共観表
Mattaios 12.9-13 §116II
9 Orowa Shinuma nei oro ekohopi wa oman, aige, nei utara koro uwekari chisei ta ahun nisa ruwe ne:
Orowa Sinuma ne oro ekohopi wa oman, ayke, ne utar kor uekari cise ta ahun nisa ruwe ne:
10 awa, ingarʼan, oatteke shipeshte shine ainu an. Orowa, eiyonnuppa ika hunara rusui gusu utara uwepekennu wa otta ene itak-hi :— Shini toho ta iwangere ambe anak ikashpaotte an i korachi ne ruwe he an? ari itak ruwe ne.
awa, inkar=an, oattek sipeste sine aynu an. Orowa, eiyonnuppa ika hunara rusuy kusu utar uwepekennu wa or ta ene itak hi :— Sini toho ta iwankere anpe anak ikaspaotte an i koraci ne ruwe he an? ari itak ruwe ne.
11 Nei utara otta Shinuma ene itak-hi :— Echi utara tumugeta inan guru shine hitsuji chikoikip koro wa an wa nei ambe shini toho ta shui oro-oshma chiki kishima wa yange shomoki ya?
Ne utar or ta Sinuma ene itak hi :— Eci utar tumke ta inan kur sine hitsuji cikoykip kor wa an wa ne anpe sini toho ta suy oro-osma ciki kisma wa yanke somo ki ya?
12 Hitsuji kasu no ainu anak ne nep oro an-i aesanniyop humi! Tambe gusu shini toho ta pirikap ki ambe anak ne pirikap an i ne ruwe ne na, ari itak.
hitsuji kasuno aynu anakne nep oro an hi aesanniyop humi! Tanpe kusu sini toho ta pirka p ki anpe anakne pirka p an i ne ruwe ne na, ari itak.
13 Orowa, nei ainu otta :— E teke turi yan, ani Shinuma ye. Orowa, aturi, aige, moshima an ambe korachi atumashnure nisa ruwe ne.
Orowa, ne aynu or ta :— E teke turi yan, ani Sinuma ye. Orowa, a=turi, ayke, mosma an anpe koraci atumasnure nisa ruwe ne.
Markos 2.27-3.5 §25II
27 Orota shui Shinuma ene itak hi :— Shini toho anak ne ainu gusu akarape ne, ainu anak ne Shini toho gusu akarape shomo ne ruwe ne; tambe gusu,
Oro ta suy Sinuma ene itak hi :— Sini toho anakne aynu kusu a=karpe ne, aynu anakne Sini toho kusu a=karpe somo ne ruwe ne; tanpe kusu,
28 Ainu Poho anak ne Shini toho poka enishpane ruwe ne na.
Aynu Poho anakne Sini toho poka enispane ruwe ne na.
3:1 Orowa, shui Shinuma Uwekarapa chisei orun ahun; awa nei ita teke shipeshte guru shinen an wa an.
Orowa, suy Sinuma Uekarpa cise orun ahun; awa ne hi ta teke sipeste kur sinen an wa an.
2 Aige, utara anak ne Shinuma eiyonnupba kuni ikkewe kon rusui gusu Shini toho ta shinuma iwangere kusu ne ya nukara gusu orun oshitkurukote nisa ruwe ne.
Ayke, utar anakne Sinuma eiyonnuppa kuni ikkewe kor rusuy kusu Sini toho ta sinuma iwankere kusu ne ya nukar kusu orun ositkurukote nisa ruwe ne.
3 Orowa, Shinuma teke shipeshte guru otta, — Utara tumugeta ash yan, ari itak.
Orowa, Sinuma teke sipeste kur or ta, — Utar tumke ta as yan, ari itak.
4 Aige, utara otta Shinuma ene itak-hi :— Shini toho ta pirikap ki hene wenbe ki hene, ramat shiknure hene raige hene iki katu inambe ikashpaotte uweomarepe ne ruwe he an?
Ayke, utar or ta Sinuma ene itak hi :— Sini toho ta pirka p ki hene wenpe ki hene, ramat siknure hene rayke hene iki katu inanpe ikaspaotte uweomarepe ne ruwe he an?
5 Koroka, nei utara mo no okai ruwe ne. Orowa, Shinuma nei utara sambe nishte wa gusu yairamkoiki hine irushka wa orun ekeshne ingara koro, nei ainu otta, — E teke turi yan, ari itak. Orowa koro teke turi, aige, atumashnure nisa ruwe ne.
Korka, ne utar mo no okay ruwe ne. Orowa, Sinuma ne utar sanpe niste wa kusu yayramkoyki hine iruska wa orun ekesne inkar kor, ne aynu or ta, — E teke turi yan, ari itak. Orowa kor teke turi, ayke, atumasnure nisa ruwe ne.
Roukos 6.6-11 §42II
6 Orowa no, moshima an Shini toho ta Shinuma Uwekarapa chisei ta ahun wa epakashnu wa an wa an ruwe ne: awa, shimon tek shipeshte shine ainu nei ushiketa an ruwe ne.
Orowano, mosma an Sini toho ta Sinuma Uekarpa cise ta ahun wa epakasnu wa an wa an ruwe ne: awa, simon tek sipeste sine aynu ne uske ta an ruwe ne.
7 Awa, eiyonnuppa kuni ikkewe kon rusui gusu, Shini toho ta Shinuma ainu iwangere ya shomo ya nukara gusu, kambi-nuye utara newa Parisee un utara Shinuma orun oshikkurukote nisa ruwe ne.
Awa, eiyonnuppa kuni ikkewe kor rusuy kusu, Sini toho ta Sinuma aynu iwankere ya somo ya nukar kusu, kampi-nuye utar newa Parisee un utar Sinuma orun osikkurkote nisa ruwe ne.
8 Koroka, Shinuma nei utara yainu i eramʼan: aige, teke shipeshte guru otta — Hopuni wa utara tumugeta ash yan — ani itak.
Korka, Sinuma ne utar yaynu i eraman: ayke, teke sipeste kur or ta — Hopuni wa utar tumke ta as yan — ani itak.
9 Orowa no, shinuma hopuni wa ash ruwe ne. Utara orota Yesu ene itak-hi :— Orushpe Ku nu; — Shini toho ta pirikap ki hene, wenbe ki hene, ramat shiknure hene, ramat raige hene, inambe kara katu ikashpaotte uweomarepe ne ya?
Orowano, sinuma hopuni wa as ruwe ne. Utar oro ta Yesu ene itak hi :— Oruspe Ku=nu; — Sini toho ta pirka p ki hene, wenpe ki hene, ramat siknure hene, ramat rayke hene, inanpe kar katu ikaspaotte uweomarepe ne ya?
10 Orowa, Shinuma utara orun ingara wa — E tekehe turi yan — nei guru otta ye nisa ruwe ne. Orowa nei no ki chiki tekehe aiwangere nisa.
Orowa, Sinuma utar orun inkar wa — E tekehe turi yan — ne kur or ta ye nisa ruwe ne. Orowa néno ki ciki tekehe aywankere nisa.
11 Koroka, nei utara wayasap kashpa, awa, Yesu otta nekon a iki kusu ne ya ani utashpa ukoramkon ruwe ne.
Korka, ne utar wayasap kaspa, awa, Yesu or ta nekona iki kusu ne ya ani utaspa ukoramkor ruwe ne.
Roukos 13.14-16 §165II
14 Orowa, Yesu anak ne Shini toho ta iwangere ki gusu Uwekarapa chisei esapane guru irushka wa inne utara otta ene itak-hi :— Otta utara monraige kuni to-ho iwan toho okai: tambe gusu, nei toho ta echi araki wa aiwangere yan, iteki Shini toho ta araki yan, ari itak.
Orowa, Yesu anakne Sini toho ta iwankere ki kusu Uekarpa cise esapane kur iruska wa inne utar or ta ene itak hi :— Or ta utar monrayke kuni to-ho iwan toho okay: tanpe kusu, ne toho ta eci=arki wa aywankere yan, iteki Sini toho ta arki yan, ari itak.
15 Koroka, Utarapa anak ne nei guru otta ese wa ene itak-hi :— Kankapkapeka utara, Shini toho ta obitta no okai echi utara anak ne kitchi orota ashirikote wa okai koro beko hene, koro roba hene pita wa wakka an ushike un ani shomoki ya?
Korka, Utarpa anakne ne kur or ta ese wa ene itak hi :— Kankapkapeka utar, Sini toho ta opittano okay eci utar anakne kitci oro ta a=sirkote wa okay kor peko hene, kor ropa hene pita wa wakka an usike un ani somo ki ya?
16 Orowa, tupesan pa ikashima wan pa uturuta Satan ani atupetupe wa an Abraham matne-po ne tan Shiwentep anak ne Shini toho ta tan katchakbe gusu apita kusu ne ap shomo ne ya?
Orowa, tupesan pa ikasma wan pa utur ta Satan ani a=tupetupe wa an Abraham matne-po ne tan Siwentep anakne Sini toho ta tan katcakpe kusu a=pita kusu ne ap somo ne ya?
Roukos 14.5-6 §177II
5 Orowa, nei okai utara otta Shinuma ene itak-hi :— Echi utara tumugeta inan guru ka koro roba hene beko hene shimpui otta hachiri yakun Shini toho ta nani nei ambe yange shomoki ya? ani itak.
Orowa, ne okay utar or ta Sinuma ene itak hi :— Eci utar tumke ta inan kur ka kor ropa hene peko hene sinpuy or ta hacir yakun Sini toho ta nani ne anpe yanke somo ki ya? ani itak.
6 Orowa, shui nei utara tap okai itakbe gusu ese ki eaikap nisa ruwe ne.
Orowa, suy ne utar tap okay itak pe kusu ese ki eaykap nisa ruwe ne.
Markos 3.6-7A §26IV
6 Awa, Parisee un utara soyumba wa, nani nekon a iki wa Shinuma isamka eashkai ya, sekoro Herod un utara tura eukoramkon nisa ruwe ne.
Awa, Parisee un utar soyunpa wa, nani nekona iki wa Sinuma isamka easkay ya, sekor Herod un utar tura e=wkoramkor nisa ruwe ne.
7 Orowa, Yesu anak ne koro koikara utara tura atui orun ekohopi: awa, Gariraya wano an poro inne utara nei osh paye nisa ruwe ne:
Orowa, Yesu anakne kor koykar utar tura atuy orun ekohopi: awa, Gariraya wano an poro inne utar ne os paye nisa ruwe ne:
Yoannes 10.39-40 §93IV
39 Shui nei utara Shinuma kishima kuni ramu, koroka, nei tekehe wano oman nisa ruwe ne na.
Suy ne utar Sinuma kisma kuni ramu, korka, ne tekehe wano oman nisa ruwe ne na.
40 Orowa, etokota Yoannes baptisma kore Yorodan pet kushta an ushiketa Yesu shui oman wa an nisa ruwe ne.
Orowa, etoko ta Yoannes paptisma kore Yorodan pet kus ta an uske ta Yesu suy oman wa an nisa ruwe ne.
Yoannes 11.53-54 §95IV
53 Tambe gusu, Yesu tewa no poka yainukare no Yudea un utara tumugeta apkash shomoki no, nupuri samaketa an kotan Epraim machiya otta oman; awa, koro koikara utara tura no reushi nisa ruwe ne.
Tanpe kusu, Yesu tewano poka yaynukare no Yudea un utar tumke ta apkas somo ki no, nupuri samake ta an kotan Epraim maciya or ta oman; awa, kor koykar utar turano rewsi nisa ruwe ne.
54 Orowa, Yudea un utara koro Kamakush marapto ehange ruwe ne; awa, yaiashkannere kuni ne inne utara Kamakush marapto etokota kotan pishkaneke orowa no Yerusarem machiya orota paye nisa ruwe ne.
Orowa, Yudea un utar kor Kamakus marapto ehanke ruwe ne; awa, yayaskannere kuni ne inne utar Kamakus marapto etoko ta kotan piskaneke oro wano Yerusarem maciya oro ta paye nisa ruwe ne.
Mattaios 4.23-25 §23I
23 Orowa, Yesu anak ne Gariraya moshirʼebitta apkash wa Kamui kora kenru ta epakashnu hemhem ki, moshiri gusu an pirika shongo ye wa upaskuma hemhem ki: naa samata, ainu tumugeta okai usa tashum newa usa shiyeye iwangere nisa ruwe ne na.
Orowa, Yesu anakne Gariraya mosir epitta apkas wa Kamuy kor kenru ta epakasnu hemhem ki, mosir kusu an pirka sonko ye wa upaskuma hemhem ki: naa sama ta, aynu tumke ta okay usa tasum newa usa siyeye iwankere nisa ruwe ne na.
24 Orowa, Siria moshirʼebitta Shinuma shiassuru ashte wa an, awa, usa okai tashum koro utara hemhem, usa okai iunin newa shiyeyepa utara hemhem, nitnep shikatkari utara hemhem nochi-iush utara hemhem, tushushke tashum ki utara hemhem, obitta atura wa Shinuma orota araki, aige, aiwangere nisa ruwe ne.
Orowa, Siria mosir epitta Sinuma siassuru aste wa an, awa, usa okay tasum kor utar hemhem, usa okay iwnin newa siyeyepa utar hemhem, nitnep sikatkari utar hemhem noci-ius utar hemhem, tususke tasum ki utar hemhem, opitta a=tura wa Sinuma oro ta arki, ayke, aywankere nisa ruwe ne.
25 Orowa no, Gariraya moshiri hemhem, Dekaporis moshiri hemhem, Yudea moshiri hemhem, orowa, Yorodan pet kushta okai utara hemhem, shi no inne no Shinuma osh paye nisa ruwe ne na.
Orowano, Gariraya mosir hemhem, Dekaporis mosir hemhem, Yudea mosir hemhem, orowa, Yorodan pet kus ta okay utar hemhem, sino inne no Sinuma os paye nisa ruwe ne na.
Markos 3.7B-11A §27I
7 Orowa, Yesu anak ne koro koikara utara tura atui orun ekohopi: awa, Gariraya wano an poro inne utara nei osh paye nisa ruwe ne:
Orowa, Yesu anakne kor koykar utar tura atuy orun ekohopi: awa, Gariraya wano an poro inne utar ne os paye nisa ruwe ne:
8 samata, Yudea wano hene, Yerusarem wano hene, Idumea wano hene, Yorodan pet ikushta wano hene, Tiros newa Sidon kotan okari wano hene, poro inne utara hemanda porobe Shinuma kara katu nu wa okai gusu orota araki nisa ruwe ne.
sama ta, Yudea wano hene, Yerusarem wano hene, Idumea wano hene, Yorodan pet ikusta wano hene, Tiros newa Sidon kotan okari wano hene, poro inne utar hemanta poro p Sinuma kar katu nu wa okay kusu oro ta arki nisa ruwe ne.
9 Orowa, ikineipeka inne utara orowa no iki ararapa kuni ne koro koikara utara pon chip etokooiki kuni gusu ye nisa ruwe ne:
Orowa, ikineypeka inne utar oro wano iki a=rarpa kuni ne kor koykar utar pon cip etokooyki kuni kusu ye nisa ruwe ne:
10 inambe gusu ne yakun, Shinuma inne utara iwangere okere; tambe gusu, nen ne yakka shiyeyepa utara tomooshma kuni ne Shinuma ukonumba shiriki okai ruwe ne.
inanpe kusu ne yakun, Sinuma inne utar iwankere okere; tanpe kusu, nen ne yakka siyeyepa utar tomoosma kuni ne Sinuma ukonunpa siriki okay ruwe ne.
11 Orowa, Ichakkeri ramat anak ne hembara ne yakka Shinuma nukara chiki, kotpoketa hachiripa, orowa, hawe ashte hine ene itak-hi :— Aokai anak ne Kamui Poho E ne ruwe ne, ari itak.
Orowa, Icakkeri ramat anakne henpara ne yakka Sinuma nukar ciki, kotpokta haciripa, orowa, hawe aste hine ene itak hi :— Aokay anakne Kamuy Poho E ne ruwe ne, ari itak.
Roukos 4.14-15 §17I
14 Orowa, Yesu anak ne Ramat kiroro ani Gariraya moshirʼotta hoshipi; awa, Shinuma gusu an assuru nei kotan shikapneka no ashte wa a an ruwe ne.
Orowa, Yesu anakne Ramat kiroro ani Gariraya mosir or ta hosipi; awa, Sinuma kusu an assuru ne kotan sikapneka no aste wa a an ruwe ne.
15 Orowa, Shinuma nei utara koro Uwekarapa chisei ta epakashnu, aige, utara obitta Shinuma ko-oripak nisa ruwe ne.
Orowa, Sinuma ne utar kor Uekarpa cise ta epakasnu, ayke, utar opitta Sinuma ko-oripak nisa ruwe ne.
Roukos 5.15 §34I
15 Koroka, Yesu assuru anak ne naa ashte, awa, nu gusu hene, katchakbe aiwangere gusu hene, inne topaha utara Shinuma otta araki nisa ruwe ne.
Korka, Yesu assuru anakne naa aste, awa, nu kusu hene, katcakpe aywankere kusu hene, inne topaha utar Sinuma or ta arki nisa ruwe ne.
Roukos 6.17-19 §45I
17 Shinuma nei utara tura san wa kapara ushketa inne topaha utara, Shinuma nu gusu hemhem, koro tashum aiwangere gusu hemhem akire gusu Yudea moshiri ebitta wano hene, Yerusarem machiya wano hene, Tiros newa Sidon kotan un atui sam wano hene araki inne utara tura no ash wa an ruwe ne;
Sinuma ne utar tura san wa kapar uske ta inne topaha utar, Sinuma nu kusu hemhem, kor tasum aywankere kusu hemhem a=kir kusu Yudea mosir epitta wano hene, Yerusarem maciya wano hene, Tiros newa Sidon kotan un atuy sam wano hene arki inne utar turano as wa an ruwe ne;
18 orowa, ichakkere ramat orowa no aranrusarakka utara aiwangere nisa ruwe ne.
orowa, icakkere ramat oro wano aranrusarakka utar aywankere nisa ruwe ne.
19 Awa; topaha utara obitta Shinuma tomooshma rusui; orowa no kiroro san wa an wa utara obitta iwangere nisa ruwe ne gusu ne na.
Awa; topaha utar opitta Sinuma tomoosma rusuy; orowano kiroro san wa an wa utar opitta iwankere nisa ruwe ne kusu ne na.
Yoannes 6.1-2 §46I
1 Tap okaketa Yesu anak ne Tiberias atui, Gariraya un atui kushketa oman.
Tap okake ta Yesu anakne Tiberias atuy, Gariraya un atuy kuske ta oman.
2 Awa, tashum ki utara kata Shinuma ki shirosh nukan nisa ruwe ne gusu, poro inne utara Shinuma osh paye nisa ruwe ne.
Awa, tasum ki utar kata Sinuma ki siros nukar nisa ruwe ne kusu, poro inne utar Sinuma os paye nisa ruwe ne.
Markos 3.11B-12 §28VIII
11 Orowa, Ichakkeri ramat anak ne hembara ne yakka Shinuma nukara chiki, kotpoketa hachiripa, orowa, hawe ashte hine ene itak-hi :— Aokai anak ne Kamui Poho E ne ruwe ne, ari itak.
Orowa, Icakkeri ramat anakne henpara ne yakka Sinuma nukar ciki, kotpokta haciripa, orowa, hawe aste hine ene itak hi :— Aokay anakne Kamuy Poho E ne ruwe ne, ari itak.
12 Orowa, iteki moshima guru otta Shinuma amkirire kuni ne shiri yupke no kashpaotte nisa ruwe ne na.
Orowa, iteki mosma kur or ta Sinuma amkirire kuni ne siri yupke no kaspaotte nisa ruwe ne na.
Roukos 4.41 §27VIII
41 Samata, nitne kamui ne yakka rui hawe ashte :— Aokai anak ne Kamui Poho E ne ruwe ne, sekorʼan itak koro inne utara orowa no oaship nisa ruwe ne. Orowa, Shinuma nei ap ko-sakayokara wa iteki nep ye kuni iki, Shinuma anak ne Kiristo ne sekorʼambe eramʼan, ruwe ne gusu ne na.
Sama ta, nitne kamuy ne yakka ruy hawe aste :— Aokay anakne Kamuy Poho E ne ruwe ne, sekor an itak kor inne utar oro wano oasi p nisa ruwe ne. Orowa, Sinuma ne ap ko-sakayokar wa iteki nep ye kuni iki, Sinuma anakne Kiristo ne sekor anpe eraman, ruwe ne kusu ne na.
Mattaios 10.1 §79II
1 Orowa, Shinuma anak ne koro koikara utara ne tun ikashima wa niu shihekote hotuyekara, aige, ichakkere ramat oashinge kuni mondum hemhem nep tashum ne yakka nep shiyeye ne yakka iwangere kuni mondum hemhem koropare nisa ruwe ne.
Orowa, Sinuma anakne kor koykar utar ne tun ikasma wa niw sihekote hotuyekar, ayke, icakkere ramat oasinke kuni montum hemhem nep tasum ne yakka nep siyeye ne yakka iwankere kuni montum hemhem korpare nisa ruwe ne.
Markos 3.13-16A §29II
13 Orowa, Shinuma nupuri hemesu, awa, orota rengaine utara hotuyepakara, aige, ahotuyepakara utara Shinuma otta paye nisa ruwe ne.
Orowa, Sinuma nupuri hemesu, awa, oro ta renkayne utar hotuyepakara, ayke, ahotuyepakara utar Sinuma or ta paye nisa ruwe ne.
14 Orowa, Shinuma tu niu ikashima wa niu tura no okai kuni ne,
Orowa, Sinuma tu niw ikasma wa niw turano okay kuni ne,
15 samata, upaskuma ki kuni ne payere gusu, orowa, nitne kamui oashinge kuni mondum akore kuni gusu are nisa ruwe ne:
sama ta, upaskuma ki kuni ne payere kusu, orowa, nitne kamuy oasinke kuni montum a=kore kuni kusu are nisa ruwe ne:
16 orowa, Simon anak ne Petros ani reikore:
orowa, Simon anakne Petros ani rékore:
Roukos 9.1-2 §86II
1 Orowa, Shinuma nei tun ikashima wan koikara utara uwekarapare wa obitta no okai nitne kamui oashinge hemhem ki, tashum iwangere hemhem ki kuni kiroro newa mondum koropare nisa ruwe ne.
Orowa, Sinuma ne tun ikasma wan koykar utar uwekarpare wa opittano okay nitne kamuy oasinke hemhem ki, tasum iwankere hemhem ki kuni kiroro newa montum korpare nisa ruwe ne.
2 Orowa, Kamui moshiri eupaskuma hemhem ki, tumu wen utara iwangere hemhem ki kuni ne payere.
Orowa, Kamuy mosir ewpaskuma hemhem ki, tumu wen utar iwankere hemhem ki kuni ne payere.
Mattaios 10.2-4 §80II
2 Orowa nei tun ikashima wan koikara utara reihei anak ne tambe ne ruwe ne: Hoshiki, Petros ari an reihei koro Simon newa koro iriwak Andreas an; Zebedaios poho Yakob newa koro iriwak ne Yoannes an;
Orowa ne tun ikasma wan koykar utar rehe anakne tanpe ne ruwe ne: Hoski, Petros ari an rehe kor Simon newa kor irwak Andreas an; Zebedayos poho Yakob newa kor irwak ne Yoannes an;
3 Pirippos newa Bartoromaios an; Tomas newa yaku etaye guru ne Mattaios an; Arpaios koro poho Yakob an; Taddaios an; Kanaan moshirʼun guru ne
Pirippos newa Bartoromayos an; Tomas newa yaku etaye kur ne Mattayos an; Arpayos kor poho Yakob an; Taddayos an; Kanaan mosir un kur ne
4 Simon newa Yesu ekoshi Kariot kotan un Youdas an ruwe ne.
Simon newa Yesu ekosi Kariot kotan un Yowdas an ruwe ne.
Markos 3.16B-19 §30II
16 orowa, Simon anak ne Petros ani reikore:
orowa, Simon anakne Petros ani rékore:
17 shui, Zebedaios koro poho Yakob newa shinuma koro iriwak Yoannes, tan utara Boanerges ani reikore, tambe anak Kamui-hum poho ikkewe ani an itak ne:
suy, Zebedayos kor poho Yakob newa sinuma kor irwak Yoannes, tan utar Boanerges ani rékore, tanpe anak Kamuy-hum poho ikkewe ani an itak ne:
18 orowa, Andreas hene, Piripos hene, Bartoromaios hene, Mattaios hene, Tomas hene,
orowa, Andreas hene, Piripos hene, Bartoromayos hene, Mattayos hene, Tomas hene,
19 Arupaios poho ne Yakob hene, Taddaios hene, Kanaan un Simon hene, orowa, Shinuma ekoshi Kariot kotan un guru ne Yudas hene ne ruwe ne.
Arupayos poho ne Yakob hene, Taddayos hene, Kanaan un Simon hene, orowa, Sinuma ekosi Kariot kotan un kur ne Yudas hene ne ruwe ne.
Roukos 6.13-16 §44II
13 Orowa, tokap ne chiki koikara utara shihekote hotuyekara: awa, nei tumuge wano tu niu ikashima wa niu numge wa Apostoro reihei ani reikore ruwe ne.
Orowa, tokap ne ciki koykar utar sihekote hotuyekar: awa, ne tumuke wano tu niw ikasma wa niw numke wa Apostoro rehe ani rékore ruwe ne.
14 Petros ani areikore Simon newa koro ainu iriwak Andreas an;
Petros ani a=rékore Simon newa kor aynu irwak Andreas an;
15 Yakob newa Yoannes an; Piripos newa Bartoromaios an; Mattaios newa Tomas an; Arupaios poho Yakob newa Zerotes ani aye Simon an;
Yakob newa Yoannes an; Piripos newa Bartoromayos an; Mattayos newa Tomas an; Arupayos poho Yakob newa Zerotes ani a=ye Simon an;
16 Yakob poho Youdas newa Yesu ekoshi guru ne nisa Kariot kotan un guru Youdas an;
Yakob poho Yowdas newa Yesu ekosi kur ne nisa Kariot kotan un kur Yowdas an;
Markos 3.20-21 §31X
20 Orowa, Shinuma chisei orun ahun. Awa, shui, aep ibe eaikap pakno inne utara uwekarapa nisa ruwe ne.
Orowa, Sinuma cise orun ahun. Awa, suy, aep ipe eaykap pakno inne utar uekarpa nisa ruwe ne.
21 Aige, Shinuma koro uiriwak utara anak nei orushpe nu chiki, — Shinuma chiitasare ruwe ne, ari itak koro kishima kuni ne soyumba.
Ayke, Sinuma kor uyriwak utar anakne oruspe nu ciki, — Sinuma ciitasare ruwe ne, ari itak kor kisma kuni ne soyunpa.
Mattaios 12.24 §121II
24 Koroka, Parisee un utara nei ambe nu, aige, ene itak-hi :— Tan guru anak ne ouse Beeruzeboru ani aporose nitne kamui esapanep ani nitnep soyumbare ruwe ne, ari itak.
Korka, Parisee un utar ne anpe nu, ayke, ene itak hi :— Tan kur anakne owse Beeruzeboru ani a=porse nitne kamuy e=sapanep ani nitnep soyunpare ruwe ne, ari itak.
Markos 3.22 §32II
22 Orowa, Yerusarem kotan wano sap kambi-nuye utara anak ne, Shinuma Berusebub koro, orowa, nitne kamui esapanep ani nitne kamui oashinge ruwe ne sekoro itak.
Orowa, Yerusarem kotan wano sap kampi-nuye utar anakne, Sinuma Berusebub kor, orowa, nitne kamuy e=sapanep ani nitne kamuy oasinke ruwe ne sekor itak.
Mattaios 12.25-30 §122II
25 Shinuma nei utara yainu-hi eramu an wa otta ene itak-hi :— Inan moshiri uirup ne yakka yaikota gusu utashpa uwekopi yak anak ne, nei moshiri ahokushte kusu ne; shui, inan machiya hene inan chisei hene ne yakka, yaikota gusu uwekopi yakun okai eaikap kusu ne na: orowa, Satan anak ne Satan soyumbare yakun,
Sinuma ne utar yaynu hi eramuan wa or ta ene itak hi :— Inan mosir uyrup ne yakka yaykota kusu utaspa uwekopi yakanak ne, ne mosir a=hokuste kusu ne; suy, inan maciya hene inan cise hene ne yakka, yaykota kusu uwekopi yakun okay eaykap kusu ne na: orowa, Satan anakne Satan soyunpare yakun,
26 Satan yaikota gusu yaiekopi ruwe ne; yak anak ne nekon a shinuma koro moshiri ash eashkai ya?
Satan yaykota kusu yayekopi ruwe ne; yakanak ne nekona sinuma kor mosir as easkay ya?
27 Shui, Kuani anak ne Beeruzeboru ani nitnep soyumbare yakun, echi poho utara inan guru ani nei ambe soyumbare ruwe he an? Tambe gusu nei utara anak ne echi koipishi kusu ne ruwe ne na.
Suy, Kuani anakne Beeruzeboru ani nitnep soyunpare yakun, eci=poho utar inan kur ani ne anpe soyunpare ruwe he an? Tanpe kusu ne utar anakne eci koypisi kusu ne ruwe ne na.
28 Koroka, Kuani anak ne Kamui Ramat ani nitnep soyumbare yakun, Kamui moshiri echi orota ek wa an ruwe ne.
Korka, Kuani anakne Kamuy Ramat ani nitnep soyunpare yakun, Kamuy mosir eci oro ta ek wa an ruwe ne.
29 Shui, Ainu anak ne hoshiki no okirashnu guru tupetupe shomoki yakun, nekon a iki wa shinuma kot chisei ta ahun wa nei okirashnu guru korope akoisamka kusu ne ya? Atupetupe okere chiki kot chisei koisamka kusu ne na.
Suy, Aynu anakne hoskino okirasnu kur tupetupe somo ki yakun, nekona iki wa sinuma kot cise ta ahun wa ne okirasnu kur kor pe akoysamka kusu ne ya? A=tupetupe okere ciki kot cise koysamka kusu ne na.
30 En tura no iki shomoki gurʼanak ne En epokba gunʼne; orowa, En tura no uwekarapare shomoki gurʼanak ne chieshitchari ruwe ne.
En turano iki somo ki kur anakne En epokpa kunne; orowa, En turano uwekarpare somo ki kur anakne ci=esitcari ruwe ne.
Markos 3.23-27 §33II
23 Orota Shinuma nei utara shikekote hotuyepakara wa itak-maukushte-itak ani ene itak-hi :— Satan anak ne nekon a ki wa Satan oashinge eashkai ya?
Oro ta Sinuma ne utar sikekote hotuyepakara wa itak-mawkuste-itak ani ene itak hi :— Satan anakne nekona ki wa Satan oasinke easkay ya?
24 Moshiri uirup anak ne yaikota gusu utashpa uwekopi wa okai chiki, nei moshiri ash eaikap ruwe ne.
Mosir uyrup anakne yaykota kusu utaspa uwekopi wa okay ciki, ne mosir as eaykap ruwe ne.
25 Samata, chisei un utara anak ne yaikota gusu utashpa uwekopi chiki, nei chisei an eaikap kusu ne ruwe ne.
Sama ta, cise un utar anakne yaykota kusu utaspa uwekopi ciki, ne cise an eaykap kusu ne ruwe ne.
26 Orowa, Satan anak ne hopuni wa yaikoiki chiki, yaiuwekopi an;
Orowa, Satan anakne hopuni wa yaykoyki ciki, yayuwekopi an;
27 aige, okai eaikap wa aokere ruwe ne. Koroka, hoshiki no kiroroashnu guru tupetupe shomoki yakun, nei kiroroashnu guru koro chisei orun ahun wa korobe eikka eaikap; atupetupe yakne koro chisei kowende ruwe ne.
ayke, okay eaykap wa a=okere ruwe ne. Korka, hoskino kiroroasnu kur tupetupe somo ki yakun, ne kiroroasnu kur kor cise orun ahun wa kor pe eikka eaykap; a=tupetupe yakne kor cise kowente ruwe ne.
Roukos 11.17-23 §129II
17 Koroka, Shinuma anak nei utara koro yainu-i eraman wa orota ene itak-hi :— Nep moshiri ne yakka utashpa uweyaiukoupipi chiki awende kusu ne; samata, nep chisei ne yakka utashpa uweyaiukoupipi chiki hokush ruwe ne.
Korka, Sinuma anakne utar kor yaynu hi eraman wa oro ta ene itak hi :— Nep mosir ne yakka utaspa uweyayukowpipi ciki awente kusu ne; sama ta, nep cise ne yakka utaspa uweyayukowpipi ciki hokus ruwe ne.
18 Orowa, Satan ne yakka utashpa uweyaiukoupipi chiki, nekon a koro moshiri okai eashkai ya? Kuani anak ne Beeruzebub ani nitne kamui Ku oashinge ruwe ne ani echi ye ruwe ne gusu ne na.
Orowa, Satan ne yakka utaspa uweyayukowpipi ciki, nekona kor mosir okay easkay ya? Kuani anakne Beeruzebub ani nitne kamuy Ku=oasinke ruwe ne ani eci=ye ruwe ne kusu ne na.
19 Orowa, Kuani anak ne Beeruzebub ani nitne kamui oashinge yakun, echi poho utara hunna ani nei ambe oashinge ya? Tambe gusu, nei utara anak ne echi pishi utara ne kusu ne.
Orowa, Kuani anakne Beeruzebub ani nitne kamuy oasinke yakun, eci=poho utar hunna ani ne anpe oasinke ya? Tanpe kusu, ne utar anakne eci=pisi utar ne kusu ne.
20 Koroka, Kuani anak ne Kamui ashikepet ani nitne kamui oashinge chiki, Kamui moshiri echi otta ek nisa ruwe ne.
Korka, Kuani anakne Kamuy askepet ani nitne kamuy oasinke ciki, Kamuy mosir eci or ta ek nisa ruwe ne.
21 Okirashnu guru eshipopkep koro wa koro chashi shiruwe an ita anak ne,
Okirasnu kur esipopkep kor wa kor casi siruwe an hi ta anakne,
22 korobe irammakaka okai: koroka, nei guru kasu no naa okirashnu guru ka ek ita anak ne shinuma annokara kusu ne, orowa no, gusu eyaikopashte hayokbe auk wa orowa no aukbe eimek ruwe ne.
kor pe irammakaka okay: korka, ne kur kasuno naa okirasnu kur ka ek hi ta anakne sinuma annokar kusu ne, orowano, kusu e=yaykopaste hayokpe auk wa oro wano aukpe eymek ruwe ne.
23 En tura no iki shomoki gurʼanak ne En epokba ruwe ne; En tura no uwekarapare shomoki gurʼanak ne shitchari ruwe ne.
En turano iki somo ki kur anakne En epokpa ruwe ne; En turano uwekarpare somo ki kur anakne sitcari ruwe ne.
Mattaios 12.31-32 §123II
31 Tambe gusu echi otta Ku ye, nep chikokatpak ne yakka, nep koatchap ne yakka utara gusu atusare kusu ne, koroka, Ramat epeka no an koatchap anak ne atusare shomoki kusu ne ruwe ne.
Tanpe kusu eci or ta Ku=ye, nep ci=kokatpak ne yakka, nep koatcap ne yakka utar kusu atusare kusu ne, korka, Ramat epeka no an koatcap anakne atusare somo ki kusu ne ruwe ne.
32 Orowa, nen ne yakka Ainu Poho epeka sempiroitak ki guru an yakka atusare kusu ne, koroka, nen ne yakka Ashkanne Ramat epeka sempiroitak ki guru anak ne, tan moshirʼotta ne yakka, ek kushki moshirʼotta ne yakka atusare shomoki kusu ne ruwe ne.
Orowa, nen ne yakka Aynu Poho epeka senpiroytak ki kur an yakka atusare kusu ne, korka, nen ne yakka Askanne Ramat epeka senpiroytak ki kur anakne, tan mosir or ta ne yakka, ek kuski mosir or ta ne yakka atusare somo ki kusu ne ruwe ne.
Markos 3.28-30 §34II
28 Son no echi otta Ku ye :— Utara poho utara koro obitta no okai chikokatpak newa koatcha ani iki koatcha ambe anak ne atusare kusu ne; koroka,
Sonno eci or ta Ku=ye :— Utar poho utar kor opittano okay ci=kokatpak newa koatca ani iki koatca anpe anakne atusare kusu ne; korka,
29 nen ne yakka Ashkanne Ramat koatcha gurʼanak ne nei pakno ne yakka atusare shomoki kusu ne, koroka, nei guru koro chikokatpak hembara pakno ne yakka an ap ne ruwe ne:
nen ne yakka Askanne Ramat koatca kur anakne ne pakno ne yakka atusare somo ki kusu ne, korka, ne kur kor ci=kokatpak henpara pakno ne yakka an ap ne ruwe ne:
30 Shinuma anak ne Ichakkere ramat kon ruwe ne, ari nei utara ye nisa ruwe ne gusu ne na.
Sinuma anakne Icakkere ramat kor ruwe ne, ari ne utar ye nisa ruwe ne kusu ne na.
Roukos 12.10 §147II
10 Orowa, nen ne yakka Ainu Poho epeka itak sange guru anak ne, nei ambe atusare kusu ne, koroka, Ashkanne Ramat koatcha guru anak atusare shomoki kusu ne na.
Orowa, nen ne yakka Aynu Poho epeka itak sanke kur anakne, ne anpe atusare kusu ne, korka, Askanne Ramat koatca kur anak atusare somo ki kusu ne na.
Mattaios 12.46-50 §130II
46 Shinuma anak ne inne topaha utara orota itak rapoketa, ingarʼan, koro habo koro iriwak utara tura Shinuma otta itak rusui gusu soita roshki wa okai.
Sinuma anakne inne topaha utar oro ta itak rapoketa, inkar=an, kor hapo kor irwak utar tura Sinuma or ta itak rusuy kusu soy ta roski wa okay.
47 Awa, shine ainu Shinuma otta ene itak-hi :— Ingarʼan, E koro habo E koro iriwak utara tura E otta itak rusui gusu soita roshki wa okai ruwe ne, ani itak.
Awa, sine aynu Sinuma or ta ene itak hi :— Inkar=an, E=kor hapo E=kor irwak utar tura E or ta itak rusuy kusu soy ta roski wa okay ruwe ne, ani itak.
48 Koroka, nei guru otta Shinuma ese wa ene itak-hi :— Ku goro habo nen ne? Ku goro iriwak utara nen ne ruwe he an? — ari itak.
Korka, ne kur or ta Sinuma ese wa ene itak hi :— Ku=kor hapo nen ne? Ku=kor irwak utar nen ne ruwe he an? — ari itak.
49 Orowa, Shinuma koro koikara utara oro un tekehe turi wa ene itak-hi :— Ingarʼan, Ku goro habo Ku goro iriwak utara!
Orowa, Sinuma kor koykar utar oro un tekehe turi wa ene itak hi :— Inkar=an, Ku=kor hapo Ku=kor irwak utar!
50 Inambe gusu ne yakun, inan guru ne yakka kando otta an Ku goro Michi irenga ki gurʼanak ne shinuma anak Ku okkai ainu iriwak ne, Ku mat ainu iriwak ne, Ku habo ne ruwe ne na.
Inanpe kusu ne yakun, inan kur ne yakka kanto or ta an Ku=kor Mici irenka ki kur anakne sinuma anak Ku=okkay aynu irwak ne, Ku=mat aynu irwak ne, Ku=hapo ne ruwe ne na.
Markos 3.31-35 §35II
31 Orowa, koro habo newa koro ainu iriwak utara araki, aige, soita roshki wa Shinuma hotuyekara gusu teshkan nisa ruwe ne.
Orowa, kor hapo newa kor aynu irwak utar arki, ayke, soy ta roski wa Sinuma hotuyekar kusu teskar nisa ruwe ne.
32 Awa, inne utara Shinuma okari ta rok wa okai: aige, Shinuma otta utara anak ne ene itak-hi :— Ingarʼan, E koro habo E koro ainu iriwak utara soita okai hine E hunara wa okai ruwe ne.
Awa, inne utar Sinuma okari ta rok wa okay: ayke, Sinuma or ta utar anakne ene itak hi :— Inkar=an, E=kor hapo E=kor aynu irwak utar soy ta okay hine E hunara wa okay ruwe ne.
33 Shinuma ese wa ene itak-hi :— Ku habo newa Ku ainu iriwak utara inambe ne ruwe he an?
Sinuma ese wa ene itak hi :— Ku=hapo newa Ku=aynu irwak utar inanpe ne ruwe he an?
34 Orowa, Shinuma okari rok wa okai utara orun hosari
Orowa, Sinuma okari rok wa okay utar orun hosari
35 ingara wa ene itak-hi :— Ku goro habo Ku goro ainu iriwak utara ingara yan! Inambe gusu ne yakun, nen ne yakka Kamui irenga ki gurʼanak ne, shinuma anak Ku okkai ainu iriwak ne, Ku mat ainu iriwak ne, Ku habo ne ruwe ne gusu ne na, ari itak nisa ruwe ne.
inkar wa ene itak hi :— Ku=kor hapo Ku=kor aynu irwak utar inkar yan! Inanpe kusu ne yakun, nen ne yakka Kamuy irenka ki kur anakne, sinuma anak Ku=okkay aynu irwak ne, Ku=mat aynu irwak ne, Ku=hapo ne ruwe ne kusu ne na, ari itak nisa ruwe ne.
Roukos 8.19-21 §82II
19 Orowa, koro habo newa koro ainu iriwak utara Shinuma orota araki, awa, inne utara okai gusu Shinuma samake un araki eaikap ruwe ne.
Orowa, kor hapo newa kor aynu irwak utar Sinuma oro ta arki, awa, inne utar okay kusu Sinuma samake un arki eaykap ruwe ne.
20 Aige, E koro habo E koro ainu iriwak utara soita roshki wa E nukan rusui, ari an ambe Shinuma otta aye nisa ruwe ne.
Ayke, E=kor hapo E=kor aynu irwak utar soy ta roski wa E nukar rusuy, ari an anpe Sinuma or ta a=ye nisa ruwe ne.
21 Koroka, orota Shinuma ese wa ene itak-hi :— Ku habo newa Ku ainu iriwak utara anak ne, Kamui itak nu wa nei no ki utara ne ruwe ne, ari an itak ani ye nisa ruwe ne na.
Korka, oro ta Sinuma ese wa ene itak hi :— Ku=hapo newa Ku=aynu irwak utar anakne, Kamuy itak nu wa néno ki utar ne ruwe ne, ari an itak ani ye nisa ruwe ne na.