共観表
Yoannes 3.36-4.2 §31X
36 Poho eishokoro gurʼanak ne ramma okere shomoki inotu kon ruwe ne; koroka, Poho eishokoro shomoki gurʼanak ne inotu nukara shomoki, Kamui kinrakarape shinuma kashiketa an wa an ruwe ne na.
Poho eysokor kur anakne ramma okere somo ki inotu kor ruwe ne; korka, Poho eysokor somo ki kur anakne inotu nukar somo ki, Kamuy kinrakarape sinuma kasike ta an wa an ruwe ne na.
4:1 Yoannes kasu no Yesu anak ne inne koikara utara kara wa otta baptisma kore korʼan sekoro
Yoannes kasuno Yesu anakne inne koykar utar kar wa or ta paptisma kore kor an sekor
2 Parisee un utara nu shiri Utarapa eramʼan chiki (koroka, Yesu yaikota baptisma kore shomoki no koro koikara utara baptisma kore),
Parisee un utar nu siri Utarpa eraman ciki (korka, Yesu yaykota paptisma kore somo ki no kor koykar utar paptisma kore),
Mattaios 4.13-16 §19VII
13 Nazaret kotan ekohopi wa Zeburon kotan newa Naptari kotan okari an atui samta okai Kapernaum kotan orota oman wa an nisa ruwe ne;
Nazaret kotan ekohopi wa Zeburon kotan newa Naptari kotan okari an atuy sam ta okay Kapernaum kotan oro ta oman wa an nisa ruwe ne;
14 tambe anak ne Yorodan pet kushta, atui samta okai, Zeburon kotan hene, Naptari kotan hene, Oya moshirʼun guru koro Gariraya moshiri,
tanpe anakne Yorodan pet kus ta, atuy sam ta okay, Zeburon kotan hene, Naptari kotan hene, Oya mosir un kur kor Gariraya mosir,
15 Kunne-i oshiketa rok utara Poro nupeki nukan nisa, Shui, rai kurihi an ushiketa rok utara otta,
Kunne hi oske ta rok utar Poro nupeki nukar nisa, Suy, ray kurihi an uske ta rok utar or ta,
16 Nei utara otta pekere hetuku nisa ruwe ne na, sekoro uweingara guru ne Isaya ye itak auweomare kuni gusu an ambe ne ruwe ne na.
Ne utar or ta peker hetuku nisa ruwe ne na, sekor ueinkar kur ne Isaya ye itak a=ueomare kuni kusu an anpe ne ruwe ne na.
Yoannes 4.3 §32VII
3 Shinuma Yudea moshiri ekohopi wa shui Gariraya moshirʼotta oman nisa ruwe ne.
Sinuma Yudea mosir ekohopi wa suy Gariraya mosir or ta oman nisa ruwe ne.
Yoannes 4.4-42 §33X
4 Awa, Shinuma Samaria kotan kush kuni gusu ne ap nisa ruwe ne.
Awa, Sinuma Samaria kotan kus kuni kusu ne ap nisa ruwe ne.
5 Aige, Yakob anak ne koro poho Yosep otta koropare toitoi ehange no an Samaria un Sikar ani aporose machiya ta koshirepa:
Ayke, Yakob anakne kor poho Yosep or ta korpare toytoy ehanke no an Samaria un Sikar ani a=porse maciya ta kosirepa:
6 nei ushiketa Yakob koro shimpui an. Yesu anak ne payekai eshingi gusu, shimpui samaketa a nisa ruwe ne. Pakihi anak ju ni ji an pakihi ne ruwe ne na.
ne uske ta Yakob kor sinpuy an. Yesu anakne payekay esinki kusu, sinpuy samake ta a nisa ruwe ne. Pakihi anak ju ni ji an pakihi ne ruwe ne na.
7 Aine, Samaria kotan un shine shiwentep wakka ta gusu ek: awa, orota Yesu ene itak-hi :— En ikure wa En kore, ani itak.
Ayne, Samaria kotan un sine siwentep wakkata kusu ek: awa, oro ta Yesu ene itak hi :— En=ikure wa En=kore, ani itak.
8 Koro koikara utara aep hok gusu machiya orun paye wa isam ruwe ne gusu ne na.
Kor koykar utar aep hok kusu maciya orun paye wa isam ruwe ne kusu ne na.
9 Nei Samaria un shiwentep anak ne tambe gusu Shinuma otta ene itak-hi :— Hemanda gusu Eani anak ne Yudea un guru E ne wa Samaria un shiwentep en otta wakka koramkoro ya? (Inambe gusu ne yakun, Yudea un utara anak ne Samaria un utara kopahaunu shomoki ruwe ne.)
Ne Samaria un siwentep anakne tanpe kusu Sinuma or ta ene itak hi :— Hemanta kusu Eani anakne Yudea un kur E ne wa Samaria un siwentep en or ta wakka koramkor ya? (Inanpe kusu ne yakun, Yudea un utar anakne Samaria un utar kopahawnu somo ki ruwe ne.)
10 Yesu ese wa orota ene itak-hi :— Eani anak ne Kamui korarape hemhem e eramʼan, samata, En ikure wa En kore ani an itak ani e otta ye guru hemhem e eamkiri yak anak, eani anak ne Shinuma otta koramkoro kusu ne, orowa, Shinuma ishu wakka e kore ash kusu ne na, ari itak.
Yesu ese wa oro ta ene itak hi :— Eani anakne Kamuy korarape hemhem e eraman, sama ta, En=ikure wa En=kore ani an itak ani e or ta ye kur hemhem e e=amkir yakanak, eani anakne Sinuma or ta koramkor kusu ne, orowa, Sinuma i=su wakka e kore as kusu ne na, ari itak.
11 Orota nei shiwentep ene itak-hi :— Nishpa, wakka ta kuni eyairamokotep shomo E koro, samata, shimpui ooho ruwe ne: tambe gusu, nei wano nei ishu wakka E koro ya?
Oro ta ne siwentep ene itak hi :— Nispa, wakkata kuni eyayramokotep somo E=kor, sama ta, sinpuy ooho ruwe ne: tanpe kusu, ne wano ne i=su wakka E=kor ya?
12 Tan shimpui un kore, samata, orowa no yaikota hemhem, koro poho utara hemhem, chikoikip hemhem iku chikoro michi Yakob kasu no an guru E ne ya?
Tan sinpuy un kore, sama ta, orowano yaykota hemhem, kor poho utar hemhem, cikoykip hemhem iku ci=kor mici Yakob kasuno an kur E ne ya?
13 Orota Yesu ese wa ene itak-hi :— Nen ne yakka tan wakka ku guru anak ne shui iku rusui kusu ne;
Oro ta Yesu ese wa ene itak hi :— Nen ne yakka tan wakka ku=kur anakne suy iku rusuy kusu ne;
14 koroka, nen ne yakka Ku koropare wakka iku guru anak ne ramma pakno iku rusui shomoki; koroka, otta Ku kore wakka anak ne ramma okere shomoki inotu otta purupuruge wakka shimpui nei kusu ne na.
korka, nen ne yakka Ku=korpare wakka iku kur anakne ramma pakno iku rusuy somo ki; korka, or ta Ku=kore wakka anakne ramma okere somo ki inotu or ta purpurke wakka sinpuy ne kusu ne na.
15 Shinuma otta shiwentep ene itak-hi :— Nishpa, iteki ku iku rusui hene ki, iteki wakka ta hene ki gusu eteun ku ek kuni ne kara wa en kore.
Sinuma or ta siwentep ene itak hi :— Nispa, iteki ku=iku rusuy hene ki, iteki wakkata hene ki kusu eteun ku=ek kuni ne kar wa en=kore.
16 Orota, e oman wa e hoku hotuyekara hine eteun araki yan.
Oro ta, e oman wa e hoku hotuyekar hine eteun arki yan.
17 Shiwentep ese wa otta ene itak-hi :— Hoku ku sak ruwe ne, ani itak. Orota Yesu ene itak-hi :— Hoku ku sak sekorʼan itak ani e ye katu anak ne pirika ruwe ne:
Siwentep ese wa or ta ene itak hi :— Hoku ku=sak ruwe ne, ani itak. Oro ta Yesu ene itak hi :— Hoku ku=sak sekor an itak ani e ye katu anakne pirka ruwe ne:
18 inambe gusu ne yakun, eani ashikne hoku e kon nisa, awa, tane e korobe ainu anak ne e hoku shomo ne ruwe ne; shunge sak no tap ambe e ye nisa ruwe ne na.
inanpe kusu ne yakun, eani asikne hoku e=kor nisa, awa, tane e=kor pe aynu anakne e hoku somo ne ruwe ne; sunke sak no tapanpe e ye nisa ruwe ne na.
19 Orota nei shiwentep ene itakhi :— Nishpa, Aokai anak ne Uweingara guru E ne ruwe ne sekoro ku esanniyo.
Oro ta ne siwentep ene itak hi :— Nispa, Aokay anakne Ueinkar kur E ne ruwe ne sekor ku=esanniyo.
20 Chikoro ekashi utara anak ne tan nupuri ta Kamui ko-ongami, awa, Yerusarem kotan anak ne utara ongami kusu ne a ushike ne, ani echi ye ruwe ne, sekoro itak.
Ci=kor ekasi utar anakne tan nupuri ta Kamuy ko-onkami, awa, Yerusarem kotan anakne utar onkami kusu ne a usike ne, ani eci=ye ruwe ne, sekor itak.
21 Orota Yesu ene itak-hi :— Shiwentep, En eishokoro yan, echi utara anak ne tan nupuri ta hene, Yerusarem kotan ta hene Michi shomo ko-ongami pakihi ek kusu ne.
Oro ta Yesu ene itak hi :— Siwentep, En=eysokor yan, eci utar anakne tan nupuri ta hene, Yerusarem kotan ta hene Mici somo ko-onkami pakihi ek kusu ne.
22 Echi eramushkarep echi koongami ruwe ne: chi utara anak ne eramu ambe ongami ash ruwe ne: inambe gusu ne yakun, kashiobiuki-i anak ne Yudea un utara wano an ambe ne ruwe ne gusu ne na.
Eci=eramuskare p eci=koonkami ruwe ne: ci utar anakne eramu anpe onkami as ruwe ne: inanpe kusu ne yakun, kasiopiwki hi anakne Yudea un utar wano an anpe ne ruwe ne kusu ne na.
23 Son no ongami utara anak ne ramat newa sonep ani Michi koongami pakihi ek ruwe ne, tane ek an ruwe ne: Michi anak ne nei no okai ongami utara hunara ruwe ne gusu ne na.
Sonno onkami utar anakne ramat newa sonep ani Mici koonkami pakihi ek ruwe ne, tane ek an ruwe ne: Mici anakne néno okay onkami utar hunara ruwe ne kusu ne na.
24 Kamui anak ne Ramat ne: Shinuma ko-ongami utara anak ne ramat newa sonep ani ko-ongami kusu ne ap ruwe ne.
Kamuy anakne Ramat ne: Sinuma ko-onkami utar anakne ramat newa sonep ani ko-onkami kusu ne ap ruwe ne.
25 Shinuma otta nei shiwentep ene itak-hi :— (Kiristo ani aye) Messia ek shiri ku eraman: Shinuma ek chiki nep ne yakka an okaibe un nure kusu ne.
Sinuma or ta ne siwentep ene itak hi :— (Kiristo ani a=ye) Messia ek siri ku=eraman: Sinuma ek ciki nep ne yakka an okaype un nure kusu ne.
26 Orota Yesu ene itak-hi :— E otta ye Kuani anak nei guru Ku ne ruwe ne, ari itak.
Oro ta Yesu ene itak hi :— E or ta ye Kuani anakne kur Ku ne ruwe ne, ari itak.
27 Tata otta koro koikara utara araki; awa, Shinuma shiwentep tura ko-itak an shiri enushkari nisa ruwe ne; yakka :— Hemanda e hunara ya hene, nep gusu nei shiwentep tura ko-itak ya hene, ye guru isam ruwe ne.
Tata or ta kor koykar utar arki; awa, Sinuma siwentep tura ko-itak an siri enuskari nisa ruwe ne; yakka :— Hemanta e hunara ya hene, nep kusu ne siwentep tura ko-itak ya hene, ye kur isam ruwe ne.
28 Aine, nei shiwentep anak ne koro wakka op ande wa machiya orota oman hine utara otta ene itak-hi :—
Ayne, ne siwentep anakne kor wakka op ante wa maciya oro ta oman hine utar or ta ene itak hi :—
29 Nep ne yakka ku iki ambe obitta en nure guru nukara gusu araki wa ingara yan; tambe anak ne Kiristo ne eashkaibe ne ruwe he an? ari itak.
Nep ne yakka ku=iki anpe opitta en=nure kur nukar kusu arki wa inkar yan; tanpe anakne Kiristo ne easkay pe ne ruwe he an? ari itak.
30 Orowa, utara machiya wa soyumba hine Shinuma orun araki shiri okai.
Orowa, utar maciya wa soyunpa hine Sinuma orun arki siri okay.
31 Nei rapoketa Shinuma koikara utara onishnishi wa ene itak-hi :—
Ne rapoketa Sinuma koykar utar onisnisi wa ene itak hi :—
32 Rabbi, ibe yan, ari itak. Koroka, orota Shinuma ene itak-hi :— Echi eramushkare no an e kuni aep Ku goro, ari itak.
Rabbi, ipe yan, ari itak. Korka, oro ta Sinuma ene itak hi :— Eci=eramuskare no an e kuni aep Ku=kor, ari itak.
33 Tambe gusu koikara utara utashpa ene itak-hi :— Nen ka Shinuma ibere guru an a?
Tanpe kusu koykar utar utaspa ene itak hi :— Nen ka Sinuma ipere kur an a?
34 Orota Yesu ene itak-hi :— Ku aep anak ne En omande guru koro irenga hemhem ki, Shinuma moni kara okere hemhem ki ambe ne ruwe ne.
Oro ta Yesu ene itak hi :— Ku=aep anakne En=omante kur kor irenka hemhem ki, Sinuma moni kar okere hemhem ki anpe ne ruwe ne.
35 Naa ine chup an, orowa, nange pa ek sekoro echi ye shomoki ya? Echi otta Ku ye, ingara, echi shikihi hepuni wa toi orun ingara yan, tane nange pa gusu re tan ruwe ne.
Naa ine cup an, orowa, nanke pa ek sekor eci=ye somo ki ya? Eci or ta Ku=ye, inkar, eci=sikihi hepuni wa toy orun inkar yan, tane nanke pa kusu re tan ruwe ne.
36 Nange guru anak ne pummaha koro wa ramma okere shomoki inotu gusu ibehe eumashnu; toita guru newa nange guru utura yaikopuntek kuni gusu ne na.
Nanke kur anakne pummaha kor wa ramma okere somo ki inotu kusu ipehe ewmasnu; toyta kur newa nanke kur utura yaykopuntek kuni kusu ne na.
37 Shinen etoita shinen nange sekorʼan itak tambe gusu son no ambe ne.
Sinen etoyta sinen nanke sekor an itak tanpe kusu sonno anpe ne.
38 Otta shomo echi monraige ushike echi nange kuni gusu echi payere ash: moshima okai utara monraige, awa, nei moni otta echi ahup nisa ruwe ne.
Or ta somo eci=monrayke usike eci=nanke kuni kusu eci=payere as: mosma okay utar monrayke, awa, ne moni or ta eci=ahup nisa ruwe ne.
39 Orowa, nei machiya orowa no inne Samaria un utara anak ne :— Nep ne yakka ku iki ambe obitta Shinuma en nure, sekoro paweteshu ki shiwentep ye itak gusu eishokon nisa ruwe ne na.
Orowa, ne maciya oro wano inne Samaria un utar anakne :— Nep ne yakka ku=iki anpe opitta Sinuma en=nure, sekor pawetesu ki siwentep ye itak kusu eysokor nisa ruwe ne na.
40 Tambe gusu, Shinuma orota Samaria kotan un utara araki chiki tura no reushi kuni koramkoro: awa, tut ko uturuta nei utara tura no reushi nisa ruwe ne.
Tanpe kusu, Sinuma oro ta Samaria kotan un utar arki ciki turano rewsi kuni koramkor: awa, tutko utur ta ne utar turano rewsi nisa ruwe ne.
41 Orowa, naa inne utara anak ne Shinuma ye itak gusu eishokoro;
Orowa, naa inne utar anakne Sinuma ye itak kusu eysokor;
42 aige, nei shiwentep otta ene hawe okai-hi :— Tane anak ne e ye itak gusu chi eishokoro shomoki: chi utara yaikota chi nu wa son no newa tambe anak ne moshiri kashiobiuki kunip ne sekoro chi eramʼan ruwe ne gusu ne na, ani itak.
ayke, ne siwentep or ta ene hawe okay hi :— Tane anakne e ye itak kusu ci eysokor somo ki: ci utar yaykota ci nu wa sonno newa tanpe anakne mosir kasiopiwki kunip ne sekor ci eraman ruwe ne kusu ne na, ani itak.
Mattaios 4.13-16 §19VII
13 Nazaret kotan ekohopi wa Zeburon kotan newa Naptari kotan okari an atui samta okai Kapernaum kotan orota oman wa an nisa ruwe ne;
Nazaret kotan ekohopi wa Zeburon kotan newa Naptari kotan okari an atuy sam ta okay Kapernaum kotan oro ta oman wa an nisa ruwe ne;
14 tambe anak ne Yorodan pet kushta, atui samta okai, Zeburon kotan hene, Naptari kotan hene, Oya moshirʼun guru koro Gariraya moshiri,
tanpe anakne Yorodan pet kus ta, atuy sam ta okay, Zeburon kotan hene, Naptari kotan hene, Oya mosir un kur kor Gariraya mosir,
15 Kunne-i oshiketa rok utara Poro nupeki nukan nisa, Shui, rai kurihi an ushiketa rok utara otta,
Kunne hi oske ta rok utar Poro nupeki nukar nisa, Suy, ray kurihi an uske ta rok utar or ta,
16 Nei utara otta pekere hetuku nisa ruwe ne na, sekoro uweingara guru ne Isaya ye itak auweomare kuni gusu an ambe ne ruwe ne na.
Ne utar or ta peker hetuku nisa ruwe ne na, sekor ueinkar kur ne Isaya ye itak a=ueomare kuni kusu an anpe ne ruwe ne na.
Yoannes 4.43 §34VII
43 Orowa, naa tut ko okaketa Shinuma nei kotan wano oman wa Gariraya moshiri orun arapa nisa ruwe ne.
Orowa, naa tutko okake ta Sinuma ne kotan wano oman wa Gariraya mosir orun arpa nisa ruwe ne.
Mattaios 13.57-58 §142I
57 Orowa, Shinuma gusu nei utara aureepetchiure nisa ruwe ne na. Koroka, Yesu nei utara otta ene itak-hi :— Uweingara guru anak ne yaikota koro moshiri ta hene koro unihi ta hene moshima an ushiketa ne yakun aeoripakbe ne, sekoro itak.
Orowa, Sinuma kusu ne utar awreepetciwre nisa ruwe ne na. Korka, Yesu ne utar or ta ene itak hi :— Ueinkar kur anakne yaykota kor mosir ta hene kor unihi ta hene mosma an uske ta ne yakun aeoripakpe ne, sekor itak.
58 Orowa, nei utara eumbipka keutum gusu, Shinuma nei kotan ta kiroro an iki ikip poron no shomo iki nisa ruwe ne na.
Orowa, ne utar eunpipka kewtum kusu, Sinuma ne kotan ta kiroro an iki iki p poronno somo iki nisa ruwe ne na.
Markos 6.4-6A §51I
4 Orowa nei utara orota Yesu ene itak-hi :— Uweingara guru anak ne yaikota koro kotan ta hene, koro uiriwak utara tumta hene, koro uni ta hene shomo ne chiki aeoripak sak no an ambe shomo ne ruwe ne, ari itak.
Orowa ne utar oro ta Yesu ene itak hi :— Ueinkar kur anakne yaykota kor kotan ta hene, kor uyriwak utar tum ta hene, kor uni ta hene somo ne ciki a=eoripak sak no an anpe somo ne ruwe ne, ari itak.
5 Orowa, nei ita kiroro an ikip iki eaikap ruwe ne, ouse moyo no okai tashum ki utara kata koro teke ande wa iwangere nisa ruwe ne.
Orowa, ne hi ta kiroro an iki p iki eaykap ruwe ne, owse moyono okay tasum ki utar kata kor teke ante wa iwankere nisa ruwe ne.
6 Nei utara eumbipkap Shinuma enushkari nisa ruwe ne na. Orowa, Shinuma okari okai kotan orun oman wa epakashnu nisa ruwe ne.
Ne utar eunpipkap Sinuma enuskari nisa ruwe ne na. Orowa, Sinuma okari okay kotan orun oman wa epakasnu nisa ruwe ne.
Yoannes 4.44 §35I
44 Inambe gusu ne yakun, uweingara guru anak ne koro kotan ta akooripak shomoki ruwe ne sekoro Yesu yaikota paweteshu ki nisa ruwe ne.
Inanpe kusu ne yakun, ueinkar kur anakne kor kotan ta a=kooripak somo ki ruwe ne sekor Yesu yaykota pawetesu ki nisa ruwe ne.
Yoannes 4.45-46A §36X
45 Tambe gusu, Shinuma oman wa Gariraya moshiri ta ek chiki Gariraya un utara Shinuma uk nisa ruwe ne, nei utara ne yakka marapto an gusu paye wa Yerusarem kotan ta marapto an rapoketa Shinuma ki okaibe obitta nukan nisa ruwe ne gusu ne na.
Tanpe kusu, Sinuma oman wa Gariraya mosir ta ek ciki Gariraya un utar Sinuma uk nisa ruwe ne, ne utar ne yakka marapto an kusu paye wa Yerusarem kotan ta marapto an rapoketa Sinuma ki okaype opitta nukar nisa ruwe ne kusu ne na.
46 Tambe gusu, shui Shinuma nei wakka tonoto ne kara Gariraya moshirʼun Kana kotan ta ek Orowa, Kapernaum kotan ta koro okkai poho tashum ki shine tono an.
Tanpe kusu, suy Sinuma ne wakka tonoto ne kar Gariraya mosir un Kana kotan ta ek Orowa, Kapernaum kotan ta kor okkay poho tasum ki sine tono an.
Mattaios 8.5-10 §64III
5 Orowa, Shinuma Kapernaum kotan ta shirepa chiki, ashikne hotne tumi-koro utara esapane guru koramkoro wa Shinuma otta ek hine ene itak-hi :—
Orowa, Sinuma Kapernaum kotan ta sirepa ciki, asikne hotne tumi-kor utar esapane kur koramkor wa Sinuma or ta ek hine ene itak hi :—
6 Utarapa, Ku uni ta shine heikachi tusushke tashum shi no yupke hike ki wa hotke wa an, ani itak.
Utarpa, Ku=uni ta sine hekaci tususke tasum sino yupke hike ki wa hotke wa an, ani itak.
7 Orota Shinuma ene ye-hi :—
Oro ta Sinuma ene ye hi :—
8 Ku ek wa iwangere kusu ne — sekoro itak. Utarapa, ku kotʼchisei kitai choropoketa ahun-i shi no ku oripak an, ouse itak ye wa en kore, yakun, ku goro heikachi aiwangere kusu ne.
Ku=ek wa iwankere kusu ne — sekor itak. Utarpa, ku=kot cise kitay corpoke ta ahun hi sino ku=oripak an, owse itak ye wa en=kore, yakun, ku=kor hekaci aywankere kusu ne.
9 Kuani ne yakka mondum korope ku ne ruwe ne, en tutanu tumi-koro utara okai: shinen otta, oman ani ku itak chiki, oman; shui ek ani moshima guru otta ku ye koro, ek: orowa, ku usshiune guru otta tambe kara yan sekoro ku ye yakun, kan ruwe ne gusu ne na — sekoro nei tumi-koro utara esapane guru ye ruwe ne.
Kuani ne yakka montum kor pe ku ne ruwe ne, en=tutanu tumi-kor utar okay: sinen or ta, oman ani ku=itak ciki, oman; suy ek ani mosma kur or ta ku=ye kor, ek: orowa, ku=ussiw ne kur or ta tanpe kar yan sekor ku=ye yakun, kan ruwe ne kusu ne na — sekor ne tumi-kor utar esapane kur ye ruwe ne.
10 Orowa, Yesu tan itak nu chiki iyokunnure, aige, osh araki utara otta ene itak-hi :— Son no echi otta Ku ye, Israeru un utara tumugeta ne yakka naa shomo tap korachi an poro eishokor-i Ku nukara eramushkare.
Orowa, Yesu tan itak nu ciki iyokunnure, ayke, os arki utar or ta ene itak hi :— Sonno eci or ta Ku=ye, Israeru un utar tumke ta ne yakka naa somo tap koraci an poro eysokor hi Ku=nukar eramuskare.
Roukos 7.1-9 §65III
1 Orowa, Shinuma ye orushpe obitta no okai utara anure okere chiki; Kapernaum kotan orun oman nisa ruwe ne.
Orowa, Sinuma ye oruspe opittano okay utar a=nure okere ciki; Kapernaum kotan orun oman nisa ruwe ne.
2 Orowa, shine kenturion koro aoshkoro usshiune guru tashum ki wa tane rai etokooiki ruwe ne.
Orowa, sine kenturion kor aoskoro ussiw ne kur tasum ki wa tane ray etokooyki ruwe ne.
3 Awa, nei guru Yesu gusu an orushpe nu chiki, orota Yudea un utara koro ekashi payere wa, Shinuma ek wa koro usshiune guru kashiobiuki kuni koramkore nisa ruwe ne.
Awa, ne kur Yesu kusu an oruspe nu ciki, oro ta Yudea un utar kor ekasi payere wa, Sinuma ek wa kor ussiw ne kur kasiopiwki kuni koramkore nisa ruwe ne.
4 Orowa shinuma utara Yesu orota araki, aige, ramuosshi wano koramkoro wa ene itak-hi :— Shinuma gusu nei no ki kuni nei guru oripak an ainu ne;
Orowa sinuma utar Yesu oro ta arki, ayke, ramuossi wano koramkor wa ene itak hi :— Sinuma kusunéno ki kuni ne kur oripak an aynu ne;
5 chi koro moshirʼun utara ko katairotke, orowa, chi utara gusu shine Uwekarapa chisei kan nisa ruwe ne gusu ne na, ari itak.
ci kor mosir un utar ko katayrotke, orowa, ci utar kusu sine Uekarpa cise kan nisa ruwe ne kusu ne na, ari itak.
6 Orowa, Yesu nei utara tura no oman nisa ruwe ne. Tane koro chisei ehange no ek ita anak ne nei kenturion anak ne nimaraha teshkara wa Yesu otta ene itakte-hi :— Utarapa, iteki yaikota yai-shingere; Aokai ku kot chisei kitai choropoketa ahun shiri ku eoripak an na:
Orowa, Yesu ne utar turano oman nisa ruwe ne. Tane kor cise ehanke no ek hi ta anakne ne kenturion anakne nimaraha teskar wa Yesu or ta ene itakte hi :— Utarpa, iteki yaykota yay-sinkere; Aokay ku=kot cise kitay corpoke ta ahun siri ku=eoripak an na:
7 kuani ne yakka yaikota E otta ku oman kuni ko-oripak ruwe ne gusu ne na: koroka, itak ye wa en kore, yak anak ne ku goro heikachi aiwangere kusu ne.
kuani ne yakka yaykota E or ta ku=oman kuni ko-oripak ruwe ne kusu ne na: korka, itak ye wa en=kore, yakanak ne ku=kor hekaci aywankere kusu ne.
8 Kuani ne yakka mondum koro guru ku ne, en pokta tumi koro utara okai: orowa, oman, ari nei guru otta ku ye chiki, shinuma oman; moshima guru otta, ek, ani ku ye yakun, shinuma ek ruwe ne; orowa, tambe kara yan, ani ku usshiune guru otta ku ye ko anak ne, shinuma kan ruwe ne gusu ne na.
Kuani ne yakka montum kor kur ku ne, en=pok ta tumikor utar okay: orowa, oman, ari ne kur or ta ku=ye ciki, sinuma oman; mosma kur or ta, ek, ani ku=ye yakun, sinuma ek ruwe ne; orowa, tanpe kar yan, ani ku=ussiw ne kur or ta ku=ye ko anakne, sinuma kan ruwe ne kusu ne na.
9 Yesu tan itak nu chiki enushkari, aine, osh araki topaha utara orun hosari wa orota ene itak-hi: Echi otta Ku ye, Israeru un utara tumugeta tap korachi an yupke eishokor-i tane pakno Ku nukara shomoki ruwe ne.
Yesu tan itak nu ciki enuskari, ayne, os arki topaha utar orun hosari wa oro ta ene itak hi: Eci or ta Ku=ye, Israeru un utar tumke ta tap koraci an yupke eysokor hi tane pakno Ku=nukar somo ki ruwe ne.
Yoannes 4.46B-54 §37III
46 Tambe gusu, shui Shinuma nei wakka tonoto ne kara Gariraya moshirʼun Kana kotan ta ek Orowa, Kapernaum kotan ta koro okkai poho tashum ki shine tono an.
Tanpe kusu, suy Sinuma ne wakka tonoto ne kar Gariraya mosir un Kana kotan ta ek Orowa, Kapernaum kotan ta kor okkay poho tasum ki sine tono an.
47 Shinuma Yesu anak ne Yudea moshiri wano ek wa Gariraya moshiri ta an shiri nu chiki, orota oman wa koro poho iwangere gusu Shinuma san kuni ne koramkon nisa ruwe ne; shinuma rai ehange ruwe ne gusu ne na.
Sinuma Yesu anakne Yudea mosir wano ek wa Gariraya mosir ta an siri nu ciki, oro ta oman wa kor poho iwankere kusu Sinuma san kuni ne koramkor nisa ruwe ne; sinuma ray ehanke ruwe ne kusu ne na.
48 Tambe gusu, nei guru otta Yesu ene itak-hi:— Echi utara anak ne shirosh hemhem, iyokunnurep hemhem, nukara shomoki yak anak ne oara echi eishokoro shomoki ruwe ne.
Tanpe kusu, ne kur or ta Yesu ene itak hi:— Eci utar anakne siros hemhem, iyokunnurep hemhem, nukar somo ki yakanak ne oar eci=eysokor somo ki ruwe ne.
49 Orota nei tono ene itakhi :— Nishpa, ku poho rai etokota san wa en kore.
Oro ta ne tono ene itak hi :— Nispa, ku=poho ray etoko ta san wa en=kore.
50 Orota Yesu ene itak-hi :— E oman, e poho ishu korʼan ruwe ne, ari itak. Orowa, orota Yesu ye itak nei guru eishokoro hine oman nisa ruwe ne na.
Oro ta Yesu ene itak hi :— E oman, e poho i=su kor an ruwe ne, ari itak. Orowa, oro ta Yesu ye itak ne kur eysokor hine oman nisa ruwe ne na.
51 Awa, shinuma san shiri an rapoketa koro usshiune utara etunangara wa, koro poho ishu shiriki an ruwe ne, ani itak.
Awa, sinuma san siri an rapoketa kor ussiw ne utar etunankar wa, kor poho i=su siriki an ruwe ne, ani itak.
52 Tambe gusu, poho anak ne inan pakihi ta tumu nu heashi ruwe he an? sekoro nei utara otta nu nisa ruwe ne. Tambe gusu, numan ichi ji pakihi ta seisekmau tashum shinuma ande ruwe ne, sekoro itak.
Tanpe kusu, poho anakne inan pakihi ta tumu nu heasi ruwe he an? sekor ne utar or ta nu nisa ruwe ne. Tanpe kusu, numan ici ji pakihi ta seysekmaw tasum sinuma ante ruwe ne, sekor itak.
53 Orowa, orota, E poho ishu korʼan, ani an itak ani Yesu ye pakihi ne sekoro nei michi eraman: orowa, shinuma yaikota hemhem, uni un utara obitta hemhem, eishokon nisa ruwe ne.
Orowa, oro ta, E poho i=su kor an, ani an itak ani Yesu ye pakihi ne sekor ne mici eraman: orowa, sinuma yaykota hemhem, uni un utar opitta hemhem, eysokor nisa ruwe ne.
54 Tambe anak shui Yudea moshiri wano Gariraya moshiri ta ek okake Yesu tu ikinne no an kara shirosh ne ruwe ne na.
Tanpe anak suy Yudea mosir wano Gariraya mosir ta ek okake Yesu tu ikinne no an kar siros ne ruwe ne na.