Synopsis
Mattaios 8.1-4 §63II
1 Shinuma nupuri orowa no ran chiki inne utara nei osh paye nisa ruwe ne na.
Sinuma nupuri oro wano ran ciki inne utar ne os paye nisa ruwe ne na.
2 Orowa, munin tashum ki guru shinen Yesu orota ek wa ongami hine ene itak-hi :— Utarapa, Aokai eramuoshma yakun, ku kon netobake ashkannere eashkai ruwe ne sekoro itak.
Orowa, munin tasum ki kur sinen Yesu oro ta ek wa onkami hine ene itak hi :— Utarpa, Aokay e=ramuosma yakun, ku=kor netopake askannere easkay ruwe ne sekor itak.
3 Orowa Yesu tekehe tun wa nei guru tomoshma hine ene itak-hi :— Ku ramuoshma na, e ashkannere ash na — sekoro itak: orowa, munin tashum anak ne nani isam nisa ruwe ne na.
Orowa Yesu tekehe tun wa ne kur tomosma hine ene itak hi :— Ku=ramuosma na, e askannere as na — sekor itak: orowa, munin tasum anakne nani isam nisa ruwe ne na.
4 Orowa, nei guru otta Yesu ene ye-hi :— Nen ne yakka otta iteki tan orushpe nure; Kamui kora kenru esapane guru otta oman wa yainukare, samata, paweteshu ne gusu Mose kashpaotte ayangep yange yan, sekoro Yesu itak nisa ruwe ne na.
Orowa, ne kur or ta Yesu ene ye hi :— Nen ne yakka or ta iteki tan oruspe nure; Kamuy kor kenru esapane kur or ta oman wa yaynukare, sama ta, pawetesu ne kusu Mose kaspaotte ayankep yanke yan, sekor Yesu itak nisa ruwe ne na.
Markos 1.40-44 §18II
40 Orowa, munin tashum ki shine ainu Shinuma orota ek wa koramkoro, aige, kotpokita kokkaea hine ene itak-hi :— Aokai ramuoshma yakun en ashkannere eashkai ruwe ne.
Orowa, munin tasum ki sine aynu Sinuma oro ta ek wa koramkor, ayke, kotpokta kokkaea hine ene itak hi :— Aokay ramuosma yakun en askannere easkay ruwe ne.
41 Orowa, Shinuma rampoken keutum sange gusu, koro teke turi wa tomooshma, aige, orota ene itak-hi :— Ku ramuoshma na, e ashkannere ash na, ari itak.
Orowa, Sinuma ranpoken kewtum sanke kusu, kor teke turi wa tomoosma, ayke, oro ta ene itak hi :— Ku=ramuosma na, e askannere as na, ari itak.
42 Orowa, nani munin tashum anak ne shinuma hoppa, awa, aashkannere nisa ruwe ne.
Orowa, nani munin tasum anakne sinuma hoppa, awa, aaskannere nisa ruwe ne.
43 Orowa, Shinuma nei guru yupke no kashpaotte wa nani soinere hine otta ene itak-hi :—
Orowa, Sinuma ne kur yupke no kaspaotte wa nani soynere hine or ta ene itak hi :—
44 Nep ne yakka moshima guru otta iteki ye: koroka, e oman wa Kamui kora kenru esapane guru otta yainukara, orowa, nei utara otta paweteshu ne gusu Mose eikashpaotte ayangep e aashkannere wa an gusu yange yan, sekoro itak.
Nep ne yakka mosma kur or ta iteki ye: korka, e oman wa Kamuy kor kenru esapane kur or ta yaynukara, orowa, ne utar or ta pawetesu ne kusu Mose e=kaspaotte ayankep e aaskannere wa an kusu yanke yan, sekor itak.
Roukos 5.12-14 §33II
12 Orowa, shinuma nei utara koro shine machiya otta an ita, munin tashum eshik no an guru shinen an; awa, shinuma Yesu nukara chiki nanu koshiri kata hachire wa Shinuma koramkoro wa ene itak-hi :— Utarapa, Aokai ramuoshma yakun en ashkannere eashkai ruwe ne, ani itak.
Orowa, sinuma ne utar kor sine maciya or ta an hi ta, munin tasum esik no an kur sinen an; awa, sinuma Yesu nukar ciki nanu kosiri kata hacire wa Sinuma koramkor wa ene itak hi :— Utarpa, Aokay ramuosma yakun en askannere easkay ruwe ne, ani itak.
13 Orowa, Shinuma tekehe turi wa nei guru tomooshma wa, Ku ramuoshma, e ashkannere ash na, ari itak. Orowa no, nani nei munin tashum anak ne shinuma ande nisa ruwe ne.
Orowa, Sinuma tekehe turi wa ne kur tomoosma wa, Ku=ramuosma, e askannere as na, ari itak. Orowano, nani ne munin tasum anakne sinuma ante nisa ruwe ne.
14 Aige, nen ne yakka iteki nure kuni ne Shinuma kashpaotte: koroka, e oman wa Kamui kora kenru esapane guru otta yainukare, samata, nei utara otta paweteshu ne gusu Mose eikashpaotte nei no e aash-kannere gusu an ayangep yange yan, ari itak.
Ayke, nen ne yakka iteki nure kuni ne Sinuma kaspaotte: korka, e oman wa Kamuy kor kenru esapane kur or ta yaynukare, sama ta, ne utar or ta pawetesu ne kusu Mose e=kaspaotte néno e a=as-kannere kusu an ayankep yanke yan, ari itak.
Mattaios 8.5-10 §64III
5 Orowa, Shinuma Kapernaum kotan ta shirepa chiki, ashikne hotne tumi-koro utara esapane guru koramkoro wa Shinuma otta ek hine ene itak-hi :—
Orowa, Sinuma Kapernaum kotan ta sirepa ciki, asikne hotne tumi-kor utar esapane kur koramkor wa Sinuma or ta ek hine ene itak hi :—
6 Utarapa, Ku uni ta shine heikachi tusushke tashum shi no yupke hike ki wa hotke wa an, ani itak.
Utarpa, Ku=uni ta sine hekaci tususke tasum sino yupke hike ki wa hotke wa an, ani itak.
7 Orota Shinuma ene ye-hi :—
Oro ta Sinuma ene ye hi :—
8 Ku ek wa iwangere kusu ne — sekoro itak. Utarapa, ku kotʼchisei kitai choropoketa ahun-i shi no ku oripak an, ouse itak ye wa en kore, yakun, ku goro heikachi aiwangere kusu ne.
Ku=ek wa iwankere kusu ne — sekor itak. Utarpa, ku=kot cise kitay corpoke ta ahun hi sino ku=oripak an, owse itak ye wa en=kore, yakun, ku=kor hekaci aywankere kusu ne.
9 Kuani ne yakka mondum korope ku ne ruwe ne, en tutanu tumi-koro utara okai: shinen otta, oman ani ku itak chiki, oman; shui ek ani moshima guru otta ku ye koro, ek: orowa, ku usshiune guru otta tambe kara yan sekoro ku ye yakun, kan ruwe ne gusu ne na — sekoro nei tumi-koro utara esapane guru ye ruwe ne.
Kuani ne yakka montum kor pe ku ne ruwe ne, en=tutanu tumi-kor utar okay: sinen or ta, oman ani ku=itak ciki, oman; suy ek ani mosma kur or ta ku=ye kor, ek: orowa, ku=ussiw ne kur or ta tanpe kar yan sekor ku=ye yakun, kan ruwe ne kusu ne na — sekor ne tumi-kor utar esapane kur ye ruwe ne.
10 Orowa, Yesu tan itak nu chiki iyokunnure, aige, osh araki utara otta ene itak-hi :— Son no echi otta Ku ye, Israeru un utara tumugeta ne yakka naa shomo tap korachi an poro eishokor-i Ku nukara eramushkare.
Orowa, Yesu tan itak nu ciki iyokunnure, ayke, os arki utar or ta ene itak hi :— Sonno eci or ta Ku=ye, Israeru un utar tumke ta ne yakka naa somo tap koraci an poro eysokor hi Ku=nukar eramuskare.
Roukos 7.1-9 §65III
1 Orowa, Shinuma ye orushpe obitta no okai utara anure okere chiki; Kapernaum kotan orun oman nisa ruwe ne.
Orowa, Sinuma ye oruspe opittano okay utar a=nure okere ciki; Kapernaum kotan orun oman nisa ruwe ne.
2 Orowa, shine kenturion koro aoshkoro usshiune guru tashum ki wa tane rai etokooiki ruwe ne.
Orowa, sine kenturion kor aoskoro ussiw ne kur tasum ki wa tane ray etokooyki ruwe ne.
3 Awa, nei guru Yesu gusu an orushpe nu chiki, orota Yudea un utara koro ekashi payere wa, Shinuma ek wa koro usshiune guru kashiobiuki kuni koramkore nisa ruwe ne.
Awa, ne kur Yesu kusu an oruspe nu ciki, oro ta Yudea un utar kor ekasi payere wa, Sinuma ek wa kor ussiw ne kur kasiopiwki kuni koramkore nisa ruwe ne.
4 Orowa shinuma utara Yesu orota araki, aige, ramuosshi wano koramkoro wa ene itak-hi :— Shinuma gusu nei no ki kuni nei guru oripak an ainu ne;
Orowa sinuma utar Yesu oro ta arki, ayke, ramuossi wano koramkor wa ene itak hi :— Sinuma kusunéno ki kuni ne kur oripak an aynu ne;
5 chi koro moshirʼun utara ko katairotke, orowa, chi utara gusu shine Uwekarapa chisei kan nisa ruwe ne gusu ne na, ari itak.
ci kor mosir un utar ko katayrotke, orowa, ci utar kusu sine Uekarpa cise kan nisa ruwe ne kusu ne na, ari itak.
6 Orowa, Yesu nei utara tura no oman nisa ruwe ne. Tane koro chisei ehange no ek ita anak ne nei kenturion anak ne nimaraha teshkara wa Yesu otta ene itakte-hi :— Utarapa, iteki yaikota yai-shingere; Aokai ku kot chisei kitai choropoketa ahun shiri ku eoripak an na:
Orowa, Yesu ne utar turano oman nisa ruwe ne. Tane kor cise ehanke no ek hi ta anakne ne kenturion anakne nimaraha teskar wa Yesu or ta ene itakte hi :— Utarpa, iteki yaykota yay-sinkere; Aokay ku=kot cise kitay corpoke ta ahun siri ku=eoripak an na:
7 kuani ne yakka yaikota E otta ku oman kuni ko-oripak ruwe ne gusu ne na: koroka, itak ye wa en kore, yak anak ne ku goro heikachi aiwangere kusu ne.
kuani ne yakka yaykota E or ta ku=oman kuni ko-oripak ruwe ne kusu ne na: korka, itak ye wa en=kore, yakanak ne ku=kor hekaci aywankere kusu ne.
8 Kuani ne yakka mondum koro guru ku ne, en pokta tumi koro utara okai: orowa, oman, ari nei guru otta ku ye chiki, shinuma oman; moshima guru otta, ek, ani ku ye yakun, shinuma ek ruwe ne; orowa, tambe kara yan, ani ku usshiune guru otta ku ye ko anak ne, shinuma kan ruwe ne gusu ne na.
Kuani ne yakka montum kor kur ku ne, en=pok ta tumikor utar okay: orowa, oman, ari ne kur or ta ku=ye ciki, sinuma oman; mosma kur or ta, ek, ani ku=ye yakun, sinuma ek ruwe ne; orowa, tanpe kar yan, ani ku=ussiw ne kur or ta ku=ye ko anakne, sinuma kan ruwe ne kusu ne na.
9 Yesu tan itak nu chiki enushkari, aine, osh araki topaha utara orun hosari wa orota ene itak-hi: Echi otta Ku ye, Israeru un utara tumugeta tap korachi an yupke eishokor-i tane pakno Ku nukara shomoki ruwe ne.
Yesu tan itak nu ciki enuskari, ayne, os arki topaha utar orun hosari wa oro ta ene itak hi: Eci or ta Ku=ye, Israeru un utar tumke ta tap koraci an yupke eysokor hi tane pakno Ku=nukar somo ki ruwe ne.
Yoannes 4.46B-54 §37III
46 Tambe gusu, shui Shinuma nei wakka tonoto ne kara Gariraya moshirʼun Kana kotan ta ek Orowa, Kapernaum kotan ta koro okkai poho tashum ki shine tono an.
Tanpe kusu, suy Sinuma ne wakka tonoto ne kar Gariraya mosir un Kana kotan ta ek Orowa, Kapernaum kotan ta kor okkay poho tasum ki sine tono an.
47 Shinuma Yesu anak ne Yudea moshiri wano ek wa Gariraya moshiri ta an shiri nu chiki, orota oman wa koro poho iwangere gusu Shinuma san kuni ne koramkon nisa ruwe ne; shinuma rai ehange ruwe ne gusu ne na.
Sinuma Yesu anakne Yudea mosir wano ek wa Gariraya mosir ta an siri nu ciki, oro ta oman wa kor poho iwankere kusu Sinuma san kuni ne koramkor nisa ruwe ne; sinuma ray ehanke ruwe ne kusu ne na.
48 Tambe gusu, nei guru otta Yesu ene itak-hi:— Echi utara anak ne shirosh hemhem, iyokunnurep hemhem, nukara shomoki yak anak ne oara echi eishokoro shomoki ruwe ne.
Tanpe kusu, ne kur or ta Yesu ene itak hi:— Eci utar anakne siros hemhem, iyokunnurep hemhem, nukar somo ki yakanak ne oar eci=eysokor somo ki ruwe ne.
49 Orota nei tono ene itakhi :— Nishpa, ku poho rai etokota san wa en kore.
Oro ta ne tono ene itak hi :— Nispa, ku=poho ray etoko ta san wa en=kore.
50 Orota Yesu ene itak-hi :— E oman, e poho ishu korʼan ruwe ne, ari itak. Orowa, orota Yesu ye itak nei guru eishokoro hine oman nisa ruwe ne na.
Oro ta Yesu ene itak hi :— E oman, e poho i=su kor an ruwe ne, ari itak. Orowa, oro ta Yesu ye itak ne kur eysokor hine oman nisa ruwe ne na.
51 Awa, shinuma san shiri an rapoketa koro usshiune utara etunangara wa, koro poho ishu shiriki an ruwe ne, ani itak.
Awa, sinuma san siri an rapoketa kor ussiw ne utar etunankar wa, kor poho i=su siriki an ruwe ne, ani itak.
52 Tambe gusu, poho anak ne inan pakihi ta tumu nu heashi ruwe he an? sekoro nei utara otta nu nisa ruwe ne. Tambe gusu, numan ichi ji pakihi ta seisekmau tashum shinuma ande ruwe ne, sekoro itak.
Tanpe kusu, poho anakne inan pakihi ta tumu nu heasi ruwe he an? sekor ne utar or ta nu nisa ruwe ne. Tanpe kusu, numan ici ji pakihi ta seysekmaw tasum sinuma ante ruwe ne, sekor itak.
53 Orowa, orota, E poho ishu korʼan, ani an itak ani Yesu ye pakihi ne sekoro nei michi eraman: orowa, shinuma yaikota hemhem, uni un utara obitta hemhem, eishokon nisa ruwe ne.
Orowa, oro ta, E poho i=su kor an, ani an itak ani Yesu ye pakihi ne sekor ne mici eraman: orowa, sinuma yaykota hemhem, uni un utar opitta hemhem, eysokor nisa ruwe ne.
54 Tambe anak shui Yudea moshiri wano Gariraya moshiri ta ek okake Yesu tu ikinne no an kara shirosh ne ruwe ne na.
Tanpe anak suy Yudea mosir wano Gariraya mosir ta ek okake Yesu tu ikinne no an kar siros ne ruwe ne na.
Mattaios 8.11-12 §65V
11 Orowa echi otta Ku ye, chupka wano hene chuppok wano hene inne utara araki wa Abraham hemhem Isaak hemhem Yakob hemhem tura shine ikinne Kando moshirʼotta rok ruwe ne;
Orowa eci or ta Ku=ye, cupka wano hene cuppok wano hene inne utar arki wa Abraham hemhem Isaak hemhem Yakob hemhem tura sine ikinne Kanto mosir or ta rok ruwe ne;
12 koroka, moshiri poho utara anak ne iyotta kunne ushike orun aokeuba kusu ne, nei ushiketa chish ambe newa niyorokara ambe an ruwe ne kusu ne na.
korka, mosir poho utar anakne iyotta kunne usike orun a=okewpa kusu ne, ne uske ta cis anpe newa niyorkar anpe an ruwe ne kusu ne na.
Roukos 13.28B-29 §172V
28 Abraham, Isaak, Yakob newa obitta no okai uweingara utara anak ne Kamui moshiri ta okai wa, echi utara yaikota soita asoyumbare shiri echi nukara chiki, nei ita chish ambe hemhem an, nimaki niyorokara hemhem an kusu ne na.
Abraham, Isaak, Yakob newa opittano okay ueinkar utar anakne Kamuy mosir ta okay wa, eci utar yaykota soy ta asoyunpare siri eci=nukar ciki, ne hi ta cis anpe hemhem an, nimaki niyorkar hemhem an kusu ne na.
29 Orowa no, utara anak ne chupka wano hemhem, chuppok wano hemhem, arutoro wano hemhem, pikata wano hemhem araki wa Kamui moshirʼotta rok kusu ne na.
Orowano, utar anakne cupka wano hemhem, cuppok wano hemhem, arutor wano hemhem, pikata wano hemhem arki wa Kamuy mosir or ta rok kusu ne na.
Mattaios 8.13 §66V
13 Orowa, nei sapane guru otta Yesu ene itak-hi :— Oman, eani eishokor-i an nei no eani gusu aki ruwe ne, ani itak. Orowa, nei pakihi wano nei a tashum ki heikachi iwange no an ruwe ne na.
Orowa, ne sapanekur or ta Yesu ene itak hi :— Oman, eani eysokor hi an néno eani kusu aki ruwe ne, ani itak. Orowa, ne pakihi wano ne a tasum ki hekaci iwanke no an ruwe ne na.
Mattaios 8.14-18 §67II
14 Orowa, Yesu anak ne Petros koro chisei ta ahun chiki, koro shuito-habo seisekmau tashum ki wa hotke wa an shiri nukara.
Orowa, Yesu anakne Petros kor cise ta ahun ciki, kor suyto-hapo seysekmaw tasum ki wa hotke wa an siri nukar.
15 Orowa, Shinuma nei shiwentep koro tekehe tomooshma, aige, seisekmau tashum kohoppa; orowa, shinuma hopuni wa otta yaishieiwangere nisa ruwe ne.
Orowa, Sinuma ne siwentep kor tekehe tomoosma, ayke, seysekmaw tasum kohoppa; orowa, sinuma hopuni wa or ta yaysieywankere nisa ruwe ne.
16 Orowa shiri-onuman an koro, utara anak ne nitne kamui shikatkari utara poron no tura wa araki: aine, itak ani Shinuma nitne kamui soyumbare, orowa, tashum ki utara obitta iwangere nisa ruwe ne na:
Orowa siri-onuman an kor, utar anakne nitne kamuy sikatkari utar poronno tura wa arki: ayne, itak ani Sinuma nitne kamuy soyunpare, orowa, tasum ki utar opitta iwankere nisa ruwe ne na:
17 tambe anak ne, — Nei guru yaikota chikoro katchakbe uina hemhem ki; chikoro tashum sei hemhem ki ruwe ne — sekorʼan uweingara guru Isaya ye itak ambe auweomare kuni gusu an ambe ne ruwe ne na.
tanpe anakne, — Ne kur yaykota ci=kor katcakpe uyna hemhem ki; ci=kor tasum sey hemhem ki ruwe ne — sekor an ueinkar kur Isaya ye itak anpe a=ueomare kuni kusu an anpe ne ruwe ne na.
18 Yesu yai shirokari ta inne utara okai ruwe nukara chiki ikush un paye kuni kashpaotte nisa ruwe ne na.
Yesu yay sirkar ta inne utar okay ruwe nukar ciki ikus un paye kuni kaspaotte nisa ruwe ne na.
Markos 1.29-34A §15II
29 Orowa nani Uwekarapa chisei orowa no soyumba chiki Yakob newa Yoannes tura Simon newa Andreas koro uni un ahup nisa ruwe ne.
Orowa nani Uekarpa cise oro wano soyunpa ciki Yakob newa Yoannes tura Simon newa Andreas kor uni un ahup nisa ruwe ne.
30 Awa, Simon koro shiuto-habo seisek mau tashum ki hine hotke wa an; aige,
Awa, Simon kor siwto-hapo sesek maw tasum ki hine hotke wa an; ayke,
31 nani nei shiwentep orushpe Shinuma anure: orowa, Shinuma ek wa nei shiwentep koro teke kishima hine punire ruwe ne; aige, seisek mau tashum aisamka, orowa, shinuma anak ne okai utara otta yaishieiwangere nisa ruwe ne na.
nani ne siwentep oruspe Sinuma a=nure: orowa, Sinuma ek wa ne siwentep kor teke kisma hine punire ruwe ne; ayke, sesek maw tasum a=ysamka, orowa, sinuma anakne okay utar or ta yaysieywankere nisa ruwe ne na.
32 Orowa, shiri-onuman chup ahun ita, utara anak ne obitta no okai tashum ki utara hemhem, nitne kamui shikatkari utara hemhem Shinuma orota koro wa araki.
Orowa, siri-onuman cup ahun hi ta, utar anakne opittano okay tasum ki utar hemhem, nitne kamuy sikatkari utar hemhem Sinuma oro ta kor wa arki.
33 Orowa, machiya un utara obitta apa samaketa uwekarapa.
Orowa, maciya un utar opitta apa samake ta uekarpa.
34 Awa, Shinuma usa-usa an tashum ki inne utara iwangere hemhem ki, inne nitne kamui oashinge hemhem ki; awa, nitne kamui Shinuma eamkiri gusu, itak kuni hattoki nisa ruwe ne na.
Awa, Sinuma usa-usa an tasum ki inne utar iwankere hemhem ki, inne nitne kamuy oasinke hemhem ki; awa, nitne kamuy Sinuma e=amkir kusu, itak kuni hattoki nisa ruwe ne na.
Roukos 4.38-40 §26II
38 Orowa Shinuma Uwekarapa chisei orowa no oman wa Simon kotʼchisei orun ahun nisa ruwe ne. Orowa, Simon koro shiuto-habo yupke seisek mau tashum ki wa an, awa, nei shiwentep gusu utara anak ne Shinuma koramkon ruwe ne.
Orowa Sinuma Uekarpa cise oro wano oman wa Simon kot cise orun ahun nisa ruwe ne. Orowa, Simon kor siwto-hapo yupke sesek maw tasum ki wa an, awa, ne siwentep kusu utar anakne Sinuma koramkor ruwe ne.
39 Awa Shinuma nei shiwentep samaketa ash wa seisek mau tashum ko-sakayokara, aige, tashum shinuma hoppa: orowa, nei guru nani hopuni wa utara orota yaishieiwangere nisa ruwe ne na.
Awa Sinuma ne siwentep samake ta as wa sesek maw tasum ko-sakayokar, ayke, tasum sinuma hoppa: orowa, ne kur nani hopuni wa utar oro ta yaysieywankere nisa ruwe ne na.
40 Orowa, chup ahun koro ita usa okai tashum ki utara koro guru anak ne Shinuma orota aani wa araki, aige, pishno okai utara kashiketa koro tekehe ande wa iwangere nisa ruwe ne.
Orowa, cup ahun kor hi ta usa okay tasum ki utar kor kur anakne Sinuma oro ta a=ani wa arki, ayke, pisno okay utar kasike ta kor tekehe ante wa iwankere nisa ruwe ne.
Mattaios 8.19-22 §68V
19 Orowa, shine kambi-nuye guru ek wa Shinuma otta ene itak-hi :— Epakashnu guru, neun E oman yakka ku itura kusu ne, ari itak.
Orowa, sine kampi-nuye kur ek wa Sinuma or ta ene itak hi :— Epakasnu kur, neun E oman yakka ku=itura kusu ne, ari itak.
20 Yesu nei guru otta ene itak-hi :— Chironnup anak ne shui koro, rik peka oman chikap anak ne reushi ushi an, koroka, Ainu Poho anak ne sapa eninui ushike ka sak ruwe ne.
Yesu ne kur or ta ene itak hi :— Cironnup anakne suy kor, rik peka oman cikap anakne rewsi usi an, korka, Aynu Poho anakne sapa eninuy usike ka sak ruwe ne.
21 Orowa, moshima an Shinuma koikara guru naa shinen ek wa ene itak-hi :— Utarapa, kuani hoshiki no oman wa ku michi iyurui otta ku omare kuni ramuoshma wa en kore, ani itak.
Orowa, mosma an Sinuma koykar kur naa sinen ek wa ene itak hi :— Utarpa, kuani hoskino oman wa ku=mici iyuruy or ta ku=omare kuni ramuosma wa en=kore, ani itak.
22 Koroka, Yesu nei guru otta ene itak-hi :— En osh ek yan; rai guru anak ne koro rai guru iyurui otta omarere yan, sekoro itak.
Korka, Yesu ne kur or ta ene itak hi :— En=os ek yan; raykur anakne kor raykur iyuruy or ta omarere yan, sekor itak.
Roukos 9.57-60 §105V
57 Orowa, nei utara payekai korʼan rapoketa shine ainu Shinuma otta ene itak-hi :— Neita E oman yakka E osh ku oman kusu ne na, ani itak.
Orowa, ne utar payekay kor an rapoketa sine aynu Sinuma or ta ene itak hi :— Ney ta E oman yakka E os ku=oman kusu ne na, ani itak.
58 Otta Yesu ene itak-hi :— Chironnup anak ne shui koro, rik peka oman chikap anak ne reushi kuni ushike koro, koroka, Ainu Poho anak sapa eninui ushi ka sak ruwe ne, ari itak.
Or ta Yesu ene itak hi :— Cironnup anakne suy kor, rik peka oman cikap anakne rewsi kuni usike kor, korka, Aynu Poho anak sapa eninuy usi ka sak ruwe ne, ari itak.
59 Orowa, moshima an guru otta Yesu ene itak-hi :— En osh ek yan, ani itak. Koroka, orota shinuma ene itak-hi :— Utarapa, hoshiki no ku hoshipi wa ku goro michi tushiri otta omare kuni ramuoshma wa en kore, ani itak.
Orowa, mosma an kur or ta Yesu ene itak hi :— En=os ek yan, ani itak. Korka, oro ta sinuma ene itak hi :— Utarpa, hoskino ku=hosipi wa ku=kor mici tusiri or ta omare kuni ramuosma wa en=kore, ani itak.
60 Koroka, Yesu nei guru otta ene itak-hi :— Rai guru anak ne rai guru tushiri otta omarere yan; orowa, e oman wa Kamui moshiri assuru ashte yan, ari itak.
Korka, Yesu ne kur or ta ene itak hi :— Raykur anakne raykur tusiri or ta omarere yan; orowa, e oman wa Kamuy mosir assuru aste yan, ari itak.
Mattaios 8.23-34 §69II
23 Orowa Shinuma chip o, awa, koikara utara ne
Orowa Sinuma cip o, awa, koykar utar ne
24 yakka tura no o ruwe ne. Orowa, ingarʼan, atui noshiketa rui mau shiroshma wa chip maanihungo akamure pakno riri poro ruwe ne:
yakka turano o ruwe ne. Orowa, inkar=an, atuy noske ta ruy maw sirosma wa cip maanihunko a=kamure pakno rir poro ruwe ne:
25 koroka, Shinuma anak ne mokoro wa an ruwe ne. Koikara utara shinuma otta araki wa mososo hine ene itak-hi :— Utarapa, un kashiobiuki wa un kore, tane aisamka ange shiriki na, sekoro itak.
korka, Sinuma anakne mokor wa an ruwe ne. Koykar utar sinuma or ta arki wa mososo hine ene itak hi :— Utarpa, un kasiopiwki wa un kore, tane a=ysamka anke siriki na, sekor itak.
26 Nei utara otta Shinuma ene itak-hi :— Eishokor-i aahak utara hemanda gusu echi ishitoma ya? sekoro itak. Orowa, Shinuma hopuni wa rera newa atui kopao; orowa, eashka ratchi neto an na.
Ne utar or ta Sinuma ene itak hi :— Eysokor hi aahak utar hemanta kusu eci=isitoma ya? sekor itak. Orowa, Sinuma hopuni wa rera newa atuy kopao; orowa, easka ratci neto an na.
27 Orowa, nei utara iyokunnure wa ene itak-hi :— Tan guru nekon a an guru ne ruwe he an? Atui ne yakka rera ne yakka koro itak nu, sekoro itak.
Orowa, ne utar iyokunnure wa ene itak hi :— Tan kur nekona an kur ne ruwe he an? Atuy ne yakka rera ne yakka kor itak nu, sekor itak.
28 Orowa, atui kushketa an Gadara moshiri orun Shinuma arapa chiki, tushiri orowa no araki shi no niwen nitne kamui shikatkari utara tun etunangara, moshima guru nei ru kari apkash eaikap pakno ne ruwe ne.
Orowa, atuy kuske ta an Gadara mosir orun Sinuma arpa ciki, tusiri oro wano arki sino niwen nitne kamuy sikatkari utar tun etunankar, mosma kur ne ru kari apkas eaykap pakno ne ruwe ne.
29 Orowa ingarʼan, nei utara hawe sange wa ene itak-hi :— Kamui Poho Yesu, un otta nep irenga an a? Naa etoko an aine teda ek wa un panakte shiri ruwe he an? sekoro itak.
Orowa inkar=an, ne utar hawe sanke wa ene itak hi :— Kamuy Poho Yesu, un or ta nep irenka an a? Naa etoko an ayne teta ek wa un panakte siri ruwe he an? sekor itak.
30 Hangeko no an ushiketa ibe wa okai buta poron no an, awa, nitne kamui Shinuma otta ene itak-hi :—
Hankeko no an uske ta ipe wa okay puta poronno an, awa, nitne kamuy Sinuma or ta ene itak hi :—
31 Aokai un oashinge yakun, buta tumu un ahup ash kuni ramuoshma wa un kore, sekorʼan itak ani koramkon nisa ruwe ne.
Aokay un oasinke yakun, puta tumu un ahup as kuni ramuosma wa un kore, sekor an itak ani koramkor nisa ruwe ne.
32 Paye yan, sekoro Shinuma itak; orowa, nitne kamui soyunba wa buta tumugeta ahup, aige, buta obitta raune ushike orowa rap wa atui otta ahup hine esumba wa rai nisa ruwe ne na.
Paye yan, sekor Sinuma itak; orowa, nitne kamuy soyunpa wa puta tumke ta ahup, ayke, puta opitta rawne usike orowa rap wa atuy or ta ahup hine e=sunpa wa ray nisa ruwe ne na.
33 Orowa no, buta reshpa utara anak ne machiya ko-kira wa paye, aige, tan orushpe newa nitne kamui shikatkari utara orushpe ye nisa ruwe ne.
Orowano, puta respa utar anakne maciya ko-kira wa paye, ayke, tan oruspe newa nitne kamuy sikatkari utar oruspe ye nisa ruwe ne.
34 Orowa, Yesu etunangara kuni gusu machiya koro utara obitta araki; awa, Shinuma nukara chiki, nei kotan orowa no paye kuni koramkon nisa ruwe ne na.
Orowa, Yesu etunankar kuni kusu maciya kor utar opitta arki; awa, Sinuma nukar ciki, ne kotan oro wano paye kuni koramkor nisa ruwe ne na.
Markos 4.35-5.17 §47II
35 Nei toho ta shiri-onuman an ita, ikushta paye yanro, ari utara otta ye.
Ne toho ta siri-onuman an hi ta, ikusta paye yanro, ari utar or ta ye.
36 Orowa, inne utara ande wa chip otta Shinuma an korachi tura wa atui-tomotuye nisa ruwe ne. Orowa, moshima an chip ne yakka tura no okai ruwe ne.
Orowa, inne utar ante wa cip or ta Sinuma an koraci tura wa atuy-tomotuye nisa ruwe ne. Orowa, mosma an cip ne yakka turano okay ruwe ne.
37 Awa shiri rui rera mau hetuku, riri anak ne chip ahun, chip shikte koro pakno ahun nisa
Awa siri ruy rera maw hetuku, rir anakne cip ahun, cip sikte kor pakno ahun nisa
38 ruwe ne. Shinuma yaikota anak ne chip umta chieninuibe koro wa mokon ruwe ne: aige, utara Shinuma mososo wa orota ene itak-hi :— Epakashnu guru, chi utara aisamka ange shiriki-i Aokai ramu-eunin ruwe?
ruwe ne. Sinuma yaykota anakne cip umta ci=eninuype kor wa mokor ruwe ne: ayke, utar Sinuma mososo wa oro ta ene itak hi :— Epakasnu kur, ci utar a=ysamka anke siriki hi Aokay ramu-ewnin ruwe?
39 Aine, Shinuma mosh wa rera kopao, samata, Ratchi, mo no an, ari an itak ani atui otta ye. Orowa, rera isam wa poro neto an ruwe ne.
Ayne, Sinuma mos wa rera kopao, sama ta, Ratci, mo no an, ari an itak ani atuy or ta ye. Orowa, rera isam wa poro neto an ruwe ne.
40 Orowa, nei utara otta — Hemanda gusu echi ishitoma ya? Naa shomo echi eishokon ruwe he an; ari itak.
Orowa, ne utar or ta — Hemanta kusu eci=isitoma ya? Naa somo eci=eysokor ruwe he an; ari itak.
41 Orowa, utara poron no ishitoma wa utashpa ene itakhi :— Yakun, tan guru nen ne ruwe he an? Rera ne yakka atui ne yakka koro itak nu ruwe ne.
Orowa, utar poronno isitoma wa utaspa ene itak hi :— Yakun, tan kur nen ne ruwe he an? Rera ne yakka atuy ne yakka kor itak nu ruwe ne.
5:1 Orowa, atui kushta Gerasene un utara koro moshir ta shirepa nisa ruwe ne.
Orowa, atuy kus ta Gerasene un utar kor mosir ta sirepa nisa ruwe ne.
2 Awa, chip yan koro, nan tushiri orowa no ek Ichakkere ramat shikatkari guru shinen Shinuma etunangara,
Awa, cip yan kor, nan tusiri oro wano ek Icakkere ramat sikatkari kur sinen Sinuma etunankar,
3 nei guru tushiri ani uni ne kon nisa ruwe ne: orowa, shinuma tupetupe eashkai guru isam, kani shinkop ani ka tupe eaikap ruwe ne;
ne kur tusiri ani uni ne kor nisa ruwe ne: orowa, sinuma tupetupe easkay kur isam, kani sinkop ani ka tupe eaykap ruwe ne;
4 nei guru kanna-kanna chikiri eok shinkop newa kani shinkop ani atupetupe, yakka kani shinkop yasa chikiri eok shinkop kaye nisa ruwe ne gusu ne ne; samata, shinuma ratchire gusu eipak kiroro koro guru isam ruwe ne na.
ne kur kanna-kanna cikiri eok sinkop newa kani sinkop ani a=tupetupe, yakka kani sinkop yasa cikiri eok sinkop kaye nisa ruwe ne kusu ne ne; sama ta, sinuma ratcire kusu e=pak kiroro kor kur isam ruwe ne na.
5 Orowa, kunne-to ta hene, tokap-to ta hene shinuma ramma tushiri otta hene nup otta hene an wa hawe ashte hemhem ki shuma ani yai-tuye hemhem ki ruwe ne.
Orowa, kunne-to ta hene, tokap-to ta hene sinuma ramma tusiri or ta hene nup or ta hene an wa hawe aste hemhem ki suma ani yay-tuye hemhem ki ruwe ne.
6 Nei guru tuima no an ushike wano Yesu nukara, awa, hoyupu hine orota ko-ongami;
Ne kur tuymano an usike wano Yesu nukar, awa, hoyupu hine oro ta ko-onkami;
7 orowa, rui hau ani hawe ashte wa ene itak-hi :— Iyotta rik un Kamui Poho Yesu, E otta nep irengaʼku an a? Iteki Aokai en panakte kuni ne Kamui ani ku E ikashpaotte ash na, ari itak.
orowa, ruy haw ani hawe aste wa ene itak hi :— Iyotta rikun Kamuy Poho Yesu, E or ta nep irenka ku=an a? Iteki Aokay en=panakte kuni ne Kamuy ani ku E ikaspaotte as na, ari itak.
8 Inambe gusu ne yakun, — Ichakkere ramat, nei guru orowa no oashin yan, ani an itak ani Shinuma ye nisa ruwe ne gusu ne na.
Inanpe kusu ne yakun, — Icakkere ramat, ne kur oro wano oasin yan, ani an itak ani Sinuma ye nisa ruwe ne kusu ne na.
9 Orowa, nekon a reihei e koro ya, ari Shinuma nu. Chi utara inne ne gusu, ku reihei anak ne Region ne ruwe ne, ari itak.
Orowa, nekona rehe e=kor ya, ari Sinuma nu. Ci utar inne ne kusu, ku=rehe anakne Region ne ruwe ne, ari itak.
10 Orowa, iteki nei moshiri wano shinuma utara aokeuba kuni gusu nei ainu poron no Shinuma koramkon nisa ruwe ne.
Orowa, iteki ne mosir wano sinuma utar a=okewpa kuni kusu ne aynu poronno Sinuma koramkor nisa ruwe ne.
11 Nei nupuri kotoro ta ibe wa okai poro buta topaha an ruwe ne.
Ne nupuri kotor ta ipe wa okay poro puta topaha an ruwe ne.
12 Ichakkere, ramat utara Shinuma koramkoro wa ene itak-hi :— Buta oshiketa chi ahup
Icakkere, ramat utar Sinuma koramkor wa ene itak hi :— Puta oske ta ci ahup
13 ash kuni ne un payere wa un kore. Orowa, Shinuma ramu-oshma. Awa, Ichakkere ramat oaship hine buta oshiketa ahup: aige, buta topa range ushike rap wa atui orun ahup; nei pishki-hi anak ne wan shine wan hotne ehange ruwe ne; nei okaibe atui otta a-eteyeba nisa ruwe ne.
as kuni ne un payere wa un kore. Orowa, Sinuma ramu-osma. Awa, Icakkere ramat oasi p hine puta oske ta ahup: ayke, puta topa ranke usike rap wa atuy orun ahup; ne piski hi anakne wan sine wan hotne ehanke ruwe ne; ne okaype atuy or ta a-eteyepa nisa ruwe ne.
14 Orowa, nei buta reshpa utara kira wa machiya otta hene kotan otta hene nei orushpe assuru ashte nisa ruwe ne. Orowa, nekon a orushpe hetuku nisa ruwe he an ingara gusu utara anak ne araki nisa ruwe ne.
Orowa, ne puta respa utar kira wa maciya or ta hene kotan or ta hene ne oruspe assuru aste nisa ruwe ne. Orowa, nekona oruspe hetuku nisa ruwe he an inkar kusu utar anakne arki nisa ruwe ne.
15 Aige, Yesu otta araki wa nitne kamui shikatkari guru, hoshiki no nei Region koro guru a hine mi ambe ami wa keutum yai eashirikara wa an-i nukara: awa, ishitoma nisa ruwe ue.
Ayke, Yesu or ta arki wa nitne kamuy sikatkari kur, hoskino ne Region kor kur a hine mi anpe ami wa kewtum yay easirkar wa an hi nukar: awa, isitoma nisa ruwe ue.
16 Orowa, nei okaibe nukara utara anak ne nitne kamui shikatkari guru orushpe hene, buta orushpe hene nure nisa ruwe ne.
Orowa, ne okaype nukar utar anakne nitne kamuy sikatkari kur oruspe hene, puta oruspe hene nure nisa ruwe ne.
17 Awa, koro kotan wano Yesu paye kuni ne nei utara koramkoro heashi.
Awa, kor kotan wano Yesu paye kuni ne ne utar koramkor heasi.
Roukos 8.22-37A §83II
22 Orowa, nei i pakita Yesu yaikota anak ne koro koikara utara tura chip orun ahun; awa, nei utara otta, to kushta paye yanro, ani itak: aige, chip asange nisa ruwe ne.
Orowa, ne i pakita Yesu yaykota anakne kor koykar utar tura cip orun ahun; awa, ne utar or ta, to kus ta paye yanro, ani itak: ayke, cip a=sanke nisa ruwe ne.
23 Koroka, to tomotuye rapoketa, Yesu mokon nisa ruwe ne: aine, yupke rera rui wa to epeka ruwe ne; awa, chip wakka eshik korʼan gusu, nei utara yaikikip no an na.
Korka, to tomotuye rapoketa, Yesu mokor nisa ruwe ne: ayne, yupke rera ruy wa to epeka ruwe ne; awa, cip wakka esik kor an kusu, ne utar yaykikip no an na.
24 Orowa, Shinuma orota nei utara araki wa mososo wa ene itak-hi :— Nishpa, nishpa, a un isamka kushki na, ari itak. Orowa, Shinuma mosh hine rera newa yupke ruyambe kopao, aine, nei ambe tui wa neto an ruwe ne.
Orowa, Sinuma oro ta ne utar arki wa mososo wa ene itak hi :— Nispa, nispa, a un isamka kuski na, ari itak. Orowa, Sinuma mos hine rera newa yupke ruyanpe kopao, ayne, ne anpe tuy wa neto an ruwe ne.
25 Orowa, nei utara otta Shinuma ene itak-hi :— Echi koro eishokorʼi neita an ruwe he an? ani itak. Orowa, nei utara ishitoma wa enushkari, awa, utashpa ene itakhi :— Rera newa wakka kashpaotte chiki itak anu tan guru nen ne ruwe he an? ari itak nisa ruwe ne.
Orowa, ne utar or ta Sinuma ene itak hi :— Eci=kor eysokor i ney ta an ruwe he an? ani itak. Orowa, ne utar isitoma wa enuskari, awa, utaspa ene itak hi :— Rera newa wakka kaspaotte ciki itak anu tan kur nen ne ruwe he an? ari itak nisa ruwe ne.
26 Orowa, Gariraya moshiri samake un Kerasene kotan ta shirepa nisa ruwe ne.
Orowa, Gariraya mosir samake un Kerasene kotan ta sirepa nisa ruwe ne.
27 Awa, Shinuma ya ta yap chiki machiya orowa no ek nitne Kamui shikatkari shine ainu etunangara; nei guru ohon no imi shomoki no an, orowa, chisei otta riya shomoki wa tushiri otta an ruwe ne.
Awa, Sinuma ya ta yap ciki maciya oro wano ek nitne Kamuy sikatkari sine aynu etunankar; ne kur ohor no imi somo ki no an, orowa, cise or ta riya somo ki wa tusiri or ta an ruwe ne.
28 Nei guru Yesu nukara chiki hawe ashte hine Shinuma kotchaketa hachiri wa oro mau soyoshma hine ene itak-hi :— Iyotta rikun Kamui Poho Yesu, E otta nep irenga ku an a? Iteki en panakte kuni ku koramkon na, ani itak.
Ne kur Yesu nukar ciki hawe aste hine Sinuma kotcake ta hacir wa oro maw soyosma hine ene itak hi :— Iyotta rikun Kamuy Poho Yesu, E or ta nep irenka ku=an a? Iteki en=panakte kuni ku=koramkor na, ani itak.
29 Inambe gusu ne yakun, nei ainu orowa no ichakkere ramat oashin kuni ne Shinuma kashpaotte nisa ruwe ne gusu ne na. Kanna-kanna nei ramat anak ne nei ainu turen gusu, shinkop newa chikiri eok shinkop ani atupetupe wa aepungine yakka, nei uokbe tuye wa nitne kamui orowa no nup otta aomande nisa ruwe ne.
Inanpe kusu ne yakun, ne aynu oro wano icakkere ramat oasin kuni ne Sinuma kaspaotte nisa ruwe ne kusu ne na. Kanna-kanna ne ramat anakne ne aynu turen kusu, sinkop newa cikiri eok sinkop ani a=tupetupe wa a=epunkine yakka, ne uokpe tuye wa nitne kamuy oro wano nup or ta a=omante nisa ruwe ne.
30 Orowa, nekon a reihei e koro ya? sekoro Yesu uwepekennu; aige, Region, ani shinuma ye; oshiketa ahup nitne kamui inne utara ne ruwe ne gusu ne na.
Orowa, nekona rehe e=kor ya? sekor Yesu uwepekennu; ayke, Region, ani sinuma ye; oske ta ahup nitne kamuy inne utar ne ruwe ne kusu ne na.
31 Orowa, iteki kashpaotte wa asam sak ushike un apayere kuni gusu Shinuma koramkoro nisa ruwe ne.
Orowa, iteki kaspaotte wa asam sak usike un a=payere kuni kusu Sinuma koramkor nisa ruwe ne.
32 Orowa, nei kotan un nupuri kata ibe wa okai inne buta topaha an ruwe ne: awa, nei buta tumuge un ahup kuni ramuoshmap koramkon nisa.
Orowa, ne kotan un nupuri kata ipe wa okay inne puta topaha an ruwe ne: awa, ne puta tumuke un ahup kuni ramuosmap koramkor nisa.
33 Aine, Shinuma ramuoshma nisa ruwe ne. Awa, nitne kamui utara nei ainu orowa no oaship wa buta orun ahup: aige, buta topaha nupuri kotoro rap wa to orun ahup hine eteye wa rai nisa ruwe ne.
Ayne, Sinuma ramuosma nisa ruwe ne. Awa, nitne kamuy utar ne aynu oro wano oasi p wa puta orun ahup: ayke, puta topaha nupuri kotor rap wa to orun ahup hine e=teye wa ray nisa ruwe ne.
34 Buta reshpa utara anak ne nei hetuku orushpe nukara chiki; kira wa machiya otta hene kotan otta hene nure nisa ruwe ne.
Puta respa utar anakne ne hetuku oruspe nukar ciki; kira wa maciya or ta hene kotan or ta hene nure nisa ruwe ne.
35 Awa, nei wa ambe nukara gusu utara paye; orowa, Yesu orota araki chiki orowa no nitne kamui oaship ainu anrip imi wa keutura yaieashiri kara wa an wa Yesu chikiri samaketa a wa an-i nukara, orowa no, shinuma utara ishitoma shiriki okai.
Awa, ne wa anpe nukar kusu utar paye; orowa, Yesu oro ta arki ciki oro wano nitne kamuy oasi p aynu anrip imi wa kewtura yayeasiri kar wa an wa Yesu cikiri samake ta a wa an hi nukar, orowano, sinuma utar isitoma siriki okay.
36 Orowa, nei wa ambe nukara utara anak ne tap araki utara otta nitne kamui shikatkari ainu nekon a iki wa aiwangere ruwe ne-i nure nisa ruwe ne.
Orowa, ne wa anpe nukar utar anakne tap arki utar or ta nitne kamuy sikatkari aynu nekona iki wa aywankere ruwe ne hi nure nisa ruwe ne.
37 Orowa, Kerasene kotan okari un obitta no okai utara anak ne Shinuma oyake un oman kuni ekoramkoro; nei utara shiri ishitoma wa okai nisa ruwe ne gusu ne na; orowa, Shinuma chip orun ahun wa hoshipi nisa ruwe ne.
Orowa, Kerasene kotan okari un opittano okay utar anakne Sinuma oyake un oman kuni e=koramkor; ne utar siri isitoma wa okay nisa ruwe ne kusu ne na; orowa, Sinuma cip orun ahun wa hosipi nisa ruwe ne.