinuma hetopo-shiknu kusu ne-hi ku eramʼan.
Oro ta Maruta ene itak hi :— Okes an toho ta an hetopo-siknu hi ta sinuma hetopo-siknu kusu ne hi ku=eraman.
25 Orota, Yesu ene itak-hi :— Kuani anak ne hetopo-shiknu ambe Ku ne, inotu Ku ne ruwe ne: En eishokoro guru anak ne rai yakka ishu kusu ne:
Oro ta, Yesu ene itak hi :— Kuani anakne hetopo-siknu anpe Ku ne, inotu Ku ne ruwe ne: En=eysokor kur anakne ray yakka i=su kusu ne:
26 samata, nen ne yakka ishu wa En eishokoro guru anak ne hembara pakno ne yakka rai shomoki ruwe ne.
sama ta, nen ne yakka i=su wa En=eysokor kur anakne henpara pakno ne yakka ray somo ki ruwe ne.
27 Eani anak tap ambe eishokoro ya? Orota :— Ruwe un, Utarapa, Aokai anak ne moshiri orota ek shiri Kamui koho ne Kiristo E ne ruwe ne, sekoro ku eishokon nisa ruwe ne, ani Maruta ye ruwe ne.
Eani anak tapanpe eysokor ya? Oro ta :— Ruwe un, Utarpa, Aokay anakne mosir oro ta ek siri Kamuy koho ne Kiristo E ne ruwe ne, sekor ku=eysokor nisa ruwe ne, ani Maruta ye ruwe ne.
28 Tan itak ye okere chiki shinuma oman wa arorokishne no koro saha Maria hotuyekara wa :— Epakashnu guru ek wa an hine e hotuyekara ruwe ne, sekoro itak.
Tan itak ye okere ciki sinuma oman wa arorkisneno kor saha Maria hotuyekar wa :— Epakasnu kur ek wa an hine e hotuyekar ruwe ne, sekor itak.
29 Shinuma nei ambe nu chiki chashnu no hopuni wa orota oman nisa ruwe ne.
Sinuma ne anpe nu ciki casnu no hopuni wa oro ta oman nisa ruwe ne.
30 (Yesu naa shomo machiya orota ek, Maruta etunangara ushiketa naa an ruwe ne na.)
(Yesu naa somo maciya oro ta ek, Maruta etunankar uske ta naa an ruwe ne na.)
31 Awa, chisei otta tura no okai wa shinuma omaoma Yudea un utara, Maria ekushkonna hopuni wa soita oman-i nukara chiki, shinuma rai guru echishkara gusu tushiri orota oman kuni ramu gusu, shinuma osh paye nisa ruwe ne.
Awa, cise or ta turano okay wa sinuma omaoma Yudea un utar, Maria ekuskonna hopuni wa soy ta oman hi nukar ciki, sinuma raykur e=ciskar kusu tusiri oro ta oman kuni ramu kusu, sinuma os paye nisa ruwe ne.
32 Tambe gusu, Maria anak ne Yesu an ushi ta ek wa Shinuma nukara chiki, koro chikiri samaketa hachiri wa orota ene itak-hi :— Utarapa, Aokai teda E an chiki, ku ainu iriwak anak ne rai a shomoki ruwe ne, ari itak.
Tanpe kusu, Maria anakne Yesu an usi ta ek wa Sinuma nukar ciki, kor cikiri samake ta hacir wa oro ta ene itak hi :— Utarpa, Aokay teta E an ciki, ku=aynu irwak anakne ray a somo ki ruwe ne, ari itak.
33 Tambe gusu, Yesu shinuma chish shiri nukara, samata, tura no araki Yudea un utara ne yakka chish shiri nukara chiki, shinuma keutum ta oro omande wa Yaikota yaichiukopoyere ruwe ne,
Tanpe kusu, Yesu sinuma cis siri nukar, sama ta, turano arki Yudea un utar ne yakka cis siri nukar ciki, sinuma kewtum ta oro omante wa Yaykota yayciwkopoyere ruwe ne,
34 aige, Inan ushiketa shinuma echi ande ya? ari itak. Utarapa, ek wa ingara, sekoro nei utara ye nisa ruwe ne. Yesu chish.
ayke, Inan uske ta sinuma eci=ante ya? ari itak. Utarpa, ek wa inkar, sekor ne utar ye nisa ruwe ne. Yesu cis.
35 Tambe gusu, Ingara, nep katairotke ki gusu Shinuma ikatairotke humi! ari Yudea un utara ye nisa ruwe ne.
Tanpe kusu, Inkar, nep katayrotke ki kusu Sinuma ikatayrotke humi! ari Yudea un utar ye nisa ruwe ne.
36 Koroka, sereke okai utara ene itak-hi :— Shiknak guru koro shiki maka tan guru anak ne, nei guru ne yakka iteki rai kuni ne kara eaikap ya?
Korka, serke okay utar ene itak hi :— Siknak kur kor siki maka tan kur anakne, ne kur ne yakka iteki ray kuni ne kar eaykap ya?
37 Tambe gusu, Yesu shui keutum uta oro omande hine tushiri orota ek ruwe ne. Tushiri anak ne poru ne, orowa, shuma apa otta aekopashte wa an ruwe ne. Shuma uk yan, ani Yesu itak.
Tanpe kusu, Yesu suy kewtum uta oro omante hine tusiri oro ta ek ruwe ne. Tusiri anakne poru ne, orowa, suma apa or ta a=ekopaste wa an ruwe ne. Suma uk yan, ani Yesu itak.
38 Rai guru koro mat iriwak Maruta Yesu otta ene itak-hi :— Utarapa, tane hura at: ine rere ko an ruwe gusu ne na.
Raykur kor mat irwak Maruta Yesu or ta ene itak hi :— Utarpa, tane hura at: ine rere ko an ruwe kusu ne na.
39 Orota Yesu ene itak-hi :— Eani eishokoro yak anak ne Kamui nupeki e nukara kusu ne, ani e otta Ku ye shomoki ya? ari itak.
Oro ta Yesu ene itak hi :— Eani eysokor yakanak ne Kamuy nupeki e nukar kusu ne, ani e or ta Ku=ye somo ki ya? ari itak.
40 Orowa no, nei shuma auk ruwe ne. Awa, Yesu hepuni wa ene itak-hi :— Michi, Aokai En nu nisa ruwe ne gusu Ku yaiiraige ash na.
Orowano, ne suma auk ruwe ne. Awa, Yesu hepuni wa ene itak hi :— Mici, Aokay En=nu nisa ruwe ne kusu Ku=yayirayke as na.
41 Aokai ramma En nu shiri Ku eraman: koroka, okari ta roshki wa okai utara gusu Ku ye, nei utara anak ne Kuani E orowa no aomande guru Ku ne sekorʼi eishokoro kuni ne tap Ku ye nisa ruwe ne.
Aokay ramma En=nu siri Ku=eraman: korka, okari ta roski wa okay utar kusu Ku=ye, ne utar anakne Kuani E oro wano a=omante kur Ku ne sekor i eysokor kuni ne tap Ku=ye nisa ruwe ne.
42 Orowa, Shinuma tap ambe ye okere chiki, rui hau ani :— Razaros, soine wa ek, ari an itak ani ye ruwe ne.
Orowa, Sinuma tapanpe ye okere ciki, ruy haw ani :— Razaros, soyne wa ek, ari an itak ani ye ruwe ne.
43 Orowa no, rai guru anak ne senkaki ani teke newa chikiri akokarakari, nanuhu senkaki ani akamure wa an shiri soine nisa ruwe ne. Pita wa omande yan, ani Yesu utara otta ye ruwe ne.
Orowano, raykur anakne senkaki ani teke newa cikiri a=kokarkari, nanuhu senkaki ani a=kamure wa an siri soyne nisa ruwe ne. Pita wa omante yan, ani Yesu utar or ta ye ruwe ne.
44 Tambe gusu, Maria tura no araki Yudea un inne utara shinuma iki ambe nukara chiki, eishokon nisa ruwe ne.
Tanpe kusu, Maria turano arki Yudea un inne utar sinuma iki anpe nukar ciki, eysokor nisa ruwe ne.
45 Koroka, tumugeta okai utara anak ne Parisee un utara orota paye wa, Yesu ki ikip nure nisa ruwe ne.
Korka, tumke ta okay utar anakne Parisee un utar oro ta paye wa, Yesu ki iki p nure nisa ruwe ne.
46 Tambe gusu, Kamui kora kenru poro esapane utara newa Parisee un utara ukoramkoro wa ene itak-hi :— Nekon a chi ki ya? tan guru poron no okai shirosh ki ruwe ne gusu ne na.
Tanpe kusu, Kamuy kor kenru poro esapane utar newa Parisee un utar ukoramkor wa ene itak hi :— Nekona ci ki ya? tan kur poronno okay siros ki ruwe ne kusu ne na.
47 Tap korachi Shinuma moshima no chi ande ash chiki, ainu obitta Shinuma eishokoro: orowa, Roma moshirʼun utara ek wa chikoro kotan hemhem, utara uirup hemhem, isamka kusu ne, ari itak.
Tap koraci Sinuma mosmano ci ante as ciki, aynu opitta Sinuma eysokor: orowa, Roma mosir un utar ek wa ci=kor kotan hemhem, utar uyrup hemhem, isamka kusu ne, ari itak.
48 Koroka, nei tumugeta an shine ainu, Kaiapas ani an reihei koro ainu, nei paha ta Kamui kora kenru esapane utara esapane guru ne, nei guru anak ne utara otta ene itak-hi :—
Korka, ne tumke ta an sine aynu, Kayapas ani an rehe kor aynu, ne paha ta Kamuy kor kenru esapane utar esapane kur ne, ne kur anakne utar or ta ene itak hi :—
49 Echi utara nep ne yakka erampeutek, naa samata, utara ikiri obitta rai shomoki kuni ne, utara shirihine shine ainu rai kusu ne kunip echi esanniyo shomoki ruwe ne, ari itak.
Eci utar nep ne yakka eranpewtek, naa sama ta, utar ikiri opitta ray somo ki kuni ne, utar sirihi ne sine aynu ray kusu ne kunip eci=esanniyo somo ki ruwe ne, ari itak.
50 Tap ambe ye katu anak ne yaikota rengaine ye shomoki; koroka, nei paha ta Kamui kora kenru esapane utara esapane guru ne wa gusu, utara shirihine Yesu rai kusu ne, ani uweingara nisa ruwe ne;
Tapanpe ye katu anakne yaykota renkayne ye somo ki; korka, ne paha ta Kamuy kor kenru esapane utar esapane kur ne wa kusu, utar sirihi ne Yesu ray kusu ne, ani ueinkar nisa ruwe ne;
51 nei utara shirihine patek shomo ne, moshiri kata chichari wa okai Kamui poho utara shineanda uwekarapare kuni gusu ne na.
ne utar sirihi ne patek somo ne, mosir kata cicari wa okay Kamuy poho utar sineanta uwekarpare kuni kusu ne na.
52 Tambe gusu, nei toho wano Shinuma raige kuni nei utara esanniyo shiriki okai ruwe ne.
Tanpe kusu, ne toho wano Sinuma rayke kuni ne utar esanniyo siriki okay ruwe ne.
Markos 3.6-7A §26IV
6 Awa, Parisee un utara soyumba wa, nani nekon a iki wa Shinuma isamka eashkai ya, sekoro Herod un utara tura eukoramkon nisa ruwe ne.
Awa, Parisee un utar soyunpa wa, nani nekona iki wa Sinuma isamka easkay ya, sekor Herod un utar tura e=wkoramkor nisa ruwe ne.
7 Orowa, Yesu anak ne koro koikara utara tura atui orun ekohopi: awa, Gariraya wano an poro inne utara nei osh paye nisa ruwe ne:
Orowa, Yesu anakne kor koykar utar tura atuy orun ekohopi: awa, Gariraya wano an poro inne utar ne os paye nisa ruwe ne:
Yoannes 11.53-54 §95IV
53 Tambe gusu, Yesu tewa no poka yainukare no Yudea un utara tumugeta apkash shomoki no, nupuri samaketa an kotan Epraim machiya otta oman; awa, koro koikara utara tura no reushi nisa ruwe ne.
Tanpe kusu, Yesu tewano poka yaynukare no Yudea un utar tumke ta apkas somo ki no, nupuri samake ta an kotan Epraim maciya or ta oman; awa, kor koykar utar turano rewsi nisa ruwe ne.
54 Orowa, Yudea un utara koro Kamakush marapto ehange ruwe ne; awa, yaiashkannere kuni ne inne utara Kamakush marapto etokota kotan pishkaneke orowa no Yerusarem machiya orota paye nisa ruwe ne.
Orowa, Yudea un utar kor Kamakus marapto ehanke ruwe ne; awa, yayaskannere kuni ne inne utar Kamakus marapto etoko ta kotan piskaneke oro wano Yerusarem maciya oro ta paye nisa ruwe ne.
Markos 14.1A §156I
1 Tut ko okaketa Kamakush marapto, Pandane sak pan marapto an; orowa, Kamui kora kenru esapane utara newa, Kambi-nuye utara anak ne nuina no Shinuma kishima wa raige kuni hunara ruwe ne:
tutko okake ta Kamakus marapto, Pandane sak pan marapto an; orowa, Kamuy kor kenru esapane utar newa, Kampi-nuye utar anakne nuyna no Sinuma kisma wa rayke kuni hunara ruwe ne:
Yoannes 11.55A §96I
55 Tambe gusu, nei utara Yesu hunara wa, Kamui kora kenru ta roshki kane, utashpa ene itak-hi :— Nekon a echi yainu? Shinuma marapto gusu ek kuni echi ramu ya?
Tanpe kusu, ne utar Yesu hunara wa, Kamuy kor kenru ta roski kane, utaspa ene itak hi :— Nekona eci=yaynu? Sinuma marapto kusu ek kuni eci=ramu ya?
Yoannes 11.55B-12.1 §97X
55 Tambe gusu, nei utara Yesu hunara wa, Kamui kora kenru ta roshki kane, utashpa ene itak-hi :— Nekon a echi yainu? Shinuma marapto gusu ek kuni echi ramu ya?
Tanpe kusu, ne utar Yesu hunara wa, Kamuy kor kenru ta roski kane, utaspa ene itak hi :— Nekona eci=yaynu? Sinuma marapto kusu ek kuni eci=ramu ya?
56 Orowa no, Kamui kora kenru esapane utara newa Parisee un utara anak ne, nen ne kuru ka Shinuma an i eraman guru an yakun, akishima kuni ne orota nure, ani ikashpaotte nisa ruwe ne na.
Orowano, Kamuy kor kenru esapane utar newa Parisee un utar anakne, nen ne kur ka Sinuma an i eraman kur an yakun, a=kisma kuni ne oro ta nure, ani ikaspaotte nisa ruwe ne na.
12:1 Aige, Kamakush marapto iwan rereko etokota Yesu anak ne rai orowa no hetopo-shiknure Razaros an kotan Betania kotan orota ek nisa ruwe ne.
Ayke, Kamakus marapto iwan rerko etoko ta Yesu anakne ray oro wano hetopo-siknure Razaros an kotan Betania kotan oro ta ek nisa ruwe ne.