Synopsis

1 Nei toho ta Yesu chisei soine hine atui samta a nisa ruwe ne, awa, poro inne utara uwekarapa gusu,

Ne toho ta Yesu cise soyne hine atuy sam ta a nisa ruwe ne, awa, poro inne utar uekarpa kusu,

2 Shinuma chip orun ahun wa a nisa ruwe ne; uwekarapa utara anak ne atui samata roshki wa okai nisa ruwe ne na.

Sinuma cip orun ahun wa a nisa ruwe ne; uekarpa utar anakne atuy sama ta roski wa okay nisa ruwe ne na.

3 Awa, itak-maukushte-itak ani Shinuma usausa okaibe nei utara otta ye, aige, ene itak-hi :—

Awa, itak-mawkuste-itak ani Sinuma usawsa okaype ne utar or ta ye, ayke, ene itak hi :—

4 Ingarʼan, Piyehe etoita shine ainu oman wa piyehe etoita; etoita orota ru paruru ta hachiri ambe an,

Inkar=an, Piyehe etoyta sine aynu oman wa piyehe etoyta; etoyta oro ta ru paruru ta hacir anpe an,

5 aige, chikap reu wa nei ambe e nisa ruwe ne: orowa, shuma-ush kapan no toi an ushiketa hachiri ambe an,

ayke, cikap rew wa ne anpe e nisa ruwe ne: orowa, suma-us kapar no toy an uske ta hacir anpe an,

6 awa, toitoi ahak gusu nani hetukba: aige, chup ri chiki shukus-chire; samata, shinrit isambe ne gusu shumumge wa isam nisa ruwe ne.

awa, toytoy ahak kusu nani hetukpa: ayke, cup ri ciki sukus-cire; sama ta, sinrit i=sanpe ne kusu sumumke wa isam nisa ruwe ne.

7 Orowa, moshimap anak ne ai-ush ni an ushiketa hachiri; awa, ai-ush ni hetukba wa nei ambe ateye nisa ruwe ne;

Orowa, mosma p anakne ay-us ni an uske ta hacir; awa, ay-us ni hetukpa wa ne anpe a=teye nisa ruwe ne;

8 shui, moshima ambe anak ne toitoi pirika ushike ta hachiri wa hetukba, aine, ashikne hotne pakno hene, re hotne pakno hene, wanbe ikashima hotne pakno hene shipiraspa nisa ruwe ne na.

suy, mosma anpe anakne toytoy pirka usike ta hacir wa hetukpa, ayne, asikne hotne pakno hene, re hotne pakno hene, wanpe ikasma hotne pakno hene sipiraspa nisa ruwe ne na.

9 Kisara koro guru, nu yan.

Kisara kor kur, nu yan.

10 Orowa, koikara utara araki wa Shinuma orota ene ye-hi :— Hemanda gusu itak-maukushte-itak ani nei utara otta E itak ya?

Orowa, koykar utar arki wa Sinuma oro ta ene ye hi :— Hemanta kusu itak-mawkuste-itak ani ne utar or ta E itak ya?

11 Shinuma ese wa orota ene hawe oka-hi :— Kando moshirʼotta anuinap eramʼan-hi anak ne echi otta akore wa an, koroka, nei utara otta shomo akore ruwe ne.

Sinuma ese wa oro ta ene haweoka hi :— Kanto mosir or ta anuynap eraman hi anakne eci or ta a=kore wa an, korka, ne utar or ta somo a=kore ruwe ne.

4 Orowa no, inne topaha utara uwekarapa, samata, obitta no okai machiya orowa no utara Yesu orota kouwekarapa wa okai ita anak ne, Shinuma itak-maukushte-itak ani ye nisa ruwe ne.

Orowano, inne topaha utar uekarpa, sama ta, opittano okay maciya oro wano utar Yesu oro ta kouekarpa wa okay hi ta anakne, Sinuma itak-mawkuste-itak ani ye nisa ruwe ne.

5 Etoita guru anak ne koro piyehe etoita gusu oman: etoita rapoketa ru parurugeta hachiri piye an, awa, aotereke, orowa, rik peka kush chikap nei ap ibe nisa ruwe ne.

Etoyta kur anakne kor piyehe etoyta kusu oman: etoyta rapoketa ru parurke ta hacir piye an, awa, a=oterke, orowa, rik peka kus cikap ne ap ipe nisa ruwe ne.

6 Orowa, watara kata hachiri piye an; nei ap hetuku chiki nani shumumge wa isam, wakka sakbe ne gusu ne na.

Orowa, watara kata hacir piye an; ne ap hetuku ciki nani sumumke wa isam, wakka sak pe ne kusu ne na.

7 Orowa, ai-ush ni tumugeta hachiri piye an; ai-ush ni anak ne tura no hetuku wa nei piyehe teyepa nisa ruwe ne.

Orowa, ay-us ni tumke ta hacir piye an; ay-us ni anakne turano hetuku wa ne piyehe tepa nisa ruwe ne.

8 Orowa, moshima an piyehe anak ne pirika toi otta hachiri wa hetuku, orowa, ashikne hotne pakno ibehe hetukba nisa ruwe ne. Shinuma tan itak ye okere chiki; nu kuni kisara koro guru, nu yan, sekoro rui hau ani itak nisa ruwe ne na.

Orowa, mosma an piyehe anakne pirka toy or ta hacir wa hetuku, orowa, asikne hotne pakno ipehe hetukpa nisa ruwe ne. Sinuma tan itak ye okere ciki; nu kuni kisara kor kur, nu yan, sekor ruy haw ani itak nisa ruwe ne na.

9 Orowa, tan itak-maukushte-itak nekon a ambe aye-i ne ya, koikara utara Shinuma otta uwepekennu nisa ruwe ne, awa, Shinuma ene itak-hi :— Kamui

Orowa, tan itak-mawkuste-itak nekona anpe a=ye hi ne ya, koykar utar Sinuma or ta uwepekennu nisa ruwe ne, awa, Sinuma ene itak hi :— Kamuy

10 moshiri gusu an anuinap eraman kuni-hi anak ne echi otta akore: koroka, moshima okai utara otta itak-maukushte-itak ani ayep ne; nei utara ingara, yakka, nukara shomoki, nu yakka, shomo eraman kuni gusu ne gusu ne na.

mosir kusu an anuynap eraman kuni hi anakne eci or ta a=kore: korka, mosma okay utar or ta itak-mawkuste-itak ani a=ye p ne; ne utar inkar, yakka, nukar somo ki, nu yakka, somo eraman kuni kusu ne kusu ne na.

13 Nei utara ingara wa nukara shomoki, inu wa nu ka shomoki, shui, ramepakari shomoki wa okai gusu tambe gusu itak-maukushte-itak ani Ku ye ruwe ne.

Ne utar inkar wa nukar somo ki, inu wa nu ka somo ki, suy, ramepakari somo ki wa okay kusu tanpe kusu itak-mawkuste-itak ani Ku=ye ruwe ne.

14 Inu wa echi nu, koroka, oara erampeutek; Ingara wa echi nukara, koroka, ramepakari ka shomoki: Tan utara anak ne shikihi ani shomo nukara, Kisara ani shomo nu,

Inu wa eci=nu, korka, oar eranpewtek; Inkar wa eci=nukar, korka, ramepakari ka somo ki: Tan utar anakne sikihi ani somo nukar, Kisara ani somo nu,

15 Keutum ani shomo eramʼan kuni, Aige, Ku iwangere gusu shomo hosari kuni ne Tan utara koro sambe nishte ne, Koro kisara ashpa ne, Shikihi shikkamuktek ne; sekoro uweingara guru Isaya koro uweingarape tan utara gusu auweomare ruwe ne na.

Kewtum ani somo eraman kuni, Ayke, Ku=iwankere kusu somo hosari kuni ne Tan utar kor sanpe niste ne, Kor kisara aspa ne, Sikihi sikkamuktek ne; sekor ueinkar kur Isaya kor uweinkarape tan utar kusu a=ueomare ruwe ne na.

10 moshiri gusu an anuinap eraman kuni-hi anak ne echi otta akore: koroka, moshima okai utara otta itak-maukushte-itak ani ayep ne; nei utara ingara, yakka, nukara shomoki, nu yakka, shomo eraman kuni gusu ne gusu ne na.

mosir kusu an anuynap eraman kuni hi anakne eci or ta a=kore: korka, mosma okay utar or ta itak-mawkuste-itak ani a=ye p ne; ne utar inkar, yakka, nukar somo ki, nu yakka, somo eraman kuni kusu ne kusu ne na.

39 Tambe gusu, nei utara anak ne eishokoro eaikap ruwe ne, orowa, Isaya shui ene ye ruwe ne gusu ne na,

Tanpe kusu, ne utar anakne eysokor eaykap ruwe ne, orowa, Isaya suy ene ye ruwe ne kusu ne na,

40 Shinuma anak ne nei utara koro shiki shik-nakte, koro sambe nishtere ruwe ne; Ikineipeka, shomo shiki ani nukara, keutum ani ramepakari, Orowa, hoshipi hine Nei utara Ku iwangere kuni gusu ne na.

Sinuma anakne ne utar kor siki sik-nakte, kor sanpe nistere ruwe ne; Ikineypeka, somo siki ani nukar, kewtum ani ramepakari, Orowa, hosipi hine Ne utar Ku=iwankere kuni kusu ne na.

18 Tambe gusu piyehe etoita guru gusu an itak-maukushte-itak nu yan.

Tanpe kusu piyehe etoyta kur kusu an itak-mawkuste-itak nu yan.

19 Nen ne yakka nei moshiri gusu an orushpe nu wa erampeutek chiki anak ne, wenbe ek wa nei guru keutum oshiketa aetoitap ehekem wa uk ruwe ne. Tambe anak ru paruru ta aetoita guru ne ruwe ne.

Nen ne yakka ne mosir kusu an oruspe nu wa eranpewtek ciki anakne, wenpe ek wa ne kur kewtum oske ta aetoytap ehekem wa uk ruwe ne. Tanpe anak ru paruru ta aetoyta kur ne ruwe ne.

20 Orowa, shuma-ush ushiketa aetoita gurʼanak ne, tambe anak itak nu,

Orowa, suma-us uske ta aetoyta kur anakne, tanpe anak itak nu,

21 orowa, nani yaikopuntek hine kon ruwe ne; yakka koro keutum ta shinrit isamma gusu, irukai-tomta yaishiporore; aige, nei itak gusu aeramchuptekbe hene aepokbap hene hetuku yakun, nani epetchiu ruwe ne.

orowa, nani yaykopuntek hine kor ruwe ne; yakka kor kewtum ta sinrit i=samma kusu, irukay-tomta yaysiporore; ayke, ne itak kusu aeramcuptekpe hene aepokpap hene hetuku yakun, nani epetciw ruwe ne.

22 Orowa, ai-ush ni an ushiketa aetoita gurʼanak ne, tambe anak nei itak nu; orowa, kanna moshiri gusu an nishomap ambe hene, aeoteknu ambe gusu an kokandama ambe hene gusu, nei itak ateye, aige, ibehe shomo hetukure gunʼne.

Orowa, ay-us ni an uske ta aetoyta kur anakne, tanpe anakne itak nu; orowa, kanna mosir kusu an nisomap anpe hene, aeoteknu anpe kusu an kokantama anpe hene kusu, ne itak a=teye, ayke, ipehe somo hetukure kunne.

23 Orowa toitoi pirika ushiketa aetoita gurʼanak ne, tambe anak nei itak nu wa eramʼan; orowa, son no poka shinuma ibe o, ashikne hotne pakno hene, re hotne pakno hene, wanbe ikashima hotne pakno hene hetukure guru ne ruwe ne, ari itak.

Orowa toytoy pirka uske ta aetoyta kur anakne, tanpe anakne itak nu wa eraman; orowa, sonno poka sinuma ipe o, asikne hotne pakno hene, re hotne pakno hene, wanpe ikasma hotne pakno hene hetukure kur ne ruwe ne, ari itak.

11 Tan itak-maukushte-itak ene ani ne :— Piyehe anak ne Kamui itak ne ruwe ne.

Tan itak-mawkuste-itak ene ani ne :— Piyehe anakne Kamuy itak ne ruwe ne.

12 Ru parurugeta okaibe anak ne nu utara ne; orowa, nitne kamui ek wa nei utara iteki eishokoro wa kashiaobiuki kuni ne keutum orowa no itak etaye ruwe ne.

Ru parurke ta okaype anakne nu utar ne; orowa, nitne kamuy ek wa ne utar iteki eysokor wa kasiaopiwki kuni ne kewtum oro wano itak etaye ruwe ne.

13 Orowa, watara kata okaibe anak ne itak nu chiki yaikopuntek wa nei itak koro; orowa, tan utara shinrit sak wa irukai tomta eishokoro, orowa, akoramnukara ita anak ne yaikoemaka ruwe ne.

Orowa, watara kata okaype anakne itak nu ciki yaykopuntek wa ne itak kor; orowa, tan utar sinrit sak wa irukay tomta eysokor, orowa, a=koramnukar hi ta anakne yaykoemaka ruwe ne.

14 Orowa, ai-ush ni tumugeta hachiribe anak ne, nei utara anak itaknu utara ne, koroka, oman aige, shiknu gusu an nishomap ambe hene, ikorobe gusu hene, kanna moshiri ta an shiniwe gusu hene ateyepa wa ibehe epare shomoki ruwe ne.

Orowa, ay-us ni tumke ta haciripe anakne, ne utar anak itak nu utar ne, korka, oman ayke, siknu kusu an nisomap anpe hene, i=korpe kusu hene, kanna mosir ta an siniwe kusu hene ateyepa wa ipehe epare somo ki ruwe ne.

15 Orowa, pirika toi otta okaibe anak ne, oheuge-sak newa pirika keutum koro wa itak nu hine yupke no shikkashima wa yaishiporore wa ibehe hetubare utara ne ruwe ne.

Orowa, pirka toy or ta okaype anakne, ohewke-sak newa pirka kewtum kor wa itak nu hine yupke no sikkasima wa yaysiporore wa ipehe hetupare utar ne ruwe ne.

14 Echi utara anak ne moshiri pekere echi ne, nupuri kashiketa an machiya anak ne anuina eaikap ruwe ne.

Eci utar anakne mosir peker eci ne, nupuri kasike ta an maciya anakne a=nuyna eaykap ruwe ne.

15 Naa samata, ratchako uhuika wa chomba choropoketa ande guru ka isam, set kashiketa nei ambe ande, yakun, chisei ta obitta no okai utara otta nupeki at ruwe ne.

Naa sama ta, ratcako uhuyka wa conpa corpoke ta ante kur ka isam, set kasike ta ne anpe ante, yakun, cise ta opittano okay utar or ta nupeki at ruwe ne.

16 Tambe korachi, echi ki pirika ikip moshima guru nukara wa kando otta an echi koro Michi koiramye kuni gusu, echi koro pekere moshima utara kotchaketa atte yan.

Tanpe koraci, eci=ki pirka iki p mosma kur nukar wa kanto or ta an eci=kor Mici koyramye kuni kusu, eci=kor peker mosma utar kotcake ta atte yan.

16 Orowa, ratchako uhuika orowa no nepka ani kamure hene ki, shotki choropoketa ande hene ki guru isama; koroka, chisei orun ahup utara nei pekere nukara kuni gusu set kashiketa ande ruwe ne.

Orowa, ratcako uhuyka oro wano nep ka ani kamure hene ki, sotki corpoke ta ante hene ki kur isam; korka, cise orun ahup utar ne peker nukar kuni kusu set kasike ta ante ruwe ne.

33 Ratchako uhuika wa pokna un pu oro omare hemhem ki chomba choropoketa ande hemhem ki guru isam, koroka chisei orun ahup utara pekere nukara kuni gusu set kata ande ruwe ne.

Ratcako uhuyka wa pokna un pu oro omare hemhem ki conpa corpoke ta ante hemhem ki kur isam, korka cise orun ahup utar peker nukar kuni kusu set kata ante ruwe ne.

26 Tambe gusu iteki nei utara koishitoma yan; inambe gusu ne yakun, akamure wa anukare shomoki ambe isam, anuina wa asarare shomoki ambe shinep ka isam ruwe ne.

Tanpe kusu iteki ne utar koysitoma yan; inanpe kusu ne yakun, a=kamure wa a=nukare somo ki anpe isam, a=nuyna wa a=sarare somo ki anpe sinep ka isam ruwe ne.

17 Anukara shomoki kusu ne anuinap isam. Akamure wa pekere i otta shomo ek wa shomo aeramu ambe isam ruwe ne.

A=nukar somo ki kusu ne anuynap isam. A=kamure wa peker i or ta somo ek wa somo a=ermu anpe isam ruwe ne.

1 Echi utara shomo akoipishi kuni ne, iteki koipishi yan.

Eci utar somo akoypisi kuni ne, iteki koypisi yan.

2 Inambe gusu ne yakun, koipishi wa esanniyo nei no, echi akoipishi wa aesanniyo kusu ne: orowa, pakari wa echi kore korachi, echi gusu ne yakka apakari wa akore kusu ne.

Inanpe kusu ne yakun, koypisi wa esanniyo néno, eci akoypisi wa a=esanniyo kusu ne: orowa, pakari wa eci=kore koraci, eci kusu ne yakka apa kari wa a=kore kusu ne.

36 Echi koro Michi rampokiwen wa kore korachi, echi utara ne yakka rampokiwen wa kore yan.

Eci=kor Mici ranpokiwen wa kore koraci, eci utar ne yakka ranpokiwen wa kore yan.

37 Iteki koipishi yan, yakun, echi akoipishi shomoki kusu ne; iteki katpak an sekoro esanniyo yan, yakun echi katpak an sekoro aesanniyo shomoki kusu ne:

Iteki koypisi yan, yakun, eci akoypisi somo ki kusu ne; iteki katpak an sekor esanniyo yan, yakun eci katpak an sekor a=esanniyo somo ki kusu ne:

38 honnere yan, yakun, echi ahonnere kusu ne: kore yan, yakun, echi otta a kore kusu ne: pirika no apakari; ararapa, eshiriotkeotke, ika pakno echi upshoro ta aomare kusu ne. Moshima an guru otta echi pakari wa kore korachi, echi otta ne yakka apakari wa a kore kusu ne na, sekoro itak.

honnere yan, yakun, eci=a=honnere kusu ne: kore yan, yakun, eci or ta a kore kusu ne: pirkano apa kari; a=rarpa, esiriotkeotke, ika pakno eci=upsoro ta a=omare kusu ne. Mosma an kur or ta eci=pakari wa kore koraci, eci or ta ne yakka apa kari wa a kore kusu ne na, sekor itak.

29 Inambe gusu ne yakun, nen ne yakka koro guru otta akore kusu ne, aige, shinuma nuye an no koro: koroka, koro shomoki guru orowa no korobe poka auk kusu ne na.

Inanpe kusu ne yakun, nen ne yakka kor kur or ta a=kore kusu ne, ayke, sinuma nuye an no kor: korka, kor somo ki kur oro wano kor pe poka auk kusu ne na.

26 Echi otta Ku ye :— Nen ne yakka koro guru otta akore kusu ne; koroka, koro shomoki guru orowa no koro wa an okaibe ne yakka auk kusu ne na.

Eci or ta Ku=ye :— Nen ne yakka kor kur or ta a=kore kusu ne; korka, kor somo ki kur oro wano kor wa an okaype ne yakka auk kusu ne na.

31 Naa shine itak-maukushte-itak Shinuma nei utara otta sange wa ene ye-hi :— Kando moshiri anak ne shine karashi piyehe koheraye ruwe ne; an ainu nei ambe uk wa kot toi otta etoita:

Naa sine itak-mawkuste-itak Sinuma ne utar or ta sanke wa ene ye hi :— Kanto mosir anakne sine karasi piyehe koheraye ruwe ne; an aynu ne anpe uk wa kot toy or ta etoyta:

32 awa, nei piyehe anak son no poka moshima okaibe kasu no pokashnu nokanbe ne; a koroka, hetuku koro anak ne moshima okai haru kasu no poro, aige, rik peka kush chikap araki wa nei tekehe kata reushi ruwe ne.

awa, ne piyehe anak sonno poka mosma okaype kasuno pokasnu nokanpe ne; a korka, hetuku kor anakne mosma okay haru kasuno poro, ayke, rik peka kus cikap arki wa ne tekehe kata rewsi ruwe ne.

18 Tambe gusu, Shinuma ene itak-hi :— Kamui moshiri anak ne nepi koheraye ya! Nepi otta Ku koherayere kusu ne ya?

Tanpe kusu, Sinuma ene itak hi :— Kamuy mosir anakne nep koheraye ya! Nep or ta Ku koherayere kusu ne ya?

19 Ainu uk wa kot toi otta omare shine karashi piyehe koheraye ruwe ne; nei ambe hetuku wa chikuni ne, orowa no, rik un chikap nei tekehe kata reushi nisa ruwe ne.

Aynu uk wa kot toy or ta omare sine karasi piyehe koheraye ruwe ne; ne anpe hetuku wa cikuni ne, orowano, rikun cikap ne tekehe kata rewsi nisa ruwe ne.

34 Tan orushpe obitta Yesu itak-maukushte-itak ani nei inne topaha utara otta ye wa nure nisa ruwe ne, aige, itak-maukushte-itak isam no nep ne yakka utara otta ye shomoki:

Tan oruspe opitta Yesu itak-mawkuste-itak ani ne inne topaha utar or ta ye wa nure nisa ruwe ne, ayke, itak-mawkuste-itak isam no nep ne yakka utar or ta ye somo ki:

35 tambe anak, Itak-maukushte-itak gusu ku paroho ku maka kusu ne, Moshiri heashi-i wano anuina wa an orushpe Ku ye kusu ne, sekoro uweingara guru ye itak auweomare kuni gusu an ap ne ruwe ne na.

tanpe anak, Itak-mawkuste-itak kusu ku=paroho ku=maka kusu ne, Mosir heasi hi wano a=nuyna wa an oruspe Ku=ye kusu ne, sekor ueinkar kur ye itak a=ueomare kuni kusu an ap ne ruwe ne na.

23 Orowa Shinuma chip o, awa, koikara utara ne

Orowa Sinuma cip o, awa, koykar utar ne

24 yakka tura no o ruwe ne. Orowa, ingarʼan, atui noshiketa rui mau shiroshma wa chip maanihungo akamure pakno riri poro ruwe ne:

yakka turano o ruwe ne. Orowa, inkar=an, atuy noske ta ruy maw sirosma wa cip maanihunko a=kamure pakno rir poro ruwe ne:

25 koroka, Shinuma anak ne mokoro wa an ruwe ne. Koikara utara shinuma otta araki wa mososo hine ene itak-hi :— Utarapa, un kashiobiuki wa un kore, tane aisamka ange shiriki na, sekoro itak.

korka, Sinuma anakne mokor wa an ruwe ne. Koykar utar sinuma or ta arki wa mososo hine ene itak hi :— Utarpa, un kasiopiwki wa un kore, tane a=ysamka anke siriki na, sekor itak.

26 Nei utara otta Shinuma ene itak-hi :— Eishokor-i aahak utara hemanda gusu echi ishitoma ya? sekoro itak. Orowa, Shinuma hopuni wa rera newa atui kopao; orowa, eashka ratchi neto an na.

Ne utar or ta Sinuma ene itak hi :— Eysokor hi aahak utar hemanta kusu eci=isitoma ya? sekor itak. Orowa, Sinuma hopuni wa rera newa atuy kopao; orowa, easka ratci neto an na.

27 Orowa, nei utara iyokunnure wa ene itak-hi :— Tan guru nekon a an guru ne ruwe he an? Atui ne yakka rera ne yakka koro itak nu, sekoro itak.

Orowa, ne utar iyokunnure wa ene itak hi :— Tan kur nekona an kur ne ruwe he an? Atuy ne yakka rera ne yakka kor itak nu, sekor itak.

28 Orowa, atui kushketa an Gadara moshiri orun Shinuma arapa chiki, tushiri orowa no araki shi no niwen nitne kamui shikatkari utara tun etunangara, moshima guru nei ru kari apkash eaikap pakno ne ruwe ne.

Orowa, atuy kuske ta an Gadara mosir orun Sinuma arpa ciki, tusiri oro wano arki sino niwen nitne kamuy sikatkari utar tun etunankar, mosma kur ne ru kari apkas eaykap pakno ne ruwe ne.

29 Orowa ingarʼan, nei utara hawe sange wa ene itak-hi :— Kamui Poho Yesu, un otta nep irenga an a? Naa etoko an aine teda ek wa un panakte shiri ruwe he an? sekoro itak.

Orowa inkar=an, ne utar hawe sanke wa ene itak hi :— Kamuy Poho Yesu, un or ta nep irenka an a? Naa etoko an ayne teta ek wa un panakte siri ruwe he an? sekor itak.

30 Hangeko no an ushiketa ibe wa okai buta poron no an, awa, nitne kamui Shinuma otta ene itak-hi :—

Hankeko no an uske ta ipe wa okay puta poronno an, awa, nitne kamuy Sinuma or ta ene itak hi :—

31 Aokai un oashinge yakun, buta tumu un ahup ash kuni ramuoshma wa un kore, sekorʼan itak ani koramkon nisa ruwe ne.

Aokay un oasinke yakun, puta tumu un ahup as kuni ramuosma wa un kore, sekor an itak ani koramkor nisa ruwe ne.

32 Paye yan, sekoro Shinuma itak; orowa, nitne kamui soyunba wa buta tumugeta ahup, aige, buta obitta raune ushike orowa rap wa atui otta ahup hine esumba wa rai nisa ruwe ne na.

Paye yan, sekor Sinuma itak; orowa, nitne kamuy soyunpa wa puta tumke ta ahup, ayke, puta opitta rawne usike orowa rap wa atuy or ta ahup hine e=sunpa wa ray nisa ruwe ne na.

33 Orowa no, buta reshpa utara anak ne machiya ko-kira wa paye, aige, tan orushpe newa nitne kamui shikatkari utara orushpe ye nisa ruwe ne.

Orowano, puta respa utar anakne maciya ko-kira wa paye, ayke, tan oruspe newa nitne kamuy sikatkari utar oruspe ye nisa ruwe ne.

34 Orowa, Yesu etunangara kuni gusu machiya koro utara obitta araki; awa, Shinuma nukara chiki, nei kotan orowa no paye kuni koramkon nisa ruwe ne na.

Orowa, Yesu etunankar kuni kusu maciya kor utar opitta arki; awa, Sinuma nukar ciki, ne kotan oro wano paye kuni koramkor nisa ruwe ne na.

22 Orowa, nei i pakita Yesu yaikota anak ne koro koikara utara tura chip orun ahun; awa, nei utara otta, to kushta paye yanro, ani itak: aige, chip asange nisa ruwe ne.

Orowa, ne i pakita Yesu yaykota anakne kor koykar utar tura cip orun ahun; awa, ne utar or ta, to kus ta paye yanro, ani itak: ayke, cip a=sanke nisa ruwe ne.

23 Koroka, to tomotuye rapoketa, Yesu mokon nisa ruwe ne: aine, yupke rera rui wa to epeka ruwe ne; awa, chip wakka eshik korʼan gusu, nei utara yaikikip no an na.

Korka, to tomotuye rapoketa, Yesu mokor nisa ruwe ne: ayne, yupke rera ruy wa to epeka ruwe ne; awa, cip wakka esik kor an kusu, ne utar yaykikip no an na.

24 Orowa, Shinuma orota nei utara araki wa mososo wa ene itak-hi :— Nishpa, nishpa, a un isamka kushki na, ari itak. Orowa, Shinuma mosh hine rera newa yupke ruyambe kopao, aine, nei ambe tui wa neto an ruwe ne.

Orowa, Sinuma oro ta ne utar arki wa mososo wa ene itak hi :— Nispa, nispa, a un isamka kuski na, ari itak. Orowa, Sinuma mos hine rera newa yupke ruyanpe kopao, ayne, ne anpe tuy wa neto an ruwe ne.

25 Orowa, nei utara otta Shinuma ene itak-hi :— Echi koro eishokorʼi neita an ruwe he an? ani itak. Orowa, nei utara ishitoma wa enushkari, awa, utashpa ene itakhi :— Rera newa wakka kashpaotte chiki itak anu tan guru nen ne ruwe he an? ari itak nisa ruwe ne.

Orowa, ne utar or ta Sinuma ene itak hi :— Eci=kor eysokor i ney ta an ruwe he an? ani itak. Orowa, ne utar isitoma wa enuskari, awa, utaspa ene itak hi :— Rera newa wakka kaspaotte ciki itak anu tan kur nen ne ruwe he an? ari itak nisa ruwe ne.

26 Orowa, Gariraya moshiri samake un Kerasene kotan ta shirepa nisa ruwe ne.

Orowa, Gariraya mosir samake un Kerasene kotan ta sirepa nisa ruwe ne.

27 Awa, Shinuma ya ta yap chiki machiya orowa no ek nitne Kamui shikatkari shine ainu etunangara; nei guru ohon no imi shomoki no an, orowa, chisei otta riya shomoki wa tushiri otta an ruwe ne.

Awa, Sinuma ya ta yap ciki maciya oro wano ek nitne Kamuy sikatkari sine aynu etunankar; ne kur ohor no imi somo ki no an, orowa, cise or ta riya somo ki wa tusiri or ta an ruwe ne.

28 Nei guru Yesu nukara chiki hawe ashte hine Shinuma kotchaketa hachiri wa oro mau soyoshma hine ene itak-hi :— Iyotta rikun Kamui Poho Yesu, E otta nep irenga ku an a? Iteki en panakte kuni ku koramkon na, ani itak.

Ne kur Yesu nukar ciki hawe aste hine Sinuma kotcake ta hacir wa oro maw soyosma hine ene itak hi :— Iyotta rikun Kamuy Poho Yesu, E or ta nep irenka ku=an a? Iteki en=panakte kuni ku=koramkor na, ani itak.

29 Inambe gusu ne yakun, nei ainu orowa no ichakkere ramat oashin kuni ne Shinuma kashpaotte nisa ruwe ne gusu ne na. Kanna-kanna nei ramat anak ne nei ainu turen gusu, shinkop newa chikiri eok shinkop ani atupetupe wa aepungine yakka, nei uokbe tuye wa nitne kamui orowa no nup otta aomande nisa ruwe ne.

Inanpe kusu ne yakun, ne aynu oro wano icakkere ramat oasin kuni ne Sinuma kaspaotte nisa ruwe ne kusu ne na. Kanna-kanna ne ramat anakne ne aynu turen kusu, sinkop newa cikiri eok sinkop ani a=tupetupe wa a=epunkine yakka, ne uokpe tuye wa nitne kamuy oro wano nup or ta a=omante nisa ruwe ne.

30 Orowa, nekon a reihei e koro ya? sekoro Yesu uwepekennu; aige, Region, ani shinuma ye; oshiketa ahup nitne kamui inne utara ne ruwe ne gusu ne na.

Orowa, nekona rehe e=kor ya? sekor Yesu uwepekennu; ayke, Region, ani sinuma ye; oske ta ahup nitne kamuy inne utar ne ruwe ne kusu ne na.

31 Orowa, iteki kashpaotte wa asam sak ushike un apayere kuni gusu Shinuma koramkoro nisa ruwe ne.

Orowa, iteki kaspaotte wa asam sak usike un a=payere kuni kusu Sinuma koramkor nisa ruwe ne.

32 Orowa, nei kotan un nupuri kata ibe wa okai inne buta topaha an ruwe ne: awa, nei buta tumuge un ahup kuni ramuoshmap koramkon nisa.

Orowa, ne kotan un nupuri kata ipe wa okay inne puta topaha an ruwe ne: awa, ne puta tumuke un ahup kuni ramuosmap koramkor nisa.

33 Aine, Shinuma ramuoshma nisa ruwe ne. Awa, nitne kamui utara nei ainu orowa no oaship wa buta orun ahup: aige, buta topaha nupuri kotoro rap wa to orun ahup hine eteye wa rai nisa ruwe ne.

Ayne, Sinuma ramuosma nisa ruwe ne. Awa, nitne kamuy utar ne aynu oro wano oasi p wa puta orun ahup: ayke, puta topaha nupuri kotor rap wa to orun ahup hine e=teye wa ray nisa ruwe ne.

34 Buta reshpa utara anak ne nei hetuku orushpe nukara chiki; kira wa machiya otta hene kotan otta hene nure nisa ruwe ne.

Puta respa utar anakne ne hetuku oruspe nukar ciki; kira wa maciya or ta hene kotan or ta hene nure nisa ruwe ne.

35 Awa, nei wa ambe nukara gusu utara paye; orowa, Yesu orota araki chiki orowa no nitne kamui oaship ainu anrip imi wa keutura yaieashiri kara wa an wa Yesu chikiri samaketa a wa an-i nukara, orowa no, shinuma utara ishitoma shiriki okai.

Awa, ne wa anpe nukar kusu utar paye; orowa, Yesu oro ta arki ciki oro wano nitne kamuy oasi p aynu anrip imi wa kewtura yayeasiri kar wa an wa Yesu cikiri samake ta a wa an hi nukar, orowano, sinuma utar isitoma siriki okay.

36 Orowa, nei wa ambe nukara utara anak ne tap araki utara otta nitne kamui shikatkari ainu nekon a iki wa aiwangere ruwe ne-i nure nisa ruwe ne.

Orowa, ne wa anpe nukar utar anakne tap arki utar or ta nitne kamuy sikatkari aynu nekona iki wa aywankere ruwe ne hi nure nisa ruwe ne.

37 Orowa, Kerasene kotan okari un obitta no okai utara anak ne Shinuma oyake un oman kuni ekoramkoro; nei utara shiri ishitoma wa okai nisa ruwe ne gusu ne na; orowa, Shinuma chip orun ahun wa hoshipi nisa ruwe ne.

Orowa, Kerasene kotan okari un opittano okay utar anakne Sinuma oyake un oman kuni e=koramkor; ne utar siri isitoma wa okay nisa ruwe ne kusu ne na; orowa, Sinuma cip orun ahun wa hosipi nisa ruwe ne.